Esekielu 8:1-18
8 Ua oo i le tausaga lona ono, i le masina lona ono, i le aso lima o le masina, ua ou nofo ai i loʻu fale, ua nonofo foʻi toeaina o Iuta i oʻu luma,+ ma ua oo mai ai le aao o le Alii Pule Silisili Ese o Ieova i oʻu luga.+
2 Ona ou vaai ai lea, faauta! o se mea e foliga e pei o se afi;+ mai i le mea e foliga mai o ona puimanava e agaʻi i lalo ua iai le afi,+ ma e mai i ona puimanava e agaʻi i luga, ua iai se mea ua pupula e pei o le iila o le auro ua fefiloi ma le siliva.+
3 Ua ia tuu mai se mea e pei o se lima+ ma tago mai i se vaega o loʻu lauulu, ma ua aveina aʻe aʻu e le agaga+ i le va o le lalolagi ma le lagi ma avatu aʻu i Ierusalema i faaaliga mai i le Atua,+ i le mea e ulufale atu ai i le faitotoʻa o le pā+ pito i totonu lea e faasaga i le itu i mātū, o le mea ua iai le faatusa o le fuā lea e tupu ai le fuā o le Atua.+
4 O lea foʻi, ua iai i inā le mamalu o le Atua o Isaraelu,+ e pei o le vaaiga na ou vaaia i le vanu laugatasi.
5 Ua ia fetalai mai iā te aʻu: “Faamolemole, le atalii e o le tagata, inā tepa aʻe ia ou mata i le itu i mātū.” Ona tepa aʻe lea o oʻu mata i le itu i mātū, ua iai le faatusa o le fuā i le mea e ulufale atu ai o le faitotoʻa o le pā o le fata faitaulaga, i le itu i mātū.+
6 Ua ia toe fetalai mai iā te aʻu: “Le atalii e o le tagata, po ua e vaai atu ea i mea e sili ona inosia o loo latou faia,+ o mea ua faia e le aiga o Isaraelu ina ia ou faamamao ese ai mai i loʻu malumalu?+ Ae o le a e toe vaai atu i mea e sili ona inosia.”
7 Ua ia aumaia aʻu i le mea e ulu atu ai i le lotoā, ona ou vaai atu lea, faauta foʻi! o se pu i le pā.
8 Ua ia fetalai mai iā te aʻu: “Faamolemole, le atalii e o le tagata, inā eli ia i le pā.”+ Ona faasolosolo lea ona ou elia o le pā, ma tagaʻi foʻi! ua iai se mea e ulufale atu ai.
9 Ua ia toe fetalai mai iā te aʻu: “Ia e ulu atu i totonu ma e vaai i mea inosia o loo latou faia i inā.”+
10 Ona ou ulu atu lea i totonu ma ou vaaia ai, faauta! ua vaneina i autafa o le pā ata+ o mea fetolofi ma manu inosia uma,+ ma tupua inosia uma a le aiga o Isaraelu,+ ua vaneina e soo uma ai le pā.
11 O loo tutū i luma o ia mea toeaina e toʻafitu sefulu+ o le aiga o Isaraelu, ma o loo tū ai foʻi Iaasenaia le atalii o Safana+ i totonu iā i latou, e taʻitoʻatasi ma lana ipu i lona lima e faamū ai mea manogi, ma o loo alu aʻe le asu manogi lelei mai i le mea manogi o loo mū.+
12 Ua ia fetalai mai iā te aʻu: “Le atalii e o le tagata, po ua e vaai atu i mea o loo faia e toeaina o le aiga o Isaraelu i le pōuliuli,+ ua taʻitasi ma alu i le potu pito i totonu ua iai ana tupua ua tā? Auā ua latou faapea ane, ‘E lē o silasila mai Ieova iā i tatou.+ Ua tuua e Ieova le atunuu.’”
13 Ua ia toe fetalai mai iā te aʻu: “O le a e toe vaai foʻi i mea e sili ona inosia o loo latou faia.”+
14 Ona ia ave lea o aʻu i le mea e ulu atu ai i le faitotoʻa o le pā o le fale o Ieova, lea o loo i le itu i mātū, faauta! o loo nonofo ai fafine ma ua fetagisi ona o le atua o Tamusa.
15 Ua ia toe fetalai mai iā te aʻu: “Le atalii e o le tagata, po ua e vaai ea i lea mea? O le a e toe vaai i mea e sili atu ona inosia+ nai lo o ia mea.”
16 Ona ia ave lea o aʻu i le lotoā pito i totonu o le fale o Ieova,+ tagaʻi foʻi! i le mea e ulu atu ai o le malumalu o Ieova, i le va o le faapaologa ma le fata faitaulaga,+ ua iai ni tamāloloa pe ā ma le toʻalua sefulu lima,+ ua ū o latou tua i le malumalu o Ieova,+ ae e faasaga o latou mata i le itu i sasaʻe ma ua latou ifo atu i le lā i le itu i sasaʻe.+
17 Ona ia toe fetalai mai lea iā te aʻu: “Le atalii e o le tagata, po ua e vaai ea i lea mea? Po o se mea māmā ea i le aiga o Iuta le faia o ia mea inosia ua latou faia i inei, ua latou faatumuina ai le atunuu i sauāga+ ma faatigā ai loʻu loto, ma ua latou tuu mai le lālā laau* i loʻu isu?
18 O le a ou gaoioi ma loʻu ita tele.+ Ou te lē faapelepele iā i latou, pe alofa mutimutivale i ai.+ O le a latou alalaga leotetele mai i oʻu taliga, ae ou te lē faalogo atu lava iā i latou.”+
Faamatalaga Pito i Lalo
^ E lē taumatea na faaaogāina i tapuaʻiga i tupua.
