Esoto 10:1-29
10 Ua fetalai mai Ieova iā Mose: “Ia e alu iā Farao, auā o aʻu, ua ou tuu pea lona loto, ma loto o ana auauna e faamaaaina,+ ina ia ou tuuina atu aʻu nei faailoga i ona luma,+
2 ina ia e folafola atu ma faalogo i ai lou atalii, ma le atalii o lou atalii, i loʻu faapuapuagatiaina o Aikupito ma aʻu faailoga na ou faia iā i latou;+ ma e tou te iloa ai lava o aʻu o Ieova.”+
3 Ona ō atu lea o Mose ma Arona iā Farao ma faapea atu iā te ia: “O le mea lenei ua fetalai mai ai Ieova o le Atua o tagata Eperu, ‘O le ā le umi e te musu ai e gauaʻi mai iā te aʻu?+ Ia e tuu mai loʻu nuu e ō ina ia latou auauna mai iā te aʻu.
4 Auā afai e te faaauau pea ona lē tuuina mai loʻu nuu e ō, o le a ou aumaia sē akerise i ou laufanua a taeao.+
5 O le a ufitia ai le fogāeleele atoa, ma e lē taitai ona iloa atu le laueleele; e ʻaina e nei sē mea uma ua totoe, o mea ia ua iā te outou e leʻi faaleagaina e le uatoʻa, ma e ʻaina foʻi e nei sē o o outou laau uma o loo ola i le laufanua.+
6 E tutumu ai foʻi ou fale, o fale o au auauna ma fale uma o Aikupito, i le tele e leʻi iloa muamua e ou tamā ma tamā o ou tamā, talu mai ona latou soifua i le lalolagi seʻia oo mai i le asō.’”+ Ona ia liliu lea ma alu ese mai iā Farao.+
7 Ua mavae lea, ona fai mai lea o auauna a Farao iā te ia: “O le ā le umi e avea ai lenei tagata ma mailei iā i tatou?+ Ia tuu atu tagata e ō ina ia latou auauna iā Ieova lo latou Atua. Pe e te leʻi silafia ea ua faatamaʻia Aikupito?”+
8 Ona toe aami lea e Farao o Mose ma Arona ma ua ia faapea mai iā i laʻua: “Ia outou ō ma auauna iā Ieova lo outou Atua.+ O ai tonu lava e ō?”
9 Ua tali atu Mose: “E matou te ō ma o matou tagata talavou ma tagata matutua. E matou te ō+ foʻi ma o matou atalii ma afafine,+ o a matou mamoe ma povi, auā matou te faia se tausamiga iā Ieova.”+
10 Ua ia fai mai iā i laʻua: “Ia faapea ona iai Ieova iā te outou, pe afai ou te tuuina atu outou e ō+ ma a outou fanau! E leai, e manino mai o loo outou fuafuaina se mea leaga.+
11 E leai lava! Ia ō outou o tane matutua ma auauna iā Ieova, auā o le mea lenā ua outou mananaʻo e faataunuu.” Ona tuliese lea o i laʻua mai i luma o Farao.+
12 Ona fetalai mai lea o Ieova iā Mose: “Ia faaloaloa+ lou lima i luga o le laueleele o Aikupito, ina ia ō mai ai i luga sē akerise i le laueleele o Aikupito, ma ʻai laau uma o le fanua, o mea uma ua totoe mai i le uatoʻa.”+
13 Ona faaloaloa loa lea e Mose o lona tootoo i luga o le laueleele o Aikupito, ma ua faapogaia e Ieova se matagi mai i sasaʻe+ e agi mai i luga o le laueleele i lea aso atoa ma le pō atoa. Ua oo i le taeao ona aumaia lea e le matagi mai i sasaʻe o sē akerise.
14 Ua lolofi mai sē akerise i le laueleele atoa o Aikupito, ma nonofo i le atunuu atoa o Aikupito.+ Ua fai ma faafitauli tugā nei sē akerise.+ E leʻi iai lava muamua ni sē akerise e tusa ma ia sē akerise, ma o le a lē toe oo mai faapea i se taimi i le lumanaʻi.
15 Ua ufitia uma ai le fogāeleele atoa,+ ma ua pogisa ai le atunuu;+ ua ʻai e nei sē akerise laau uma o le fanua ma fua uma o laau ia na totoe mai i le uatoʻa;+ ua lē toe iai ni mea lanu meamata i laau po o vao o le fanua i le atunuu atoa o Aikupito.+
16 Ua aami faavave e Farao o Mose ma Arona ma faapea mai: “Ua ou agasala iā Ieova lo outou Atua ma outou foʻi.+
17 O lea, faamolemole, ia faamagalo+ laʻu agasala i lenei taimi, ma ia ʻaiʻoi+ atu iā Ieova lo outou Atua ina ia aveese lenei mala mataʻutia mai i oʻu luga.”
18 Ua alu ese o ia mai iā Farao ma ʻaiʻoi atu iā Ieova.+
19 Ona suia lea e Ieova o le matagi ina ia agi malosi mai i sisifo, ma ua aveese ai sē akerise ma avatu i le Sami Ulaula. E augapiu ma se sē akerise na totoe i le atunuu atoa o Aikupito.
20 Peitaʻi, ua tuu pea e Ieova Farao e faamaaa i lona loto,+ ma e na te leʻi tuuina mai le fanauga a Isaraelu e ō.
21 Ua fetalai mai Ieova iā Mose: “Ia faaloaloa lou lima i le lagi,+ ina ia pogisa ai le atunuu o Aikupito, e matuā pogisa lava.”
22 Ua faaloaloa e Mose lona lima i le lagi, ona matuā pogisa ai lea o le atunuu atoa o Aikupito mo aso e tolu.+
23 Ua lē mafai ona vaai atu le tasi i le isi, ma e leai ma se tasi ua alu ese mai i lona fale i aso e tolu; ae ua malamalama pea le mea o loo nonofo ai tagata Isaraelu.+
24 Ua mavae lea, ona aami lea e Farao o Mose ma fai mai: “Ia outou ō e auauna iā Ieova.+ E na o a outou mamoe ma povi o le a tuua pea i inei. E mafai ona outou ō ma a outou fanau.”+
25 A ua fai atu Mose: “E leai se mea faapena, e ao ona e tuu mai i matou e ave a matou manu e fai ai taulaga ma taulaga mū, auā e ao ona matou faia taulaga iā Ieova lo matou Atua.+
26 E matou te ave foʻi a matou lafumanu.+ E lē tuua se manu e tasi, auā e manaʻomia mai i ia manu ni manu e fai ai la matou tapuaʻiga iā Ieova lo matou Atua,+ ma e matou te lē iloa po o ā mea matou te fai taulaga ai i le tapuaʻiga iā Ieova seʻiloga ua matou taunuu i ō.”+
27 O lea foʻi, ua tuu ai pea e Ieova Farao e faamaaa i lona loto, ma e leʻi lotomalie o ia e tuuina mai i latou e ō.+
28 Ona fai mai lea o Farao iā te ia: “Ia alu ese loa mai iā te aʻu!+ Ia e faaeteete! Aua e te toe taumafai e vaai mai iā te aʻu, auā o le aso e te vaai ai iā te aʻu o le a e oti ai.”+
29 Ua tali atu Mose: “Ua lelei pe afai o lau saunoaga lenā. Ou te lē toe taumafai e vaai oe.”+
