Esoto 36:1-38
36 “E galulue Pesaleli, o Oliavu+ atoa ma tane atamamai uma, o ē ua foaʻi mai i ai e Ieova le atamai+ ma le malamalama+ i ia mea, ina ia iloa le auala e faia ai galuega uma e fesootaʻi atu i le auaunaga paia, e tusa ma mea uma na poloaʻi mai ai Ieova.”+
2 Ua aami e Mose o Pesaleli, o Oliavu ma tane atamamai uma, o ē ua foaʻi mai i ai e Ieova le atamai+ i o latou loto, o ē ua taʻitasi ma uunaʻia e lona loto e sau i le galuega ina ia galue ai.+
3 Ona latou ave lea o foaʻi+ uma mai i luma o Mose, ia na aumaia e le fanauga a Isaraelu mo le galuega e fesootaʻi atu i le auaunaga paia, ina ia faia ai le galuega, a ua aumaia pea e tagata iā te ia o foaʻi tauofo i lea taeao ma lea taeao.
4 Ona ō mai ai lea o tagata atamamai uma, o ē ua faia le galuega paia, ua taʻitasi ma sau mai i lana galuega sa fai,
5 ma faapea mai iā Mose: “Ua tele mea ua aumaia e tagata nai lo o mea e manaʻomia mo le galuega na poloaʻi mai ai Ieova e fai.”
6 Ona poloaʻi atu lea o Mose ia latou faia se faasilasilaga i le togālauapi e faapea: “Outou tane ma fafine, ia aua neʻi toe faia ni mea mo le foaʻi paia.” O lea na taofia ai tagata mai le aumaia o nisi mea.
7 Auā ua lava ma totoe mea ua saunia mo le galuega.
8 O ē ua atamamai+ uma mai iā i latou ua faia le galuega ua latou faia le faleʻie paia,+ o ʻie e sefulu ua fai mai i le ʻie lino ua lelei ona milo ona filo, o filo lanu moana, o fulufulu mamoe ua vali lanu violē, o mea ua vali mūmū sesega; ua suʻi ai foʻi teuteu o ata o kerupi, ua ia* faia o ia mea.
9 O le umi o ʻie taʻitasi e lua sefulu valu kupita ma e fā kupita le lautele o ʻie taʻitasi. E tasi le fua mo ia ʻie uma.
10 Ona ia sosooina lea o ʻie e lima,+ ua ia sosooina foʻi isi ʻie e lima.
11 Mulimuli ane, ua ia faia ni faamaulave i le filo lanu moana i tafatafa o le tasi ʻie o le faleʻie lea o loo i le pito e sosoo ai ma le isi ʻie. Ua ia faia foʻi faapea i tafatafa o le ʻie pito i tua o le isi ʻie i le mea e sosoo ai.+
12 Ua ia faia faamaulave e lima sefulu i le ʻie e tasi, ua ia faia foʻi faamaulave e lima sefulu i tafatafa o le ʻie lea i le isi itu o le mea e sosoo ai, ua faafesagaʻi ia faamaulave.+
13 Ona ia faia lea o lave auro se lima sefulu ma ua sosoo faatasi le tasi ʻie o le faleʻie i le isi ʻie i le faaaogāina o lave, ma ua avea ai ma se faleʻie paia e tasi.+
14 Ua ia faia foʻi ʻie i fulufulu ʻoti e ufiufi ai le faleʻie paia. Ua ia faia ʻie e sefulu tasi.+
15 O le umi o ʻie taʻitasi o le faleʻie e tolu sefulu kupita, ma e fā kupita le lautele o ʻie taʻitasi. E tasi le fua mo ʻie e sefulu tasi.+
16 Ua ia sosooina ʻie e lima, ua ia sosooina foʻi isi ʻie e ono.+
17 Ua ia faia faamaulave e lima sefulu i tafatafa o le tasi ʻie o le faleʻie i le mea e sosoo ai, ma ua ia faia foʻi isi faamaulave e lima sefulu i tafatafa o le isi ʻie i le mea e sosoo ai ma le isi ʻie.+
18 Ona ia faia lea o faamātau ʻapamemea e lima sefulu e sosoo faatasi ai le faleʻie, ina ia tasi ai.+
19 Ua ia faia foʻi se ufiufi mo le faleʻie i paʻu o mamoe poʻa ua vali mūmū, ma se ufiufi ua faia i paʻu o takesa+ i le tumutumu.+
20 Ona ia faia lea o auivi laupapa mo le faleʻie paia i laau o le setima,+ ua faatutū.
21 O le uumi o auivi laupapa e sefulu kupita, ma e kupita ma le ʻafa le lautele o auivi laupapa taʻitasi.+
22 O auivi laupapa taʻitasi, ua iai faanifo e lua e faafeagai le tasi ma le isi. O le auala lenā ua ia faia uma ai auivi laupapa o le faleʻie paia.+
23 Ua ia faia auivi laupapa mo le faleʻie paia, e lua sefulu auivi laupapa mo le itu e faasaga i Nekepi, i le itu i saute.+
24 Ua ia faia foʻi lagolago siliva e fā sefulu e fetaui ma auivi laupapa e lua sefulu, e lua lagolago i lalo o le auivi laupapa e tasi ma ona faanifo e lua, ma e faapea foʻi i auivi laupapa e sosoo ai e tofu ma lagolago e lua i lalo o auivi laupapa ma ona faanifo e lua.+
25 A o le isi itu o le faleʻie paia i le itu i mātū, ua ia faia ai auivi laupapa e lua sefulu+
26 ma o latou lagolago siliva e fā sefulu, e lua lagolago i lalo o le auivi laupapa e tasi ma e faapea foʻi i auivi laupapa e sosoo ai e tofu ma lagolago e lua i lalo o auivi laupapa.+
27 A o le vaega i tua o le faleʻie paia i le itu i sisifo ua ia faia ai auivi laupapa e ono.+
28 Ua ia faia auivi laupapa e lua i tulimanu o le faleʻie paia i ona itu e lua i tua.+
29 Ua tutusa ia auivi laupapa mai i le pito i lalo seʻia oo i le tumutumu i le mea e sosoo faatasi ai, ma e gata i le mea ua iai le mama muamua. O le auala lea ua ia faia ai nei auivi laupapa e lua, i tulimanu e lua.+
30 E valu auivi laupapa ma o latou lagolago siliva e sefulu ono, e lua lagolago i lalo o auivi laupapa taʻitasi.+
31 Ua ia faia pou faalava mai i laau o le setima, e lima pou faalava mo auivi laupapa i le tasi itu o le faleʻie paia,+
32 ma e lima pou faalava mo auivi laupapa i le isi itu o le faleʻie paia, e lima pou faalava mo auivi laupapa o le faleʻie paia i ona itu e lua i tua i le itu i sisifo.+
33 Ona ia faia lea o le pou faalava ina ia sulu i le ogatotonu o auivi laupapa e mai i le tasi itu e oo i le isi itu.+
34 Ua ia ufiufi o auivi laupapa i le auro, ua ia faia mama auro e lagolago ai pou faalava, ma ua ia ufiufi pou faalava i le auro.+
35 Ua ia faia foʻi se ʻie puipui+ i filo lanu moana, o fulufulu mamoe ua vali lanu violē, o mea ua vali mūmū sesega, ma ʻie lino ua lelei ona milo ona filo. O le galuega a se tagata e suʻia teuteu i ata o kerupi ua ia faia ai le ʻie puipui.+
36 Ona ia faia lea o poutū e fā mai i laau o le setima ma ufiufi ai i le auro, e auro foʻi ona pine, ma ua ia tunu le siliva ma fai ai lagolago e fā.+
37 Ua ia faia foʻi se ʻie pupuni mo le faitotoʻa o le faleʻie i filo lanu moana, o fulufulu mamoe ua vali lanu violē, o mea ua vali mūmū sesega, ma ʻie lino ua lelei ona milo ona filo, o le galuega a se tagata lalaga ʻie,+
38 ma ona poutū e lima ma ona pine. Ua ia ufiufi tumutumu ma sooga o ia mea i le auro, a o lagolago e lima ua faia i le ʻapamemea.+
Faamatalaga Pito i Lalo
^ “Ia,” e foliga mai e faasino atu iā Pesaleli.
