Esoto 15:1-27
15 Ona pepese lea o Mose ma le fanauga a Isaraelu i lenei pese iā Ieova i nei upu:+“Ou te pese iā Ieova, auā ua matuā faamamaluina o ia.+O le solofanua ma lē ua tiʻetiʻe ai ua ia lafoina i le sami.+
2 O Ioa,*+ o loʻu malosi ma loʻu mana, auā ua avea o ia ma oʻu faaolataga.+O loʻu Atua lea, ou te faaneenee atu iā te ia;+ o le Atua o loʻu tamā,+ ma ou te faasilisilia o ia.+
3 O Ieova o le toa malosi o le taua.+ O Ieova o lona suafa lea.+
4 O kariota o le taua a Farao ma ana ʻautau ua ia lafoina i le sami,+O ana ʻau sili ona lelei ua malelemo i le Sami Ulaula.+
5 Ua fafati mai galu o le sami ma ua ufitia ai i latou;+ ua latou gogoto i le mea loloto e pei o se maa.+
6 Ieova e, ua matuā matagofie le malosi o lou aao taumatau,+Ieova e, ua nutipalaina ai le fili i lou aao taumatau.+
7 O le tele o lou mamalu ua e lafotuina ai i latou o ē e fouvale iā te oe;+Ua e auina atu lou toʻasā tele, e ʻaina ai i latou e pei o tagutugutu o laau.+
8 O le mānava mai i lou fofoga*+ ua faafaupuʻe ai le sami;Ua lē toe gaoioi ai e pei o ni vai ua faaputuina;O galu o le sami sa fafati mai ua toʻa i le ogatotonu o le sami.
9 Na faapea ane le fili, ‘Ou te tuliloa!+ Ou te mauaina!+Ou te vaevaeina mea ua maua mai i mea ua faoa!+ E faamalieina loʻu loto i nei mea!Ou te seʻi aʻe laʻu pelu! Ou te faaumatia i latou i loʻu lima!’+
10 Na feula mai lau mānava,+ ma ua ufitia ai e le sami i latou;+Na malelemo i latou e pei o pulu uʻamea i le sami loloto.+
11 Ieova e, o ai ea se atua e tusa ma oe?+O ai lava sē e tusa ma oe, o lē e silisili ona paia?+O Lē e mataʻu+ i ai ma viia i pesega,+ o Lē e fai mea ofoofogia.+
12 Na e faaloaloa lou aao taumatau,+ ona foloina ai lea o i latou e le laueleele.+
13 O lou alofa faamaoni na e taʻitaʻia ai le nuu na e laveaʻiina;+O lou malosi e te ave ai i latou i le mea paia, e te afio ai.+
14 E faalogo tagata,+ ma latou atuatuvale ai;+E oo le tigā o le a fanau+ i ē o loo nonofo i Filisitia.
15 I lenā taimi e fefefe ai alii pule o Etoma;A o pule sauā o Moapi, e oo iā i latou le gatete.+O tagata uma o Kanana o le a lotovaivai.+
16 E oo iā i latou le mataʻu ma le fefe.+O lou aao malosi e lē gaoioi ai i latou e pei o le maa,Ieova e, seʻia oo ina ui ane lou nuu,+Seʻia ui ane+ le nuu na e faia.+
17 E te avatu i latou ma totō i le mauga ua fai ma ou tofi,+Ieova e, ua e faia se nofoaga tumau e te afio ai,+Ieova e, ua e faatumauina le mea paia+ ua e faia i ou aao.
18 E pule Ieova o se tupu e faavavau, e faavavau lava.+
19 Ina ua ō ane kariota+ o le taua a Farao ma ana ʻautau tiʻetiʻe solofanua i le sami,+Ona toe faafoʻisia lea e Ieova o le sami i luga o i latou,+Ae ua savavali le fanauga a Isaraelu i le eleele mātūtū i le ogatotonu o le sami.”+
20 Ua ave e Miriama, le perofeta fafine, o le tuafafine+ o Arona, le topa* i lona lima;+ ua ō atu foʻi fafine uma faatasi ma ia ma a latou topa, ma ua sisiva.+
21 Ua fetaliaʻi Miriama ma tamāloloa:+
“Ia pepese iā Ieova,+ auā ua matuā faamamaluina o ia.+O le solofanua ma lē ua tiʻetiʻe ai ua ia lafoina i le sami.”+
22 Ona tuua lea e Mose ma Isaraelu o le Sami Ulaula ae malaga atu i le toafa o Sura,+ ua latou malaga mo aso e tolu i le toafa, ae e leʻi maua se vai.+
23 Mulimuli ane, ua oo i latou i Mara,*+ ae ua lē mafai ona latou feinu i le vai o Mara ona e oona. O le mea lea ua ia faaigoa ai lea mea, o Mara.+
24 Ua muimui e le nuu Mose,+ ma ua faapea ane: “O le ā le mea o le a matou feinu ai?”
25 Ona ia alaga atu lea iā Ieova.+ Ua faasino e Ieova o ia i se tamaʻi laau, ua ia togi i totonu o le vai ona magalo ai lea o le vai.+
Ua Ia faavaeina i lea mea se aiāiga ma se mataupu mo faamasinoga, o i inā foʻi ua ia tofotofoina ai lo latou usiusitaʻi.+
26 Ua ia toe fetalai mai: “Afai e te matuā faalogo i le leo o Ieova lou Atua, ma faia le mea tonu i ona luma, ma uaʻi atu ou taliga i ana poloaʻiga,+ ma tausi i ana aiāiga uma, ou te lē tuuina atu iā te oe o faamaʻi ia na ou tuuina i luga o tagata Aikupito;+ auā o aʻu o Ieova o lē e faamālōlōina oe.”+
27 Ua oo i latou i Ailima, i le mea o loo iai vaipuna e sefulu lua ma laau o pama e fitu sefulu.+ Ona latou faatutū ai lea o o latou faleʻie i tala ane o le vai.
Faamatalaga Pito i Lalo
^ O le uluaʻi taimi lea ua taʻua ai le suafa o “Ioa.” O le faapuupuuga o le suafa o “Ieova,” o le vaega muamua o mataʻitusi e fā i le gagana Eperu JHVH. Tagaʻi i le Faaopoopoga e 1.
^ I le gagana Eperu, o le “isu.”
^ O se meafaifaaili e tagitagi.
^ O lona uiga e “Oona.”
