Esekielu 35:1-15
35 Ua oo mai foʻi le afioga a Ieova iā te aʻu e faapea:
2 “Le atalii e o le tagata, ia faasaga ou mata+ i vaega maugā o Seira+ ma fai valoaga e faasagatau atu i ai.+
3 Ia e fai atu i ai, ‘O le fetalaiga lenei a le Alii Pule Silisili Ese o Ieova: “Vaega maugā e o Seira,+ o lenei ua ou faasagatau atu iā te oe, ou te faaloaloa atu loʻu lima e faasagatau atu iā te oe+ ma matuā faatafunaina oe, e faatafunaina lava.+
4 Ou te faagaogaoina ou aai, ma o le a matuā faatafunaina oe;+ ona e iloa ai lea o aʻu lava o Ieova,+
5 talu ai ua umi ona e ʻinoʻino+ mai ma e tuuina atu pea tagata o Isaraelu i le malosi o le pelu,+ i taimi o o latou puapuaga,+ i le taimi na faaiʻu ai a latou mea sesē.”’+
6 “‘O lea, o loo ola aʻu,’ o le fetalaiga lenei a le Alii Pule Silisili Ese o Ieova, ‘ua ou saunia oe mo le toto, e tuliloaina oe e le toto.+ E mautinoa o le toto lava lea ua e ʻinoʻino i ai, o lea, e tuliloa ai oe e le toto.+
7 O le a ou matuā faatafunaina vaega maugā o Seira, e faatafunaina lava,+ ma ou te faaumatia lē e alu atu i ai atoa ma lē e toe foʻi mai.+
8 O le a ou faatumuina ona mauga i ona tagata ua fasiotia; o le a paʻuʻū o ē e fasiotia i le pelu i ou aʻega, i ou vanu ma ou ālia uma.+
9 Ou te faia oe ma mea e faatafunaina e faavavau, e lē toe ʻainā ou aai;+ ona outou iloa ai lea o aʻu lava o Ieova.’+
10 “Talu ai ua e faapea ane, ‘O le a fai mo aʻu nei nuu e lua ma nei laueleele e lua, ma e fai foʻi mo i tatou ia laueleele e lua,’+ a ua iai Ieova i inā,+
11 ‘o lea, o loo ola aʻu,’ ua fetalai mai ai le Alii Pule Silisili Ese o Ieova, ‘ou te gaoioi e tusa ma lou ita, e tusa ai foʻi ma lou lotoleaga ua e faaalia ona o lou ʻinoʻino iā i latou;+ ma ou te faailoa atu aʻu iā i latou pe a ou faamasinoina oe.+
12 O le a e iloa ai o aʻu lava o Ieova, ua ou faalogo i au tala lē faaaloalo uma na fai e faatatau i mauga o Isaraelu+ e faapea: “Ua faatafunaina ia. Ua tuuina mai iā i matou e fai ma meaʻai.”+
13 Ua outou mimitavale pea ma le faasausili e faasagatau mai iā te aʻu i o outou gutu,+ ma ua faateleina foʻi a outou tala e faasagatau mai iā te aʻu.+ Ua ou faalogo ai lava.’+
14 “O le fetalaiga lenei a le Alii Pule Silisili Ese o Ieova, ‘I le taimi e fiafia ai le lalolagi uma, ou te faia ai oe ma mea e matuā faatafunaina.
15 Talu ai na e fiafia ona o le faatafunaina o le tofi o le aiga o Isaraelu, ou te faia foʻi faapea iā te oe.+ Vaega maugā e o Seira, atoa ma Etoma uma, o le a avea oe ma mea e matuā faatafunaina;+ ona latou iloa ai lea o aʻu lava o Ieova.’”+
