Esekielu 38:1-23
38 Ua oo mai foʻi le afioga a Ieova iā te aʻu e faapea:
2 “Le atalii e o le tagata,+ ia faasaga atu ou mata iā Koku mai i Makoku,+ o le taʻitaʻi sili o Meseko+ ma Tupalu,+ ma fai valoaga e faasagatau atu iā te ia.
3 Ia e faapea atu, ‘O le fetalaiga lenei a le Alii Pule Silisili Ese o Ieova: “Koku e, o aʻu lava ou te faasagatau atu iā te oe, le taʻitaʻi sili o Meseko ma Tupalu.
4 Ou te faaliliueseina oe ma tuu mātau i ou auvae,+ ou te taʻitaʻi iā te oe ma au ʻautau uma,+ o solofanua ma ē e tiʻetiʻe solofanua, o i latou uma ua oofu i ofu mananaia,+ o se faapotopotoga e toʻatele ua iai talipupuni tetele ma tamaʻi talita, e tofu i latou uma ma pelu;+
5 ua faatasi ma i latou Peresia,+ o Aitiope+ ma Futu,+ o i latou uma ua iai tamaʻi talita ma pulou tau;
6 o Komeri+ ma ana ʻautau uma, o le aiga o Tokaremo,+ mai i vaega mamao o le itu i mātū, o ana ʻautau uma, ma le toʻatele o tagata faatasi ma oe.+
7 “ʻ“Ia nofosauni, ia faia ni au tapenapenaga, o oe ma lau faapotopotoga uma,+ o i latou ua faapotopoto faatasi iā te oe, ma ia fai oe ma o latou taʻitaʻiʻau.
8 “ʻ“Ou te uaʻi atu iā te oe pe a mavae aso e tele. I le faaiʻuga o tausaga, o le a e alu atu ai i le laueleele+ o tagata na toe faafoʻisia mai i le faatamaʻiaina i le pelu, ua faapotopotoina faatasi mai i le tele o atunuu,+ i luga o mauga o Isaraelu, lea na faatafunaina mo se taimi umi. O tagata o lenei laueleele, na aumaia mai i atunuu, ma o loo nonofo ai ma le saogalemu i latou uma.+
9 E mautinoa o le a e alu aʻe. O le a e sau e pei o se matagi malosi.+ E pei oe o ao e ufitia ai le laueleele,+ o oe ma au ʻautau uma ma le toʻatele o tagata faatasi ma oe.”’
10 “O le fetalaiga lenei a le Alii Pule Silisili Ese o Ieova, ‘I lea aso, e tutupu ai manatunatuga i lou loto,+ ma o le a e mafaufau ai e fafau se mea leaga;+
11 o le a e fai ane: “O le a ou alu atu e faasagatau i le laueleele ua iai nuu e lē o puipuia.+ Ou te alu aʻe iā i latou o loo toʻafilemu, ma nonofo ma le saogalemu, o i latou uma ua nonofo e aunoa ma ni pā puipui,+ ma e leai foʻi ni o latou laau faalava ma faitotoʻa.”
12 E te manatu e ave le tele o le vete+ ma faoa le tele o mea, ma sii aʻe lou lima e faasagatau i nofoaga sa faatafunaina ae ua toe ʻaināina,+ ma faasagatau i tagata ua toe aoaoina mai i nuu,+ o ē ua tele o latou tamaoaiga ma oloa,+ o i latou o loo nonofo i le ogatotonu+ o le lalolagi.
13 “‘O le a fai atu iā te oe o Seepa,+ o Titana,+ o faatauʻoa o Tasesa+ ma ona leona+ taanoa uma: “Po ua e sau ea e ave le tele o le vete? Pe ina ia faoa le tele o mea ua e faapotopoto ai ou faapotopotoga e toʻatele, ina ia ave siliva ma auro, ma ave foʻi ʻoa ma oloa, ina ia maua ai le vete tele?”’
14 “O lea, le atalii e o le tagata, ia e faia valoaga ma ia e faapea atu iā Koku, ‘O le fetalaiga lenei a le Alii Pule Silisili Ese o Ieova: “O lea aso, pe a nonofo ma le saogalemu loʻu nuu o Isaraelu, pe e te lē mātauina ea lea mea?+
15 O le a e sau mai i lou nofoaga, mai i vaega mamao o le itu i mātū,+ o oe ma le toʻatele o tagata faatasi ma oe, o loo tiʻetiʻe i latou uma i solofanua, o se faapotopotoga e toʻatele, o se ʻautau e toʻatele lava.+
16 O le mea moni, e te alu atu e faasagatau i loʻu nuu o Isaraelu e pei o ao e ufitia ai le laueleele.+ O le a tupu i le faaiʻuga o aso, loʻu aumaia o oe e faasagatau atu i loʻu laueleele,+ ina ia iloa ai aʻu e nuu pe a ou faapaiaina aʻu lava e ala iā te oe Koku e, i o latou luma.”’+
17 “O le fetalaiga lenei a le Alii Pule Silisili Ese o Ieova, ‘Pe e lē o oe+ ea lea na ou fai atu ai i aso ua mavae e ala i aʻu auauna le ʻau perofeta o Isaraelu, o ē na valoia i na aso mai i lea tausaga ma lea tausaga, ou te aumaia lava oe e faasagatau iā i latou?’+
18 “‘O le mea lenā e tupu i lea aso, i le aso o le a sau ai Koku i le eleele o Isaraelu,’ ua fetalai mai ai le Alii Pule Silisili Ese o Ieova, ‘o le a iloa ai loʻu ita tele i oʻu foliga.*+
19 O loʻu maelega+ tele ma le afi o loʻu ita tele, ou te tautala atu ai.+ E matuā lūlūina lava le eleele o Isaraelu i lea aso.+
20 O aʻu foʻi e gatete ai iʻa o le sami, o manufelelei o le lagi, o manufeʻai o le fanua, o manu fetolofi uma o loo fetolofi i le eleele ma tagata uma lava o loo nonofo i le laueleele,+ e mafuli i lalo mauga ma solofa foʻi tofē,+ e soloia foʻi pā uma i le eleele.’
21 “‘Ou te valaau atu i le pelu i oʻu vaega maugā uma e faasagatau atu iā te ia,’ ua fetalai mai ai le Alii Pule Silisili Ese o Ieova.+ ‘E taʻitoʻatasi ma faasagatau lana pelu i lona lava uso.+
22 Ou te faaoo laʻu faamasinoga+ iā te ia e ala i faamaʻi+ ma le toto;+ ou te faatotō ifo foʻi timuga tetele ma uatoʻa,+ o le afi+ ma le teiō* i luga iā te ia ma ana ʻautau ma tagata e toʻatele e faatasi ma ia.+
23 O le a ou faasilisilia aʻu ma faapaiaina aʻu,+ e iloa ai foʻi aʻu i luma o le tele o atunuu; ma o le a latou iloa ai o aʻu lava o Ieova.’+
Faamatalaga Pito i Lalo
^ I le gagana Eperu, “o le a alu aʻe loʻu ita i loʻu isu.”
^ O le elemeni samasama e faigofie ona mū e iai sona manogi malosi. O le upu Peretania o le sulphur.
