Esoto 31:1-18
31 Ua toe fetalai mai Ieova iā Mose e faapea:
2 “O le mea lea, ua ou tofia ai Pesaleli+ le atalii o Auri, o le atalii o Huro, mai i le ituaiga o Iuta.+
3 Ou te faatumuina o ia i le agaga o le Atua, ina ia maua e ia le atamai, le malamalama ma le poto, ma ia agavaa ai e faia galuega eseese uma,+
4 i le tusiaina o ata, i le faia o galuega i auro, o siliva ma ʻapamemea,+
5 i le vaneina o maa ina ia faamau ai,+ ma galue i laau ina ia faia ai galuega eseese.+
6 A o aʻu, o le mea lea ou te tofia ai faatasi ma ia o Oliavu, le atalii o Aisamako, mai i le ituaiga o Tanu,+ ua ou tuu foʻi le atamai i loto o ē e atamamai uma lava, ina ia latou faia o mea uma ua ou poloaʻi atu ai iā te oe:+
7 o le faleʻie o le feiloaʻiga,+ o le Atolaau+ o le feagaiga, ma le ufiufi o loo i ona luga,+ ma mea uma e faaaogā i le faleʻie,
8 o le laulau ma mea uma e faaaogā ai,+ o le tuugāmolī o le auro māoʻi ma mea uma e faaaogā ai,+ ma le fata faitaulaga e mū ai mea manogi,+
9 o le fata faitaulaga e fai ai taulaga mū ma mea uma e faaaogā ai,+ o le faatanoa ma lona tulaga,+
10 o ofu ua lelei ona lalagaina ma ofu paia mo Arona le ositaulaga, ma ofu o ona atalii o ē e auauna o ni ositaulaga;+
11 o le uu e faauu ai, o le mea manogi lelei e mū mo le mea paia.+ E latou te faia o mea uma ua ou poloaʻi atu ai iā te oe.”
12 Ua fetalai atili mai Ieova iā Mose:
13 “A o oe, e te fai atu i le fanauga a Isaraelu e faapea, ‘Ia outou tausia lava oʻu sapati,+ auā o le faailoga lea i le va o aʻu ma outou i o outou tupulaga o loo mulimuli mai, ina ia outou iloa ai o aʻu o Ieova, o lē o loo faapaiaina outou.+
14 E ao ona outou tausia le sapati, auā o se mea paia lea iā te outou.+ E fasiotia+ lava se tasi e na te solia le sapati. Afai e iai se tasi na te faia ni galuega i lea aso, ia fasiotia lava o ia.+
15 E ono aso e faia ai galuega, a o le aso lona fitu, o le aso sapati lea e mālōlō ai.+ O se mea paia lea iā Ieova. E fasiotia lava se tasi e na te faia ni galuega i le aso sapati.
16 E ao i le fanauga a Isaraelu ona tausia le sapati, ma e ao ona tausia pea le sapati e o latou tupulaga o loo mulimuli mai. O le feagaiga mo se taimi umi.+
17 O le faailoga lenei i le va o aʻu ma le fanauga a Isaraelu mo se taimi umi,+ auā e ono aso na faia ai e Ieova le lagi ma le lalolagi, a o le aso lona fitu ua uma ai ana galuega, ona mālōlō ai lea o ia.’”+
18 Ua uma atu ana fetalaiga iā Mose i le Mauga o Sinai, ona ia avatu lea iā Mose o papamaa e lua o le Feagaiga,*+ o papamaa na tusia e le aao*+ o le Atua.
