Esoto 29:1-46
29 “O le mea lenei e te faia iā i latou ina ia faapaiaina ai i latou e auauna mai iā te aʻu o ni ositaulaga: Ia e ave se povi poʻa taanoa, o mamoe poʻa+ e lua, e matuā lelei lava,+
2 o falaoa e lē faafefeteina, o falaoa lapotopoto e lē faafefeteina ua iai sina suāuu, ma falaoa manifinifi e lē faafefeteina ua nini i le suāuu.+ E te faia i le falaoamata o le saito aupito lelei.
3 E te tuuina na mea i se ato ma avatu i se ato+ faatasi ma le povi poʻa, ma mamoe poʻa e lua.
4 “E te ave Arona ma ona atalii i le faitotoʻa+ o le faleʻie o le feiloaʻiga, ma ia e faatonuina i latou e tāʻeele i le vai.+
5 Ona e ave lea o ofu+ ma faaofu ai Arona i le ofu talaloa, ma le ofu talaloa lima pupuu e pito i totonu o le efota, o le efota, o le ufifatafata, ma e te fusi iā te ia i le fusi o le efota.+
6 Ia e nonoa le pulou ʻie i luga o lona ulu ma fusi ai le faailoga o le tuuina atu* i luga o le pulou ʻie.+
7 E te ave le uu+ e faauu ai ma liligi i luga o lona ulu ma faauuina ai o ia.+
8 “Ona e aumaia lea o ona atalii ma e faaofu i latou i ofu talaloa.+
9 E te fusi iā i latou i fusi ʻie, o Arona ma ona atalii, ma e te nonoa le pulou i o latou ulu; e fai foʻi mo i latou le faiva o ositaulaga o se tulafono mo se taimi umi.+ E te tuu atu le pule iā Arona ma ona atalii.+
10 “E ao ona e avatu loa le povi poʻa i luma o le faleʻie o le feiloaʻiga, o Arona foʻi ma ona atalii e latou te faaee atu o latou lima i luga o le ulu+ o le povi poʻa.
11 E te fasi le povi poʻa i luma o Ieova i le faitotoʻa o le faleʻie o le feiloaʻiga.+
12 E te ave sina vaega o le toto o le povi poʻa+ i lou tamatamaʻilima ma tuu i luga o seu o le fata faitaulaga,+ a o le toto o totoe e te sasaa i lalo o le fata faitaulaga.+
13 E te ave foʻi le gaʻo+ ua lilofia ai le gaʻau,+ o le gaʻo i luga o le ate,+ ma fatugaʻo e lua ma le gaʻo i luga o na mea, e te susunuina* ai i le fata faitaulaga.+
14 A o le aano, o le paʻu ma otaota o le povi poʻa, e te susunuina i tua o le togālauapi.+ O le taulaga lea o agasala.
15 “Ona e ave lea o le mamoe poʻa+ e tasi, e ao foʻi iā Arona ma ona atalii ona faaee atu o latou lima i luga o le ulu+ o le mamoe poʻa.
16 E te fasi foʻi le mamoe poʻa ma ave lona toto ma sausau solo ina ia soo ai le fata faitaulaga.+
17 Ia e pena le mamoe poʻa i vaega, ma e fufulu gaʻau+ ma vae, ia tuu ona vaega e faafeagai ma isi ona vaega seʻia oo lava i le ulu.
18 E te susunuina atoa le mamoe poʻa i luga o le fata faitaulaga. O le taulaga mū+ iā Ieova, o le manogi ua faamalieina ai.+ O le taulaga iā Ieova ua faia i le afi.
19 “Ona e ave lea o le isi mamoe poʻa, e ao iā Arona ma ona atalii ona faaee atu o latou lima i luga o le ulu+ o le mamoe poʻa.
20 E te fasi le mamoe poʻa ma ave sina toto ma tuu i le lautaliga o le taliga taumatau o Arona, ma lautaliga o taliga taumatau o ona atalii, i luga foʻi o limamatua o o latou lima taumatau, ma vaematua o o latou vae taumatau,+ ma ia e sausau le toto ia soo ai le fata faitaulaga.
21 Ia e ave sina toto o loo i luga o le fata faitaulaga ma sina uu e faauuina ai,+ ia e sausau i luga o Arona ma ona ofu, i luga o ona atalii ma ofu o ona atalii faatasi ma ia, ina ia paia ai o ia ma ona ofu, o ona atalii ma ofu o ona atalii faatasi ma ia.+
22 “Ia e aumai le gaʻo mai i le mamoe poʻa, o le siʻusiʻu gaʻoa,+ o le gaʻo i luga o le gaʻau, o le gaʻo o le ate, o fatugaʻo e lua ma le gaʻo i luga o na mea, ma le alagavae taumatau,+ auā o le mamoe poʻa o le tofiga;+
23 ma se falaoa lapotopoto, atoa ma se falaoa lapotopoto ua iai sina uu, ma se falaoa manifinifi mai i le ato o falaoa e lē faafefeteina, o loo i luma o Ieova.+
24 E te tuu ia mea i luga o alofilima o Arona ma luga o alofilima o ona atalii,+ ma ia e lūlū ia mea i le isi itu ma le isi itu, o le taulaga lūlū lea iā Ieova.+
25 E te aveesea na mea mai o latou lima ma susunuina i luga o le fata faitaulaga, e susunu faatasi ma le taulaga mū o le mea manogi lea ua faamalieina i luma o Ieova.+ O le taulaga iā Ieova ua faia i le afi.+
26 “E te ave le fatafata o le mamoe poʻa o le tofiga,+ lea e fai mo Arona ma lūlū i le isi itu ma i le isi itu o se taulaga lūlū i luma o Ieova, e avea ma au tufaaga.
27 E ao ona e faapaia le fatafata+ o le taulaga lūlū ma le vae o le tufaaga paia; o le taulaga na lūlūina ma o le taulaga na fai ma tufaaga mai i le mamoe poʻa mo le tofiga,+ e mai i le mamoe poʻa mo Arona ma ona atalii.
28 Ia fai ia mea ma tufaaga mo Arona ma ona atalii e tusa ma se poloaʻiga mo se taimi umi, e faia e atalii o Isaraelu, auā o ni tufaaga paia;+ ma o le a faia ia tufaaga paia e atalii o Isaraelu. Ua avea ia mea ma tufaaga paia iā Ieova mai i a latou taulaga faifaatasi.+
29 “O ofu paia+ o Arona, e fai ma ona atalii+ pe a mavae atu o ia, ina ia faauuina+ ai i latou ma tuu atu le pule* iā i latou.+
30 E ofu ia ofu e le ositaulaga e sosoo ma ia mai i ona atalii i aso e fitu,+ o lē e ulu atu i totonu o le faleʻie o le feiloaʻiga e auauna i le mea paia.
31 “E te ave le mamoe poʻa o le tofiga, ma ia e saka lona aano i le mea paia.+
32 E ʻai+ e Arona ma ona atalii le aano o le mamoe poʻa, ma le falaoa ua i totonu o le ato i le faitotoʻa o le faleʻie o le feiloaʻiga.
33 E ao ona latou aai i mea ua uma ona faia ai le togisala, ina ia tuu atu iā i latou le pule, ma faapaiaina ai i latou.+ E lē tatau ona ʻai ai se tagata ese* auā o mea paia ia mea.+
34 Pe afai e oo i le taeao o totoe ni aano o le taulaga o le tofiga ma ni falaoa, ona e susunuina lea i le afi o mea ua totoe.+ E lē tatau ona ʻaina na mea auā e paia.
35 “Ia e faia lenei mea iā Arona ma ona atalii e tusa ma mea uma ua ou poloaʻi atu ai iā te oe.+ E fitu aso e te faia ai le tuuina atu o le pule iā i latou.+
36 E te faia taulaga mo agasala i aso taʻitasi i le povi poʻa e avea ma togisala,+ e te faamamā foʻi le fata faitaulaga mai i le agasala, e ala i lou faia o se togisala mo le fata faitaulaga, ia e faauu+ i ai ma faapaiaina.
37 O aso e fitu e te faia ai le togisala mo le fata faitaulaga, ia e faapaiaina+ ina ia avea ma fata faitaulaga+ e sili ona paia. O se tasi e paʻi atu i le fata faitaulaga, e tatau ona paia o ia.+
38 “O mea nei e te fai taulaga ai i le fata faitaulaga: e lua mamoe poʻa e taʻitasi tausaga, e taʻilua i le aso e lē aunoa.+
39 E te fai taulaga i le mamoe poʻa e tasi i le taeao,+ ae e te fai taulaga i le isi mamoe poʻa i le afiafipō.*+
40 E tasi vaesefulu o le efa o le falaoamata+ lelei ua liligi i ai le tasi vaefā o le sinu* o le uu olive ua tuʻia, e tasi vaefā o le sinu o le uaina mo le taulaga o meainu,+ e faia faatasi ma le uluaʻi mamoe poʻa.
41 E te faia le taulaga i le mamoe poʻa lona lua i le afiafipō. E te faia e tusa ma le taulaga i meaʻai+ i le taeao, ma e tusa foʻi ma le taulaga o meainu, e te faia e fai ma mea manogi e faamalieina ai, o le taulaga iā Ieova ua faia i le afi.
42 O se taulaga mū faifai pea+ i o outou tupulaga o loo mulimuli mai, i le faitotoʻa o le faleʻie o le feiloaʻiga i luma o Ieova, ou te feiloaʻi ai ma outou ma tautala atu ai iā te oe i inā.+
43 “Ou te faafeiloaʻi atu i atalii o Isaraelu i inā, ma e faapaiaina lea mea i loʻu mamalu.+
44 Ou te faapaiaina le faleʻie o le feiloaʻiga ma le fata faitaulaga; ou te faapaiaina+ foʻi Arona ma ona atalii e avea ma ositaulaga iā te aʻu.
45 Ou te nofo faatasi ma tagata Isaraelu, e fai aʻu ma o latou Atua.+
46 E latou te iloa ai o aʻu o Ieova lo latou Atua, o lē na aumaia i latou mai i le atunuu o Aikupito, ina ia ou nofo faatasi ai ma i latou.+ O aʻu o Ieova o lo latou Atua.+
Faamatalaga Pito i Lalo
^ I le gagana Eperu, o le “faailoga paia o le tuuina atu.” O lona uiga o le faailoga paia o le tuuina atu o Arona i le Atua.
^ I le gagana Eperu, “e ao ona sau le asu mai i ia mea.”
^ I le gagana Eperu, “ia faatumu le lima” ma e faasino atu i le tuu atu o le pule atoa i lima o ē e auauna o ni ositaulaga.
^ O lona uiga, “o se tasi e lē mai i le aiga o Arona.”
^ I le gagana Eperu, i “le va o afiafi e lua.” O lona uiga o le va o le goto o le lā ma le pō.
^ O le fua o le “sinu” e tusa ma le 3.67 lita (7.75 paina).
