Esoto 28:1-43
28 “A o oe, ia e aumai lou uso o Arona ma ona atalii faatasi ma ia mai i le fanauga a Isaraelu, ina ia auauna mai o ni ositaulaga iā te aʻu,+ o Arona+ ma ona atalii, o Natapu, o Aviu,+ o Eleasaro, ma Itamaro.+
2 E te faia foʻi ni ofu paia mo Arona lou uso, ina ia mamalu ma matagofie ai.+
3 E te tautala atu i ē uma ua atamamai o ē ua ou faatumuina o latou loto i le atamai,+ e latou te faia ofu o Arona, ina ia faapaiaina ai o ia, ma auauna mai ai o se ositaulaga iā te aʻu.+
4 “O ofu nei e latou te faia: o le ufifatafata+ i le fatafata, o le efota,+ o le ofu talaloa lima pupuu,+ o le ofu talaloa ua iai mamanu faatafafā, o le pulou ʻie+ ma le fusi ʻie;+ e ao ona latou faia ofu paia mo Arona lou uso ma ona atalii, ina ia auauna mai ai o ni ositaulaga iā te aʻu.
5 Ia latou ave le auro, o le filo lanu moana, o le filo fulufulu mamoe ua vali violē, o mea ua vali mūmū sesega ma le ʻie lino lelei.
6 “Ia latou faia le efota i le auro, o le filo lanu moana, o le filo fulufulu mamoe ua vali violē, o mea ua vali mūmū sesega ma le ʻie lino ua lelei ona milo ona filo, o galuega a se tagata suʻi teuteu.+
7 Ia sosoo faatasi fasi ʻie e lua o le tauʻau i ona pito e lua i luga, ona sosoo faatasi ai lea o le efota.+
8 E iai le fusi+ i luga o le efota ina ia mau ai le efota, ia faia lava i le auala e tasi i mea e tasi, o le auro, o le filo lanu moana, o le filo fulufulu mamoe ua vali violē, o mea ua vali mūmū sesega ma le ʻie lino ua lelei ona milo ona filo.
9 “E te ave foʻi maa tāua o le soama+ e lua ma vane+ ai i luga igoa o atalii o Isaraelu,+
10 o igoa e ono e vane i le isi maa, a o igoa o le isi toʻaono e vane i le isi maa, e tusa ma le faasologa o lo latou fananau mai.+
11 E pei o galuega a le tufuga fai maa i le vaneina o se faamaufaailoga, ia faapea foʻi ona e vaneina igoa o atalii o Isaraelu i nei maa.+ Ia faamau ia maa e lua i teuteu auro.+
12 Ia e tuu ia maa i luga o fasi ʻie o le tauʻau o le efota e fai ma maa e manatua ai le fanauga a Isaraelu;+ e tauave e Arona o latou igoa i luma o Ieova i ona fasi ʻie e lua o le tauʻau e fai ma faamanatuga.
13 E te faia foʻi teuteu auro,
14 ma filifili e lua o auro māoʻi.+ E faia e foliga o ni manoa, e pei foʻi o galuega a se tagata e na te faia manoa; ma e te faamau ia filifili e pei o ni manoa i teuteu auro.+
15 “E te faia le ufifatafata mo faamasinoga+ i le galuega a le tagata suʻi teuteu. E te faia ai e pei ona faia o le galuega i le efota. E te faia i le auro, o le filo lanu moana, o le filo fulufulu mamoe ua vali violē, o mea ua vali mūmū sesega ma le ʻie lino ua lelei ona milo ona filo.+
16 E ao ona faatafafā pe a faasautualua, e tusa ma le aga* lona umī, e aga foʻi lona lautele.+
17 E te tuuina i ai ni maa tāua, e fā laina o maa.+ O le laina muamua e iai maa o le salikea,+ o le topasi,+ ma le samaraki.+
18 O le laina lona lua e iai maa o le nofeka,+ o le safaira,+ ma le ialoma.+
19 O le laina lona tolu e iai maa o le lesema, o le sevo+ ma le aselama.+
20 O le laina lona fā e iai maa o le tasesa,+ o le soama,+ ma le iasepi. Ia faamau lava i totonu o teuteu auro i le mea e tuu ai maa.+
21 O maa e ao ona tusa ma igoa o atalii o Isaraelu, le toʻasefulu lua e tusa ma o latou igoa.+ E ao ona faia e pei o le vaneina o se faamaufaailoga, e taʻitasi le maa ma lona igoa e tusa ma ituaiga e sefulu lua.+
22 “E te faia i luga o le ufifatafata o filifili ua fili e pei o se maea i auro māoʻi.+
23 E te faia foʻi mama auro+ e lua i luga o le ufifatafata, ma e tuu mama e lua i pito e lua o le ufifatafata.
24 E te faamau foʻi maea auro e lua i mama e lua i pito o le ufifatafata.+
25 E te faamau pito e lua o maea e lua i teuteu auro e lua, ma e ao ona e faamau ia mea i fasi ʻie o le tauʻau o le efota ina ia tautau le ufifatafata, i luma o le efota.+
26 E te faia mama auro e lua ma tuu i pito e lua o le ufifatafata, i le pito i lalo lea e ū i le efota.+
27 E te faia mama auro e lua ma tuu i le pito i lalo o fasi ʻie o le tauʻau o le efota, i ona luma e lata i le mea e sosoo ai, i luga o le fusi o le efota.+
28 E latou te nonoa maea lanu moana i mama o le ufifatafata i mama o le efota, ina ia mau lelei ai i luga o le fusi o le efota, ma lē see ese ai le ufifatafata mai i lona tulaga i luga o le efota.+
29 “E tauave e Arona igoa o atalii o Isaraelu o loo i le ufifatafata mo faamasinoga i luga o lona fatafata, pe a ulu atu o ia i le Mea Paia e fai ma faamanatuga e lē aunoa i luma o Ieova.
30 Ia e tuu le Urima+ ma le Tumema i totonu o le ufifatafata mo faamasinoga, ma e ao ona i luga o le fatafata o Arona pe a ulu atu o ia i luma o Ieova; ia lē aunoa ona ave e Arona iʻuga o faamasinoga+ mo le fanauga a Isaraelu i luga o lona fatafata i luma o Ieova.
31 “E te faia le ofu talaloa lima pupuu atoa, o loo i le pito i totonu o le efota, i le filo lanu moana.+
32 E ao ona iai le ua i le ogatotonu o lea ofu. E tatau ona afe faataamilo le ua, o le galuega a sē e lalaga ʻie. E ao ona pei o le ua o le ofutau uʻamea ina ia lē masae ai.+
33 E te faia i le afe pito i lalo o rimoni* i le filo lanu moana, o le filo fulufulu mamoe ua vali violē, ma mea ua vali mūmū sesega, e faataamilo i le afe, ma logo+ auro e tovā faataamilomilo ai;
34 e sosoo le logo auro ma le rimoni, o le logo auro ma le rimoni e faataamilo i le afe o le ofu talaloa lima pupuu.+
35 E ofu ai Arona pe a auauna o ia, ma e tatau ona lagona le tagitagi o logo mai iā te ia pe a ulu atu o ia i le mea paia i luma o Ieova ma pe a ulufafo foʻi, ina ia lē oti ai o ia.+
36 “E te faia se pale iila i le auro māoʻi ma vane ai e pei o le vaneina o se faamaufaailoga, ‘E paia lava Ieova.’+
37 Ia e faamau ai i se manoa lanu moana, ma e ao ona iai le pale iila i luga o le pulou ʻie. E ao ona iai i luma lava o le pulou ʻie.+
38 Ia fusi ai i le muaulu o Arona, e ao foʻi ona tali atu Arona i agasala ua faia i mea paia,+ ia o le a faapaiaina e atalii o Isaraelu, o lona uiga o a latou meaalofa paia uma; e fusi pea i lona muaulu, ina ia latou maua ai le finagalo malie+ o Ieova.
39 “E ao foʻi ona e lalaga mamanu faatafafā i le ofu talaloa i le ʻie lino lelei, ma ia faia foʻi se pulou ʻie i le ʻie lino lelei,+ ma ia e faia se fusi ʻie,+ o galuega a se tagata lalaga ʻie.
40 “E te faia ofu talaloa+ mo atalii o Arona, o fusi ʻie mo i latou ma pulou+ mo i latou ina ia mamalu ma matagofie ai.+
41 Ia faaofu lou uso o Arona ma ona atalii faatasi ma ia, ia e faauuina i latou+ ma tuu atu le pule*+ iā i latou ma faapaiaina i latou, ina ia latou auauna mai ai o ni ositaulaga iā te aʻu.
42 Ia faia ni ofuvae i le ʻie lino ina ia ufiufi ai lo latou lē lavalavā.+ E mai i puimanava e oo i ogāvae ia ofuvae.
43 E ao ona ofu e Arona ma ona atalii nei ofuvae pe a latou ō atu i le faleʻie o le feiloaʻiga, pe latou te faalatalata atu i le fata faitaulaga e auauna ai i le mea paia, ina neʻi nofosala i latou ma feoti ai. O le tulafono lenei mo se taimi umi mo ia ma lana fanau pe a mavae atu o ia.+
Faamatalaga Pito i Lalo
^ E tutusa ma le 22.2 senitimita (8.75 inisi).
^ O se fualaau ʻaina e lanu mumū pauli e pei o se apu.
^ I le gagana Eperu, “ia faatumu le lima” ma e faasino atu i le tuu atu o le pule atoa i lima o ē e auauna o ni ositaulaga.
