Esoto 4:1-31
4 A ua tali atu Mose: “Ae faapefea pe afai latou te lē talitonu iā te aʻu ma lē faalogo i loʻu leo?+ Auā latou te faapea mai nei, ‘E leʻi faaali atu Ieova iā te oe.’”
2 Ua fetalai mai Ieova iā te ia: “O le ā lenā mea o loo i lou lima?” ua ia tali atu: “O le tootoo.”+
3 Ona ia fetalai mai lea: “Ia togi i le eleele.” Ua ia togi le tootoo i le eleele ona liu gata ai lea;+ ona amata lea ona sola ese ai Mose.
4 Ua fetalai mai Ieova iā Mose: “Ia aapa atu lou lima ma tago i lona siʻusiʻu.” Ua aapa atu lona lima ma uu lona siʻusiʻu, ona toe liu tootoo ai lea i lona alofilima.
5 “Ia faia faapea, ina ia latou talitonu ai na faaali atu iā te oe+ Ieova le Atua o o latou augātamā,+ le Atua o Aperaamo,+ le Atua o Isaako+ ma le Atua o Iakopo.”+
6 Ua toe fetalai mai Ieova iā te ia: “Faamolemole ia tuu lou lima i totonu o le gauga i le fatafata o lou ofu.” Ona tuu lea o lona lima i totonu o le gauga o lona ofu. Ina ua seʻi mai i fafo lona lima, vaai foʻi, ua lepela lona lima e pei o le kiona!+
7 Ona ia fetalai mai lea: “Ia toe tuu lou lima i le gauga o lou ofu.” Ona ia toe tuu lea o lona lima i le gauga o lona ofu. Ina ua seʻi mai lona lima, ua toe lelei e pei o lona tino!+
8 “Pe a faapea e latou te lē talitonu iā te oe ma e lē uaʻi atu i le faamaoniga o le faailoga muamua, e mautinoa lava o le a latou talitonu i le faamaoniga o le faailoga mulimuli.+
9 Peitaʻi ane, pe afai e latou te lē talitonu foʻi i ia faailoga e lua ma e lē faalogo i lou leo,+ ona e asu ane lea o ni vai mai i le Vaitafe o le Naila ma sasaa i le eleele mātūtū; o le vai e te asuina mai i le Vaitafe o le Naila o le a liutoto lava i luga o le eleele mātūtū.”+
10 Ona fai atu lea o Mose iā Ieova: “Faamolemole Ieova e, e lē o aʻu o se failauga agavaa, talu mai ananafi, po o tala atu o ananafi, talu mai foʻi ona e fetalai mai i lau auauna, auā e lē lelei saʻu failauga.”+
11 Ona fetalai mai lea o Ieova iā te ia: “O ai na faia le gutu o le tagata, po o ai foʻi na faia o ē e gūgū, o ē e tutuli, o ē e lelei le vaai, po o ē ua pō le vaai? Pe e le o aʻu ea, o Ieova na faia ia mea?+
12 O lea, inā alu ia, ou te fesoasoani iā te oe pe a e tautala, ma aʻoaʻo atu foʻi iā te oe i upu e te tautala ai.”+
13 A ua fai atu o ia: “Ieova e, ou te faamālūlū atu, faamolemole ia e auina atu se tasi o lē ua e finagalo i ai.”
14 Ona tele lea o le toʻasā o Ieova iā Mose ma fetalai mai: “Pe e lē o lou uso ea Arona, o se tasi o le ʻau sa Levī?+ Ou te iloa e lelei lava lana failauga. O loo sau o ia e faafeiloaʻi iā te oe. Pe a vaai mai o ia iā te oe, e fiafia ai lona loto.+
15 Ia e tautala atu iā te ia ma faamatala atu upu e ao ona tautala ai lona gutu;+ ou te faatasi ma oe pe a e tautala atu, ma pe a tautala atu foʻi o ia,*+ ou te aʻoaʻo foʻi iā te oulua i mea lua te faia.+
16 E tautala atu o ia i le nuu e fai ma ou sui;+ e avea o ia ma fofoga taumomoli mo oe, ma e fai oe ma sui o le Atua iā te ia.+
17 E te uu lenei tootoo i lou lima ina ia e faia ai faailoga.”+
18 Ona alu lea o Mose ua foʻi atu iā Ietero le tamā o lana avā ma faapea atu:+ “Faamolemole, ua ou fia alu ma toe foʻi i oʻu uso i Aikupito ina ia ou iloa ai po o ola pea i latou.”+ Ua tali mai Ietero iā Mose: “Ua lelei, inā alu ia oe ma le filemu.”+
19 Ona fetalai mai lea o Ieova iā Mose i Mitiana: “Ia e foʻi atu i Aikupito auā ua feoti uma tagata na fia fasioti iā te oe.”+
20 Ua faatiʻetiʻe e Mose lana avā ma ona atalii i le asini ina ia toe foʻi o ia i Aikupito. Ua uu foʻi e Mose le tootoo o le Atua moni i lona lima.+
21 Ua toe fetalai mai Ieova iā Mose: “Pe a e alu ma foʻi atu i Aikupito ia e faia vavega uma, ua ou tuuina atu iā te oe le mana e faia ai i luma o Farao.+ A o aʻu ou te tuu ai pea o ia i lona lotomaaa;+ ma na te lē tuuina atu le nuu e ō.+
22 Ia e fai atu iā Farao, ‘O le mea lenei na fetalai mai ai Ieova: “O Isaraelu o loʻu atalii, o laʻu ulumatua.+
23 O le mea lea ou te fai atu ai iā te oe: Ia tuu mai loʻu atalii ina ia auauna iā te aʻu. Pe a e musu e tuu mai o ia ona ou fasiotia lea o lou atalii, o lau ulumatua.”’”+
24 Ua i le ala o ia i le mea e api ai,+ ua fetaiaʻi Ieova* ma ia+ ma ua saʻili pea e ia se auala e fasiotia ai o ia.+
25 Mulimuli ane, ona tago lea o Sepora+ i se maa e maʻai ona pito ma tipi ai le paʻu*+ o le tino o lana tama, ua ia lafo atu i ona vae ma faapea atu: “Ua avea oe o se alii faaipoipo iā te aʻu e ala i lenei toto.”
26 Ua ia faamamulu o ia. Ua faapea atu Sepora: “O se alii faaipoipo e ala i lenei toto,” ona o le peritomega.
27 Ua fetalai mai Ieova iā Arona: “Ia e alu e faafetaui Mose i le toafa.”+ Ona alu lea o ia ma ua la fetaui ma ia i le mauga o le Atua moni+ ma sogi atu iā te ia.
28 Ona faamatala atu lea e Mose iā Arona o afioga uma a Ieova, o lē na auina mai o ia,+ ma faailoga uma na poloaʻi mai iā te ia e fai.+
29 Ua mavae lea, ona ō lea o Mose ma Arona ua la faapotopotoina toeaina uma o le fanauga a Isaraelu.+
30 Ua faamatala atu e Arona upu uma na fetalai mai ai Ieova iā Mose,+ ma ua ia faia faailoga+ a o vāai i ai le nuu.
31 Ona talitonu ai lea o le nuu.+ Ina ua latou faalogo ua liuliualo+ mai Ieova i le fanauga a Isaraelu, ma ua ia silafia le sauāina+ o i latou, ona latou punonou lea ma faapaʻuʻū faō.+
Faamatalaga Pito i Lalo
^ I le gagana Eperu, “Ou te faatasi ma lou gutu atoa ma lona gutu.”
^ E tusa ai ma isi manusikulipi o le “agelu a Ieova.”
^ O le “paʻu” lenei e faasino atu i le paʻu o totogasā o lenei tamaitiiti.
