Esoto 26:1-37
26 “E te faia le faleʻie paia i ʻie e sefulu,+ o le ʻie lino ua lelei ona milo ona filo, o filo lanu moana, o fulufulu mamoe ua vali lanu violē, ma mea ua vali mūmū sesega.+ E te suʻi ai ni teuteu o ata o kerupi.+
2 O le umi o ʻie taʻitasi o le faleʻie, e lua sefulu valu kupita, ma e fā kupita le lautele o ʻie taʻitasi. E tasi le fua mo ia ʻie uma o le faleʻie.+
3 E ao ona sosoo ʻie e lima o le faleʻie e fai ai se vaega e tasi, ma ʻie e lima e sosoo e fai ai le isi vaega.+
4 Ia e faia ni faamaulave i le filo lanu moana i le faatausiʻusiʻuga o le tasi ʻie o le faleʻie i le pito o lea vaega; ia faapea foʻi ona e faia i le faatausiʻusiʻuga o le ʻie o le faleʻie lea e pito i tua, i le mea e sosoo ai.+
5 E te faia faamaulave e lima sefulu i le ʻie o le faleʻie e tasi, e te faia foʻi faamaulave e lima sefulu i pito o le ʻie o le faleʻie o loo i le isi itu i le mea e sosoo ai, ia faafesagaʻi ia faamaulave.+
6 E ao ona e faia ni lave auro se lima sefulu ma sosoo faatasi le tasi ʻie i le isi ʻie o le faleʻie e faaaogā ai lave, ma avea ai ma se faleʻie paia e tasi.+
7 “E te faia ʻie i fulufulu ʻoti+ e ufiufi ai le faleʻie paia. E te faia ʻie o le faleʻie e sefulu tasi.
8 O le umi o ʻie taʻitasi e tolu sefulu kupita+ ma e fā kupita le lautele o ʻie taʻitasi. E tasi le fua mo ʻie e sefulu tasi.
9 E te sosooina ʻie e lima, e te sosooina foʻi ʻie e ono,+ e te gaulua le ʻie lona ono i le pito i luma o le faleʻie.
10 E te faia faamaulave e lima sefulu i le faatausiʻusiʻuga o le tasi ʻie o le faleʻie o le vaega pito i tua, ma faamaulave e lima sefulu i le pito o le isi ʻie i le mea e sosoo ai.
11 E te faia lave ʻapamemea+ e lima sefulu ma tuu lave i faamaulave ma sosoo faatasi ai le faleʻie, ona tasi ai lea.+
12 O ʻie e totoe o le faleʻie e faatautau. O le ʻafa o ʻie e totoe e tautau i le pito i tua o le faleʻie paia.
13 O mea e totoe i le umi o ʻie o le faleʻie, o le kupita i lenei itu, o le kupita foʻi i le isi itu, e tautau i itu o le faleʻie paia i lenei itu ma le isi itu e ufiufi ai.
14 “E te faia se ufiufi o le faleʻie i paʻu o mamoe poʻa ua vali mūmū, ma se ufiufi e faia i paʻu o takesa i le tumutumu.
15 “E te faia auivi laupapa+ mo le faleʻie paia i laau o le setima, ina ia faatutū ai.
16 O le umi o le auivi laupapa e sefulu kupita, ma e tasi le kupita ma le ʻafa le lautele o auivi laupapa taʻitasi.
17 O auivi laupapa taʻitasi, e iai faanifo e lua e faafeagai le isi ma le tasi. O le auala lenā e te faia uma ai auivi laupapa o le faleʻie paia.
18 E te faia auivi laupapa mo le faleʻie paia, e lua sefulu auivi mo le itu e faasaga i Nekepi, i le itu i saute.
19 “E te faia lagolago+ siliva e fā sefulu e fetaui ma auivi laupapa e lua sefulu; e lua lagolago i lalo o le auivi laupapa e tasi ma ona faanifo e lua, ma e faapea foʻi i auivi laupapa e sosoo ai e tofu ma lagolago i lalo o auivi laupapa ma ona faanifo e lua.
20 A o le isi itu o le faleʻie paia i le itu i mātū, e lua sefulu auivi laupapa,+
21 ma o latou lagolago siliva e fā sefulu, e lua lagolago i lalo o le auivi laupapa e tasi, ma e faapea foʻi i auivi laupapa e sosoo ai e tofu ma lagolago e lua i lalo o auivi laupapa.+
22 A o le vaega i tua o le faleʻie paia i le itu i sisifo, e te faia ai auivi laupapa e ono.+
23 E te faia auivi laupapa e lua i tulimanu o le faleʻie paia+ i ona itu e lua i tua.
24 E ao ona tutusa ia auivi laupapa mai i le pito i lalo seʻia oo i le tumutumu i le mea e sosoo faatasi ai, ma e gata i le mea ua iai le mama muamua. O le auala lea e faia ai nei auivi laupapa e lua. E fai ma tulimanu e lua.
25 E ao ona iai auivi laupapa e valu ma o latou lagolago siliva, o lagolago e sefulu ono, e lua lagolago i lalo o le auivi laupapa e tasi, e faapea foʻi i auivi laupapa e sosoo ai e tofu ma lagolago e lua i lalo o le auivi laupapa.
26 “E te faia pou faalava mai i laau o le setima,+ e lima pou faalava mo auivi laupapa i le tasi itu o le faleʻie paia,
27 e lima pou faalava mo auivi laupapa i le tasi itu o le faleʻie paia, e lima pou faalava mo auivi laupapa mo le tasi itu o le faleʻie paia i ona itu e lua i tua i le itu i sisifo.+
28 O le pou faalava i le ogatotonu o auivi laupapa e mai i le tasi itu e oo i le isi itu.
29 “E te ufiufi auivi laupapa i le auro,+ e te faia mama i le auro e lagolago ai pou faalava; ma e te ufiufi pou faalava i le auro.
30 E ao ona e faia le faleʻie paia e tusa ma le ata sa faaali atu iā te oe i le mauga.+
31 “E te faia se ʻie puipui+ i filo lanu moana, o fulufulu mamoe ua vali lanu violē, o mea ua vali mūmū sesega, ma ʻie lino ua lelei ona milo ona filo. E na te suʻi ai ni teuteu o ata o kerupi.+
32 E ao ona e faatautau ai i luga o poutū e fā o laau o le setima ua ufiufi i le auro. E auro foʻi pine. E tutū poutū i luga o lagolago siliva e fā.
33 E ao ona e faatautau le ʻie puipui i lave ma aumai le atolaau o le feagaiga*+ i tua o le ʻie puipui; ia fai le ʻie puipui ma mea e va ai le Mea Paia+ ma le Mea e Sili Ona Paia.+
34 E te tuu le ufiufi i luga o le atolaau o le feagaiga* i le Mea e Sili Ona Paia.
35 “E te tuu le laulau i fafo o le ʻie puipui, ma le tuugāmolī+ e feagai ma le laulau i le itu o le faleʻie paia e faasaga i le itu i saute; e te tuu le laulau i le itu i mātū.
36 E te faia se ʻie pupuni+ i le faitotoʻa o le faleʻie i filo lanu moana, o fulufulu mamoe ua vali lanu violē, o mea ua vali mūmū sesega, ma ʻie lino ua lelei ona milo ona filo, o galuega a se tagata lalaga.
37 E ao foʻi ona e faia poutū e lima i le laau o le setima mo le ʻie pupuni ma ufiufi ai i le auro. E auro foʻi pine. E te tunu le ʻapamemea ma fai ai lagolago e lima mo ia poutū.
