Eseta 4:1-17
4 Ua iloa e Moretekai+ mea uma ua faia;+ ona saeia ai lea e Moretekai o ona ofu, ua ofu i le ʻie talatala+ ma asu aʻe le lefulefu+ i ona luga, ua alu atu foʻi i totonu o le aai ma ua tagi leotele, ma ua tagi masūsū.+
2 Mulimuli ane, ua oo atu o ia i luma o le faitotoʻa o le tupu,+ auā e leai se tasi e mafai ona ulu atu i le faitotoʻa o le tupu a o ofu i le ʻie talatala.
3 I itumalo eseese uma,+ i mea uma na oo atu i ai le upu a le tupu ma lana tulafono, sa faanoanoa tele+ ai tagata Iutaia, na anapopogi,+ fetagisi, ma tagiauē. Ua latou fofola ʻie talatala+ ma faasalalau atu le lefulefu,+ ma ua taooto ai i luga le toʻatele.
4 Ua ō atu auauna teine a Eseta ma ana eunuka+ ma taʻu atu iā te ia. Ona matuā tigā ai lea o le masiofo. Ua ia avatu foʻi ni ofu e ofu ai Moretekai, ma aveese lona ʻie talatala mai iā te ia. A ua lē taliaina e ia.+
5 Ona valaau atu lea o Eseta iā Hatako,+ o se tasi o eunuka a le tupu, o lē na ia tofia e auauna iā Eseta, ona ia avatu lea o le poloaʻi iā te ia e faatatau iā Moretekai, ina ia iloa ai le uiga o lenei mea ma le mea ua tupu.
6 Ona alu atu lea o Hatako iā Moretekai i le nofoaga faitele o le aai, sa i luma o le faitotoʻa o le tupu.
7 Ona taʻu atu lea e Moretekai iā te ia o mea uma ua oo iā te ia,+ ma le aofaʻiga patino o le tupe na fai atu ai Hamanu e na te totogi atu i mea e teu ai oloa a le tupu,+ ina ia faaumatia ai tagata Iutaia.+
8 Na ia aumaia foʻi iā te ia le kopi+ o le tusi o le tulafono, lea na avatu mai i Susana+ ina ia faaumatia i latou, e faaali atu iā Eseta ma taʻu atu iā te ia, ma poloaʻia o ia+ e alu atu i le tupu e ʻaiʻoi i ai ina ia alofagia o ia,+ ma talosaga atu i ona luma mo lona nuu.+
9 Ona sau lea o Hatako+ ma taʻu mai iā Eseta o upu a Moretekai.
10 Ua fai atu Eseta iā Hatako, ma poloaʻi atu iā te ia e fai atu iā Moretekai:+
11 “Ua iloa e auauna uma a le tupu ma tagata o itumalo a le tupu e faapea, o se tane po o se fafine e alu atu i le tupu i le lotoā i totonu+ ae e leʻi valaaulia o ia, e tasi lava lana tulafono+ o le fasiotia lea o ia; seʻi vaganā ai ua faaloaloa mai e le tupu lona tootoo auro iā te ia, ona faaolaina ai lea o ia.+ A o lenei, e leʻi valaaulia aʻu ou te alu atu i le tupu mo aso e tolu sefulu.”
12 Ona latou taʻu atu lea iā Moretekai o upu a Eseta.
13 Ua fai mai Moretekai e tali atu ai iā Eseta: “Aua neʻi e manatu i lou loto e na o oe e faasaoina mai i isi tagata Iutaia uma, ona ua e iai i le aiga o le tupu.+
14 Auā afai e te lē tautala atu i lenei taimi, e maua mai lava le fesoasoani ma le faaolataga mo tagata Iutaia mai i se isi mea;+ a o oe ma le aiga o lou tamā, o le a faafanoina outou. O ai foʻi na iloa pe e lē o le mea lea na ala ai ona fai oe ma masiofo?”+
15 Ona fai atu lea o Eseta e tali atu ai iā Moretekai:
16 “Inā alu ia ma faapotopoto tagata Iutaia uma o loo i Susana,+ ma anapopogi+ ona o aʻu, aua foʻi neʻi aai pe feinu mo aso e tolu,+ i le pō ma le ao. O aʻu foʻi ma aʻu auauna teine,+ e faapena ona matou anapopogi, ona ou alu atu ai lea i le tupu, o le mea e lē tusa ai ma le tulafono; ma afai ou te oti ai,+ ia oti ai pea.”
17 Ona alu atu ai lea o Moretekai ma faia e tusa ma mea uma na poloaʻi atu ai Eseta iā te ia.
