Esoto 33:1-23
33 Ua toe fetalai mai Ieova iā Mose: “Inā e alu ia ma ō ese mai i inei, o oe ma tagata na e taʻitaʻiina ese mai i Aikupito,+ ma ō atu i le laueleele lea na ou tautō ai iā Aperaamo, Isaako ma Iakopo e faapea, ‘Ou te avatua lenei laueleele i lau fanau.’+
2 Ou te auina atu se agelu e muamua atu iā te oe+ e tuliese tagata Kanana, o tagata Amorī, o tagata Hetī, o tagata Perise, o tagata Hivī ma tagata Iepusē;+
3 ma outou ō atu ai i se laueleele e tafe ai le suāsusu ma le meli,+ ae ou te lē alu faatasi ma outou, ona o outou o tagata faauamaaa,+ neʻi oʻu faaumatia outou i le ala.”+
4 Ua faalogo le nuu i le tala lē fiafia, ona faanoanoa+ ai lea o tagata; ma e leai se tasi o i latou na teuteu i ana teuga.
5 Ua toe fetalai mai Ieova iā Mose: “Ia fai atu i le fanauga a Isaraelu, ‘O outou o tagata faauamaaa.+ Ou te ono alu aʻe iā te outou e pei o le emo o le mata+ ma faaumatia ai outou. O lea, ia tuu ese a outou teuga, seʻia oʻu iloa ai po o le ā se mea ou te faia iā te outou.’”+
6 Ona aveese lea e le fanauga a Isaraelu o a latou teuga uma i le Mauga o Horepa+ ma e leʻi toe faia lava.
7 A o Mose ua ia aveese lona faleʻie ma faatū i se mea e mamao ese mai i le togālauapi; ma ua ia taʻua ai o le faleʻie o le feiloaʻiga. O tagata uma e fia fesili+ atu iā Ieova, e ō atu i le faleʻie o le feiloaʻiga, o loo i tua o le togālauapi.
8 O so o se taimi e alu ai Mose i le faleʻie, e tutulaʻi uma tagata+ ma e taʻitasi ma tū i luma o le mea e ulu atu ai i lona faleʻie, ma pulatoʻa atu iā Mose seʻia ulu atu o ia i le faleʻie.
9 O le taimi lava e ulu atu ai Mose i le faleʻie, ona alu ifo lea o le ao faaniutū+ ma tū i le mea e ulu atu ai i le faleʻie, ma ua fetalai+ mai le Atua iā Mose.
10 A o vāai atu tagata i le ao faaniutū+ o tū i le mea e ulu atu ai i le faleʻie, ona tutulaʻi lea o le nuu ma ifo atu i ai, e taʻitoʻatasi i le mea e ulu atu ai i lona faleʻie.+
11 Ua fetalai mai foʻi Ieova iā Mose ae o loo fesagaʻi+ i laʻua e pei ona talanoa atu o se tamāloa i lona tuaoi. Pe a toe foʻi atu o ia i le togālauapi, e nofo pea i totonu o le faleʻie lana auauna+ o Iosua, le atalii o Nuno,+ o ia foʻi o le tautua.
12 Ua faapea atu Mose iā Ieova: “Silasila mai, ua e fetalai mai iā te aʻu, ‘Ia e taʻitaʻi ese lenei nuu,’ a o oe e te leʻi faailoa mai iā te aʻu po o ai e te aumaia ma te ō. Ua e fetalai mai foʻi, ‘Ou te iloa oe i lou igoa+ ma ua fiafia foʻi loʻu loto iā te oe.’
13 O lea faamolemole, afai ua fiafia lou finagalo iā te aʻu+ ia e faailoa mai ou ala,+ ina ia ou iloa ai oe, ma ia fiafia ai lou finagalo iā te aʻu. Ia e manatua foʻi o lenei nuu o ou tagata i latou.”+
14 Ua ia fetalai mai: “E ta te ō faatasi+ ma ou te avatu iā te oe le mapusaga.”+
15 A ua ia fai atu iā te ia: “Afai ta te lē ō faatasi, aua e te taʻitaʻi ese i matou mai i inei.
16 Po o le ā se mea e iloa ai ua fiafia lou finagalo iā te aʻu, o aʻu ma lou nuu? Pe e lē o lou faatasi mai ea iā i matou,+ ua faaesea ai aʻu ma lou nuu, mai i isi tagata uma i luga o le fogāeleele?”+
17 Ua toe fetalai mai Ieova iā Mose: “O lenei foʻi mea ua e talanoa mai ai, ou te faia lava,+ auā ua fiafia loʻu loto iā te oe ma ua ou iloa oe i lou igoa.”
18 Ona ia faapea atu lea: “Faamolemole, ia e faaali mai iā te aʻu lou mamalu.”+
19 A ua fetalai mai o ia: “Ou te faapogaia oe e te vaai i loʻu lelei,+ ou te folafola atu le suafa o Ieova i ou luma;+ e fiafia loʻu loto i lē ua ou fiafia i ai, ou te alofa mutimutivale i lē ua ou alofa mutimutivale i ai.”+
20 Ua ia toe fetalai mai: “E lē mafai ona e vaai mai i oʻu mata, auā e lē mafai ona vaai mai lava se tasi iā te aʻu ma ola pea o ia.”+
21 Ua toe fetalai mai Ieova: “Ua iai le mea e latalata mai iā te aʻu, ia e tū ai i luga o le papa.
22 Pe a ui ane loʻu mamalu ou te tuu oe i se pu o le papa, ma ou te pupuni oe i loʻu alofilima seʻia ou sopoloa.
23 Pe a mavae lenā, ou te aveese loʻu alofilima ma e te iloa mai ai loʻu tua. Peitaʻi e te lē vaai mai i oʻu mata.”+
