Esoto 5:1-23
5 Mulimuli ane, ua ō atu Mose ma Arona ma faapea atu iā Farao:+ “O le fetalaiga lenei a Ieova le Atua o Isaraelu, ‘Ia tuu mai loʻu nuu e ō ina ia o latou faamanatu se tausamiga iā te aʻu i le toafa.’”+
2 Ae ua faapea mai Farao: “O ai Ieova+ ou te faalogo ai i lona leo ma tuu atu tagata Isaraelu e ō?+ Ou te lē iloa lava Ieova,+ ma ou te lē tuuina atu foʻi tagata Isaraelu e ō.”+
3 A ua la faapea atu: “Na matou feiloaʻi ma le Atua o tagata Eperu.+ Faamolemole, matou te fia ō i se malaga e tusa ma le tolu aso i le toafa, ma fai taulaga ai iā Ieova lo matou Atua;+ a leai, atonu e na te taia i matou i se faamaʻi po o le pelu.”+
4 Ona fai mai lea o le tupu o Aikupito iā i laʻua: “Mose ma Arona, aiseā ua lua faapogaia ai tagata e tuu a latou galuega?+ Ia ō ma amo pea a outou avega!”+
5 Ua toe faapea mai Farao: “Faauta! Ua faatoʻateleina lenei nuu.*+ Ae o oulua ua māfua ai ona tuu e nei tagata a latou avega.”+
6 I lea lava aso, ua poloaʻi atu ai Farao i pule+ o ē e tutuli faamalosi le nuu e fai galuega ma o latou leoleo e faapea:
7 “Aua neʻi outou toe aoao maia vao mamago ma avatu i tagata e fai ai piliki+ e pei o le taimi muamua. Ia ō i latou lava e ao mai ni a latou vao mamago.
8 Ia outou tutuli faamalosi foʻi i latou ia faia le aofaʻiga o piliki e pei o le taimi muamua. Ia aua neʻi outou faaitiitia le aofaʻiga mo i latou, auā ua faapalapala i latou.+ O le mea lea, ua latou alaga mai ai: ‘Ua matou fia ō e fai taulaga i lo matou Atua!’+
9 Ia faamamafa galuega a nei tagata, ina ia pisi ai ma aua neʻi faalogo atu ai i latou i ni tala sesē.”+
10 Ua ō atu pule o ē e tutuli faamalosi le nuu e faia galuega+ ma o latou leoleo, ma fai atu i le nuu: “O le poloaʻiga lenei a Farao, ‘Ou te lē toe avatu iā te outou vao mamago.
11 Inā ō ia outou ma aumai vao mamago mo outou po o fea lava tou te maua ai, auā e lē faaitiitia lava a outou galuega.’”+
12 Ona taapeape ai lea o le nuu i le laueleele e ao mai vao mamago mai i fanua ua uma ona seleseleina.
13 Ua faatonu atu ē o loo tutuli faamalosi i latou+ e faia galuega e faapea: “Ia faamāeʻa a outou galuega, o le aso ma le galuega a le tagata, e pei lava o le taimi na saunia ai vao mamago mo outou.”+
14 Mulimuli ane, ua sasaina+ leoleo+ o le fanauga a Isaraelu, sa tofia e pule a Farao e vaavaaia le nuu ma ua faapea atu: “Aiseā ua lē atoa ai le aofaʻiga o piliki+ na outou faia ananafi ma le asō, e pei ona masani ona faia ai muamua?”+
15 Ua ō atu leoleo+ o le fanauga a Isaraelu ma tagi atu iā Farao, e faapea: “Aiseā ua e faia ai faapea au auauna?
16 Ua leai ni vao mamago ua aumaia i au auauna ae ua faatonuina i matou, ‘Ia faia piliki!’ ua latou sasaina foʻi i matou, a o ou lava tagata ua sesē.”+
17 A ua fai mai o ia: “Ua outou faapalapala, ua outou faapalapala lava!+ O le mea lea, ua outou faapea mai ai, ‘Ua matou fia ō e fai taulaga iā Ieova.’+
18 O lea, ia ō e galulue! E tusa pe lē avatua vao mamago iā te outou, ae ia outou faia le aofaʻiga lava lea o piliki.”+
19 Ona iloa lea e leoleo o le fanauga a Isaraelu, ua iai i latou i se tulaga pagatia,+ talu ai e tatau ona latou faia le aofaʻiga lava e tasi o piliki i aso uma e pei ona iai muamua.+
20 A o latou ō ese mai iā Farao, ona latou fetaui lea ma Mose ma Arona,+ o faatalitali atu iā i latou.
21 Ua latou fai atu iā i laʻua: “Tau ina silasila mai Ieova iā te oulua ma faamasino+ oulua, talu ai o oulua ua māfua ai ona ʻinoʻino+ mai Farao ma ana auauna iā i matou, ma ua oulua tuuina le pelu i o latou lima e fasioti ai i matou.”+
22 Ua liliu atu Mose iā Ieova+ ma faapea atu: “Ieova e, aiseā ua e faapogaia ai le leaga i lenei nuu?+ Aiseā foʻi ua e auina mai ai aʻu?+
23 Talu mai le taimi na ou alu atu ai i luma o Farao e tautala i lou suafa,+ na ia faia ai mea leaga i lenei nuu,+ a o lenei ua e lē laveaʻia lava lou nuu.”+
Faamatalaga Pito i Lalo
^ I le gagana Eperu, o “tagata o le laueleele.” E mai i le upu Eperu am ha·aʹrets.
