Esoto 11:1-10
11 Ona fetalai mai lea o Ieova iā Mose: “E toe tasi le mala ou te faaoo atu i luga o Farao ma Aikupito. Pe a mavae lenā ona ia tuuina mai lea o outou e ō ese mai i inei.+ I lea taimi na te tuu atu ai outou e ō ma a outou mea uma, o le a ia matuā tuliesea outou mai i lenei mea.+
2 Ia e tautala atu ina ia faalogo i ai tagata, e ao i tane taʻitasi uma ona talosaga atu i lona tuaoi, ma fafine taʻitasi uma ona talosaga atu i lona tuaoi i mea siliva ma mea auro.”+
3 Ua faapogaia e Ieova tagata Aikupito ina ia fiafia i le nuu.+ Ua mamalu tele foʻi Mose i le atunuu o Aikupito, i le vaaiga a auauna a Farao ma le vaaiga a tagata.+
4 Ua faapea atu Mose: “O le mea lenei ua fetalai mai ai Ieova, ‘E tusa o le vaeluapō, ou te alu atu ai i Aikupito,+
5 ma o le a feoti ulumatua+ uma i le atunuu o Aikupito, e amata mai i le ulumatua a Farao, o lē o loo nofo i lona nofoālii, seʻia oo i le ulumatua a le auauna teine, o lē o loo galue i le mea e olo ai saito, ma ulumatua uma a manu.+
6 O le a iai le tagiauē i le atunuu atoa o Aikupito, e leʻi faapea lava ona tupu ai muamua, ma o le a lē toe tupu foʻi i le lumanaʻi.+
7 Peitaʻi, e lē taitai ona ōu se taʻifau i so o se tagata Isaraelu, e mai i tagata e oo foʻi i manu;+ ina ia outou iloa ai e mafai e Ieova ona faaeseese tagata Aikupito ma tagata Isaraelu.’+
8 E ō ifo foʻi au auauna uma lava iā te aʻu ma tootutuli ma ifo i le eleele i oʻu luma,+ ma faapea mai, ‘Ia e alu, o oe atoa ma tagata uma lava e usiusitaʻi iā te oe.’ A mavae nei mea, ona ou alu ai lea.” Ona alu ese lea o ia ma le ita tele mai i luma o Farao.
9 Ua fetalai mai Ieova iā Mose: “E lē faalogo Farao iā te oulua,+ ina ia faateleina ai aʻu vavega i le atunuu o Aikupito.”+
10 Na faia e Mose ma Arona nei vavega uma lava i luma o Farao;+ ae ua tuu pea e Ieova Farao e faamaaa i lona loto, ma na te leʻi faatagaina le fanauga a Isaraelu e ō ese mai i lona atunuu.+
