Esera 7:1-28
7 Ua mavae ia mea i le nofoaiga a Aretaseta+ le tupu o Peresia, na alu aʻe ai mai i Papelonia o Esera+ le atalii o Seraia,+ o le atalii o Asaraia, o le atalii o Hilikia,+
2 o le atalii o Saluma,+ o le atalii o Satoka, o le atalii o Akitopo,+
3 o le atalii o Amaria,+ o le atalii o Asaraia,+ o le atalii o Meraiota,+
4 o le atalii o Serakia,+ o le atalii o Usi,+ o le atalii o Puki,+
5 o le atalii o Apisua,+ o le atalii o Fineaso,+ o le atalii o Eleasaro,+ ma o le atalii o Arona+ le faitaulaga sili+—
6 o Esera foʻi o se tusiupu+ tomai o le tulafono a Mose,+ na tuuina mai e Ieova le Atua o Isaraelu, ma ua tuuina mai e le tupu o mea uma na ia talosaga+ atu ai, e tusa ma le aao o Ieova lona Atua sa i luga iā te ia.
7 Mulimuli ane, i le tausaga lona fitu o le nofoaiga a le tupu o Aretaseta,+ na ō aʻe ai i Ierusalema nisi o le fanauga a Isaraelu, o le ʻauositaulaga,+ o le ʻau sa Levī,+ o tagata pepese,+ o leoleo faitotoʻa,+ ma le ʻau Netini.+
8 Ona sau lea o ia i Ierusalema i le masina lona lima, o le tausaga lona fitu lea o le nofoaiga a le tupu.
9 Auā o le aso muamua o le uluaʻi masina na filifili ai o ia e alu ese mai i Papelonia, ma o le aso muamua o le masina lona lima na oo atu ai o ia i Ierusalema, e tusa ai ma le aao agalelei o lona Atua sa iā te ia.+
10 Ua saunia+ foʻi e Esera lona loto e saʻili atu i le tulafono a Ieova+ ma faia,+ ma aʻoaʻo+ atu i Isaraelu tulafono+ ma faamasinogatonu.+
11 O le kopi lenei o le tusi na avatu e Aretaseta le Tupu iā Esera le ositaulaga le tusiupu,+ o le tusiupu o upu o poloaʻiga ma tulafono a Ieova iā Isaraelu:
12 “O Aretaseta,+ le tupu o tupu,+ iā Esera le ositaulaga, o le tusiupu o le tulafono a le Atua o le lagi:+ Ia atoatoa lou filemu.+ O lenei,
13 ua ou avatu le faatonuga+ iā i latou uma o le nuu o Isaraelu o loo i loʻu malo,+ o o latou ositaulaga ma le ʻau sa Levī, o i latou uma o loo naunau e fia ō i Ierusalema, ia latou ō faatasi ma oe.+
14 Talu ai ua auina atu se faatonuga mai i luma o le tupu ma ana faufautua+ e toʻafitu, ina ia suʻesuʻe+ le tulaga o Iuta ma Ierusalema e tusa ai ma le tulafono+ a lou Atua+ ua i lou lima,
15 ma ave siliva ma auro na foaʻi+ mai ma le loto e le tupu ma ana faufautua mo le Atua o Isaraelu, o lē e afio i Ierusalema,+
16 faatasi ma siliva uma ma auro na e maua i le itumalo o Papelonia, faapea ma meaalofa tauofo a le nuu+ ma ositaulaga o ē na foaʻi atu i le fale o lo latou Atua,+ o loo i Ierusalema;
17 ia vave ona e faatauina mai i lenei tupe o povi poʻa,+ o mamoe poʻa,+ o tamaʻi mamoe,+ o a latou taulaga i meaʻai,+ ma a latou taulaga i meainu,+ ona e ofoina atu ai lea i luga o le fata faitaulaga o le fale o lo outou Atua+ o loo i Ierusalema.+
18 “O mea uma e lelei iā te oe ma ou uso e fai i siliva ma auro+ ua totoe, ia outou faia+ e tusa ai ma le finagalo+ o lo outou Atua.
19 O ipu+ foʻi ua avatu iā te oe mo le auaunaga i le fale o lou Atua, ia avatu uma i Ierusalema+ i luma o le Atua.
20 A o isi mea uma e manaʻomia o le fale o lou Atua e tatau ona e avatu, ia e avatua ia mai i le fale e teu ai oloa+ a le tupu.
21 “O aʻu o le tupu o Aretaseta, ua ou tuuina atu le faatonuga+ i teutupe+ uma i tala atu o le Vaitafe,+ o mea uma lava na talosaga mai ai Esera+ le ositaulaga, o le tusiupu o le tulafono a le Atua o le lagi, ia outou faia loa,
22 e oo lava i le selau taleni+ o siliva, o le selau kori+ o saito, o le selau paita+ o uaina,+ o le selau paita o suāuu,+ ma masima+ e matuā tele lava.
23 Ia faia ma le maelega+ mea uma ua faatonu+ mai e le Atua o le lagi, mo le fale o le Atua o le lagi,+ ina ia lē oo mai ai le toʻatamaʻi i le malo o le tupu ma ona atalii.+
24 Ua faailoa atu foʻi iā te outou, e faasā ona tāpā ni lafoga, po o ni tupe mo le malo,+ po o ni lafoga o auala+ mai i le ʻauositaulaga,+ o le ʻau sa Levī,+ o tagata pepese,+ o leoleo faitotoʻa,+ o le ʻau Netini,+ ma ē e galulue i le fale o le Atua.
25 “A o oe Esera, e tusa ma le atamai+ ua foaʻi mai e le Atua iā te oe, ia e tofia ni faamasino lagolago ma faamasino, ina ia latou faamasinoina+ pea le nuu uma o loo i tala atu o le Vaitafe, e oo lava iā i latou uma ua iloa tulafono a lou Atua; ma o se tasi e na te lē iloa tulafono, ia outou aʻoaʻo+ atu iā i latou.
26 O tagata uma foʻi e lē faia le tulafono a lou Atua+ ma le tulafono a le tupu, ia vave faaoo i ai le faasalaga iā te ia, a lē o le oti,+ o le faateʻaese,+ pe sala tupe,+ pe faafalepuipui foʻi.”
27 Ia viia Ieova le Atua o o tatou augātamā,+ o lē ua tuuina lenei mea i le loto+ o le tupu, ina ia faamatagofie+ le fale o Ieova o loo i Ierusalema!
28 Ua alofa faamaoni+ mai o ia iā te aʻu i luma o le tupu ma ana faufautua,+ ma luma o perenise malolosi uma a le tupu. O aʻu foʻi, ou te faamalosia aʻu e tusa ma le aao+ o Ieova loʻu Atua o loo iā te aʻu, ua ou faapotopotoina ai mai i Isaraelu o ulu o aiga e matou te ō aʻe faatasi.
