Esoto 18:1-27
18 Ua faalogo Ietero le ositaulaga o Mitiana, le tamā o le avā+ a Mose, e uiga i mea uma na faia e le Atua iā Mose ma lona nuu o Isaraelu, ma le laveaʻiina e Ieova o Isaraelu mai i Aikupito.+
2 Ua ave e Ietero le tamā o le avā a Mose, o Sepora le avā a Mose, o lē na toe faafoʻi mai e Mose,
3 ma lana fanau tama e toʻalua,+ o le igoa o le tasi o Keresoma,+ e pei ona ia faapea mai, “auā ua ou aumau i le nuu ese”;
4 a o le igoa o le isi o Elisara,*+ e pei ona ia fai mai, “auā o le Atua o loʻu tamā, o loʻu fesoasoani lea auā na ia laveaʻiina aʻu mai i le pelu a Farao.”+
5 Ona ō atu lea o Ietero, le tamā o le avā a Mose, o ona atalii ma lana avā i le toafa i le mea ua iai le faleʻie o Mose, o le mea ua iai le mauga o le Atua moni.+
6 Ua ia avatu le feʻau iā Mose: “O aʻu o Ietero,+ le tamā o lau avā, ua ou sau iā te oe faatasi ma lau avā ma lana fanau tama e toʻalua.”
7 Ona alu atu loa lea o Mose e faafeiloaʻi le tamā o lana avā, ua ifo i le eleele ma sogi atu iā te ia;+ ua fesili le tasi i le isi po o ā mai. Ua mavae lea, ona ō ane ai lea i le faleʻie.
8 Ua faamatala atu e Mose i le tamā o lana avā mea uma na faia e Ieova iā Farao ma Aikupito ona o tagata Isaraelu,+ ma faafitauli uma na oo iā i latou i le malaga,+ ae na laveaʻiina e Ieova i latou.+
9 Ua fiafia Ietero ona o mea lelei uma na faia e Ieova mo Isaraelu, na ia laveaʻiina i latou mai i le lima o Aikupito.+
10 Ona fai mai lea o Ietero: “Ia faamamaluina Ieova, o lē na laveaʻiina outou mai i le lima o Aikupito ma le lima o Farao, o lē na laveaʻiina le nuu mai i le lima o Aikupito.+
11 Ua ou iloa nei e silisili Ieova nai lo o isi atua uma,+ ona o le mea na latou gaoioi ai ma le faamaualuluga iā i latou.”
12 Ua aumaia e Ietero, le tamā o le avā a Mose se taulaga mū ma taulaga e ofoina atu i le Atua;+ ona ō ane lea o Arona ma toeaina o Isaraelu uma, ua aai i falaoa faatasi ma le tamā o le avā a Mose i luma o le Atua moni.+
13 Ua oo i le aso na sosoo ai, ona nofo lea o Mose e pei ona masani ai e fai ma faamasino mo le nuu,+ ua gasolo mai pea le nuu ma tutū i luma o Mose mai i le taeao seʻia oo i le afiafi.
14 Ua vaaia e le tamā o le avā a Mose mea uma ua ia faia mo le nuu. Ona fai mai ai lea o ia: “O le ā lenei mea ua e faia mo le nuu? Aiseā ua e faia toʻatasi ai a o gasolo mai pea le nuu ma tutū i ou luma, mai i le taeao seʻia oo i le afiafi?”
15 A ua fai atu Mose i le tamā o lana avā: “Ona e ō mai pea le nuu iā te aʻu ina ia fesili atu i le Atua.+
16 Pe a tulaʻi mai se mataupu iā i latou,+ e ao ona ō mai iā te aʻu ma ou faamasino ai i le tasi ma le isi, ma ou faailoa atu faaiʻuga a le Atua moni ma ana tulafono.”+
17 Ua faapea mai le tamā o le avā a Mose: “E lē lelei le auala o loo e taulimaina ai ia mataupu.
18 E mautinoa e lē lavavā ai, o oe, atoa ma lenei nuu ua outou faatasi, ona e telē le avega o loo e amoina.+ E lē mafai ona e faia na o oe.+
19 O lenei, ia e faalogo mai i loʻu leo.+ Ou te fautua atu iā te oe, ma e faatasi le Atua ma oe.+ E avea oe ma sui o tagata i luma o le Atua moni,+ ma o oe lava e te faaalia nei faafitauli i luma o le Atua moni.+
20 E ao ona e lapataʻia i latou e faatatau i poloaʻiga ma tulafono,+ ma ia e faailoa atu iā i latou le ala e ao ona savavali ai, ma le galuega e ao ona latou faia.+
21 A o oe, ia e filifili mai i le nuu o ni tane+ agavaa e matataʻu i le Atua,+ o ni tane e maufaatuatuaina,+ e lē fiafia i le mauaina o tupe i faiga lē tonu;+ ma ia e tofia i latou e avea ma taʻitaʻi o le toʻaafe,+ taʻitaʻi o le toʻaselau, taʻitaʻi o le toʻalima sefulu ma taʻitaʻi o le toʻasefulu.+
22 E ao ona latou faamasinoina tagata i taimi e talafeagai ai ona latou faia; e latou te aumaia iā te oe mataupu tetele uma,+ a o mataupu lāiti e faamasinoina e i latou. Ona māmā ai lea o lau avega, ma e latou te fesoasoani iā te oe i le tauaveina o le avega.+
23 Afai e te faia faapea, ua tusa foʻi lea ma le poloaʻiga a le Atua iā te oe, e mautinoa e te gafatia le galuega, ma e ō atu foʻi tagata i le mea e nonofo ai ma le filemu.”+
24 Ua faalogo Mose i le leo o le tamā o lana avā, ma faia mea uma na ia fai atu ai.+
25 Ona filifili lea e Mose o tane agavaa mai i Isaraelu uma, ua ia tofia i latou e avea ma taʻitaʻi i le nuu,+ o taʻitaʻi o le toʻaafe, o taʻitaʻi o le toʻaselau, o taʻitaʻi o le toʻalima sefulu ma taʻitaʻi o le toʻasefulu.
26 Ua latou faamasinoina le nuu i taimi e talafeagai ona faia ai. E latou te aumaia mataupu faigatā iā Mose,+ a o mataupu lāiti e faamasinoina e i latou.
27 Ua mavae lea, ona faamavae lea o Mose i le tamā o lana avā,+ ma ua toe foʻi atu o ia i lona atunuu.
Faamatalaga Pito i Lalo
^ O lona uiga, “O loʻu Atua o le fesoasoani lea.”
