Esoto 12:1-51
12 Ua fetalai mai Ieova iā Mose ma Arona i le atunuu o Aikupito:
2 “E avea lenei masina iā te outou ma uluaʻi masina. O le masina muamua lava lea o le tausaga iā te outou.+
3 Ia fai atu i le faapotopotoga uma o Isaraelu, ‘I le aso lona sefulu o lenei masina, ia taʻitasi aiga mai i le ʻauaiga ona aumai se tamaʻi mamoe,+ o le aiga ma le tamaʻi mamoe.
4 Ae afai e toʻaitiiti le aiga e lē uma sa latou tamaʻi mamoe, ona ia faasoa atu lea i lona tuaoi e lata ane ua sau i lona fale e tusa ma le faitau aofaʻi o tagata; ia vaevae le tamaʻi mamoe e tusa ma le aofaʻiga o tagata e aai ai.
5 E tatau ona matuā lelei+ la outou manu poʻa, e tasi le tausaga le matua.+ Ia outou filifilia mai se tamaʻi mamoe poʻa po o se tamaʻi ʻoti.
6 Ia tausia ai pea seʻia oo i le aso lona sefulu fā o lenei masina,+ ona fasia lea o ia manu e le faapotopotoga atoa o Isaraelu i le afiafipō.*+
7 Ia latou ave le toto ma sausau i pou e lua o le faitotoʻa, ma pou faalava i luga o le mea e ulufale atu ai, i fale ia latou te aai ai i le manu.+
8 “‘E ao ona latou aai i le aano o manu i lea pō.+ E tatau foʻi ona tunu i le afi, faatasi ma falaoa e lē faafefeteina+ ma fualaau ʻaina oona.+
9 Aua neʻi ʻaina mata pe faapuna, pe saka i le vai, ae ia tunu i le afi, o lona ulu, o ona vae* atoa ma ona totoga.
10 E lē tatau ona outou faatotoe se mea seʻia oo i le taeao, afai o le a iai se mea e totoe i le taeao, ia outou susunu i le afi.+
11 Ia faapea ona outou aai ai, ia fusia o outou puimanava,+ ia see o outou seevae,+ ia uu o outou tootoo i o outou lima; ma ia faavave ona outou aai. O le paseka lea iā Ieova.+
12 Ou te ui ane i le atunuu o Aikupito i lenā pō+ ma taia ulumatua uma o le atunuu o Aikupito, e mai i tagata e oo lava i manu;+ ma ou te faaoo atu faasalaga+ i atua uma o Aikupito. O aʻu o Ieova.+
13 E fai le toto ma faailoga iā te outou i fale o loo outou iai; e ao ona ou vaai i le toto ma sopoloa iā te outou,+ ma e lē oo le mala e fano ai iā te outou, pe a ou taia le atunuu o Aikupito.
14 “‘Ia fai lea aso ma faamanatuga iā te outou, ia outou tausia o se tausamiga iā Ieova i o outou tupulaga o loo mulimuli mai. E ao ona outou tausia pea, auā o se tulafono lea mo outou.
15 E fitu aso tou te aai ai i falaoa e lē faafefeteina. O le aso muamua tou te aveese ai le paluga ua fefete* mai i o outou fale, auā o le a fasiotia so o se tasi i Isaraelu+ e ʻai i se mea ua faafefete, e mai i le aso muamua seʻia oo i le aso lona fitu.+
16 I le aso muamua e tou te faia ai se tauaofiaga paia, ia faia foʻi i le aso lona fitu se tauaofiaga paia.+ E lē faia ai ni galuega i ia aso.+ E pau le mea e tou te faia, o le saunia o meaʻai ia lava mo tagata taʻitoʻatasi.+
17 “‘Ia outou tausi i le tausamiga o falaoa e lē faafefeteina,+ auā o lea aso ou te aumai ai a outou ʻautau mai i le atunuu o Aikupito. Ia outou tausia lenei aso e fai ma tulafono mo se taimi umi, i o outou tupulaga o loo mulimuli mai.
18 O le masina muamua, i le afiafipō o le aso sefulu fā o le masina, e tou te aai ai i le falaoa e lē faafefeteina seʻia oo i le afiafipō o le aso lona lua sefulu tasi o lea masina.+
19 O aso e fitu, aua neʻi maua i o outou fale se paluga ua fefete, auā o so o se tasi e tofo i se mea faafefete, e tusa lava po o ia o se tagata aumau po o se tagatānuu,+ e ao ona fasiotia ma aveese mai i le faapotopotoga o Isaraelu.+
20 E sā ona outou aai i se mea ua faafefeteina. E na o falaoa e lē faafefeteina e tou te aai ai i mea uma tou te nonofo ai.’”
21 Ona aami loa lea e Mose o toeaina o Isaraelu+ ma faapea atu: “Ia outou puʻe ma ave tamaʻi mamoe ma ʻoti* mo o outou aiga ona outou fasia ai lea o ia manu mo le paseka.+
22 Ia outou aumai se fusi lālā isopo+ ma fufui i le toto ua i le tanoa ma sausau i pou faalava i luga o le mea e ulufale atu ai, ma pou e lua o le faitotoʻa, ia aua neʻi ulufafo se isi mai i le faitotoʻa o lona fale seʻia oo i le taeao.
23 Pe a afio ane Ieova e faaoo le malaia i tagata Aikupito ma silafia le toto i luga o pou faalava o le mea e ulufale atu ai, ma pou e lua o le faitotoʻa, ona sopoloa lea o Ieova i lea faitotoʻa ma e na te lē tuu atu ia oo le mala e oti ai i o outou fale.+
24 “Ia outou tausia lenei poloaʻiga,+ o oe ma ou atalii mo se taimi umi lava.+
25 Pe a outou oo i le laueleele o le a foaʻiina mai e Ieova iā te outou, e pei ona ia fetalai mai ai, ia outou tausi i lenei vala o le tapuaʻiga.+
26 Pe a fesili mai o outou atalii iā te outou, ‘O le ā le uiga o lenei vala o le tapuaʻiga iā te outou?’+
27 ona outou tali atu lea, ‘O le taulaga o le paseka iā Ieova,+ o lē na sopoloa i fale o tagata Isaraelu i Aikupito ina ua ia faaoo le malaia i tagata Aikupito, ae faasaoina o tatou aiga.’”
Ona punonou lea o le nuu ma faapaʻuʻū faō.+
28 Ona ō lea o le fanauga a Isaraelu ma fai e pei ona poloaʻi mai ai Ieova iā Mose ma Arona.+ Ua faapea lava ona latou faia.
29 Ua oo i le vaeluaga o le pō, ona taia lea e Ieova o ulumatua uma o le atunuu o Aikupito,+ e mai i le ulumatua a Farao, o lē o loo nofo i le nofoālii, e oo i le ulumatua a le pagota ua i le falepuipui, atoa ma ulumatua a manu.+
30 Ona tulaʻi lea o Farao i le pō, o ia ma ana auauna uma ma isi tagata uma o Aikupito; ua iai le tagiauē tele i tagata Aikupito,+ auā e leai se fale e aunoa ma se tasi ua oti.
31 Ona ia aami+ loa lea o Mose ma Arona i le pō ma faapea atu: “Ia tulaʻi, ma ō ese mai i oʻu tagata, o oulua ma isi o le fanauga a Isaraelu, ma ō e auauna iā Ieova, e pei ona oulua fai mai ai.+
32 Ia ō ma ave a outou lafu mamoe ma lafumanu e pei ona oulua fai mai ai.+ Ia oulua faamanuia mai foʻi iā te aʻu.”
33 Ua tauanau e tagata Aikupito le nuu ia ō ese vave+ mai i le atunuu, “auā,” ua latou faapea ane, “ua pei i tatou o ni tagata ua feoti!”+
34 Ona ave lea e le nuu o a latou paluga e leʻi faafefeteina, ua afīfī foʻi a latou tanoa e palu ai falaoa i o latou ofu, ma amo i o latou tauʻau.
35 Ua faia e le fanauga a Isaraelu e pei o upu a Mose, ua latou talosaga atu i tagata Aikupito i mea siliva, i mea auro ma ofu.+
36 Ua faagaee e Ieova le fiafia i loto o tagata Aikupito+ i le nuu, ona latou avatu lea o mea ua latou talosaga atu ai;+ ma ua latou faamativaina ai tagata Aikupito.+
37 Ona malaga loa lea o le fanauga a Isaraelu mai i Ramese+ e agaʻi i Sukota,+ e toʻaono selau afe tane matutua ua savavali, ae e lē faitaulia ai tamaiti.+
38 Ua ō foʻi faatasi ma i latou le toʻatele o tagata ese,+ atoa ma lafu mamoe, o lafumanu ma le anoanoaʻi o manu eseese.
39 Ua latou tao paluga falaoamata na latou aumaia mai i Aikupito i ni falaoa lapotopoto e lē faafefeteina, auā e leʻi faafefeteina. Ua faia faapea talu ai ua tuliesea i latou mai i Aikupito, ua lē lava se taimi e aoao mai ai nisi meaʻai ma aumai mo i latou.+
40 O le taimi na nonofo ai le fanauga a Isaraelu, o ē na nonofo+ i Aikupito,+ e fā selau tolu sefulu tausaga.+
41 Ua oo i le faaiʻuga o le fā selau tolu sefulu tausaga, i lea lava aso na ō ese mai ai ʻau uma a Ieova mai i le atunuu o Aikupito.+
42 E ao ona faamanatu i lenei pō ina ia faamamaluina ai Ieova mo le aumaia o i latou mai i le atunuu o Aikupito. E ao ona faamanatu i le pō lava lenei ina ia faamamaluina ai Ieova e le fanauga uma a Isaraelu i o latou tupulaga o loo mulimuli mai.+
43 Ua toe fetalai mai Ieova iā Mose ma Arona: “O le tulafono lenei o le paseka:+ E sā ona ʻai ai se tagata mai se isi atunuu.+
44 Ae afai o iai se tane pologa na faatauina mai, ia e peritomeina o ia.+ Ona faatoʻā mafai lea ona ʻai i le paseka.
45 E lē aai ai o lē e aumau ma lē e galue totogi.
46 E tofu le fale ma le tamaʻi mamoe e aai ai. Aua neʻi aveina i fafo mai i le fale le aano o le tamaʻi mamoe ma avatu i se isi mea i fafo. Aua tou te gauia se ponaivi.+
47 E ao ona faamanatuina e le faapotopotoga atoa o Isaraelu lea mea.+
48 Pe afai o aumau se tagata ese iā te oe, ae e manaʻo e faamanatu le paseka iā Ieova, ia peritomeina tane uma ua iā te ia.+ Ona faatoʻā mafai lea ona ia faalatalata ane ma faamanatu le paseka; ma ia avea o ia e pei o se tagatānuu. E sā ona ʻai ai se tagata e leʻi peritomeina.
49 E tasi le tulafono mo tagatānuu ma tagata ese ua aumau iā te outou.”+
50 Ua faia lava e le fanauga a Isaraelu e pei ona poloaʻi mai ai Ieova iā Mose ma Arona. Ua faapea lava ona latou faia.+
51 O lea lava aso, na aveese ai e Ieova le fanauga a Isaraelu faatasi ma a latou ʻau+ mai i le atunuu o Aikupito.
Faamatalaga Pito i Lalo
^ I le gagana Eperu, i “le va o afiafi e lua.” O lona uiga o le va o le goto o le lā ma le pō.
^ E faasino atu i le vaega pito i lalo o le tulivae agaʻi i lalo.
^ O lona uiga o sina vaega o le paluga o falaoa ua faafefete e faaaogā e faafefeteina ai se isi paluga falaoamata telē e lē o iai se fefete.
^ Po o “tamaʻi povi.”
