Esoto 6:1-30
6 Ua fetalai mai Ieova iā Mose: “O le a e vaai i le mea ou te faia iā Farao,+ auā o le lima malosi o le a ia tuu mai ai i latou e ō, ma o le lima malosi foʻi o le a tuliesea ai i latou mai i lona atunuu.”+
2 Ua fetalai atili mai le Atua iā Mose e faapea: “O aʻu o Ieova.+
3 Na iloa aʻu e Aperaamo,+ Isaako+ ma Iakopo,+ o le Atua o Lē e ona le malosi uma lava,+ ae ou te leʻi matuā faailoa+ atu aʻu iā te i latou e tusa ma loʻu igoa o Ieova.+
4 Na ou osia foʻi laʻu feagaiga ma i latou, ina ia avatu iā i latou le laueleele o Kanana, le atunuu lea na latou aumau ai o ni tagata ese.+
5 O aʻu foʻi ua ou faalogo i le ōi o le fanauga a Isaraelu,+ o ē ua faapologaina e tagata Aikupito, ma ou manatua ai laʻu feagaiga.+
6 “O lea, ia fai atu i le fanauga a Isaraelu, ‘O aʻu o Ieova, ou te faasaʻolotoina outou mai i galuega mamafa a tagata Aikupito, ma laveaʻi outou mai i le nofo pologa+ iā i latou, ma ou te laveaʻiina foʻi outou i le lima faaloaloa ma faasalaga mataʻutia.+
7 E faia outou ma oʻu nuu,+ ma avea aʻu ma o outou Atua;+ e tou te iloa ai o aʻu lava o Ieova lo outou Atua, o lē ua faasaʻolotoina outou mai i avega mamafa a Aikupito.+
8 Ou te avatu outou i le laueleele na sii ai loʻu lima ma ou tautō+ ai e avatu iā Aperaamo, Isaako ma Iakopo; ou te avatu iā te outou e fai ma o outou tofi.+ O aʻu o Ieova.’”+
9 Ona tautala atu lea o Mose i le fanauga a Isaraelu e tusa ma ia mea, ae e leʻi faalogo i latou iā Mose ona o le lotovaivai ma le faigatā o le nofo pologa.+
10 Ona fetalai mai lea o Ieova iā Mose e faapea:
11 “Ia e alu atu ma e fai atu iā Farao le tupu o Aikupito,+ e ao ona ia faataga le fanauga a Isaraelu e ō ese mai i lona atunuu.”+
12 Ae peitaʻi, ua fai atu Mose iā Ieova e faapea: “Silasila foʻi! e leʻi faalogo le fanauga a Isaraelu iā te aʻu;+ e faapefea ona faalogo mai Farao iā te aʻu,+ e faigatā ona ou tautala?”*+
13 Ae ua fetalai mai pea Ieova iā Mose ma Arona, ina ia la faailoa atu ana poloaʻiga i le fanauga a Isaraelu ma Farao le tupu o Aikupito, ina ia aveese mai le fanauga a Isaraelu mai i le atunuu o Aikupito.+
14 O ulu nei o aiga o o latou tamā: O atalii o Reupena le ulumatua+ a Isaraelu, o Hanoka, o Falu, o Esarona ma Karame.+ O i latou nei na tupuga mai iā Reupena.+
15 O atalii o Simeona, o Iemuelu, o Iaminu, o Oata, o Iakinu, o Soaro ma Sekulo le tama a le fafine Kanana.+ O i latou nei na tupuga mai iā Simeona.+
16 O igoa nei o atalii o Levi+ e tusa ma tupuaga+ o o latou aiga: o Keresona, o Koato ma Merari.+ E selau tolu fitu tausaga na ola ai Levi.
17 O atalii o Keresona, o Lipeni ma Semi+ e tusa ma o la aiga.+
18 O atalii o Koato, o Amaramo, o Isara, o Heperona ma Usialu.+ E selau tolu sefulu tolu tausaga na ola ai Koato.
19 O atalii o Merari, o Maali ma Muse.+
O aiga nei o le ʻau sa Levī, e tusa ma o latou tupuaga.+
20 Na ave e Amaramo Iokapeta le tuafafine o lona tamā e fai ma ana avā.+ Mulimuli ane na fanaua e Iokapeta o Arona ma Mose.+ E selau tolu sefulu fitu tausaga na ola ai Amaramo.
21 O atalii o Isara, o Koru,+ o Nefeku ma Sekari.
22 O atalii o Usialu, o Mesaelu, o Elisafano ma Seteri.+
23 Na ave e Arona o Elisapela, le afafine o Aminatapu, o le tuafafine o Naasona,+ e fai ma ana avā. Mulimuli ane na fanaua e Elisapela mai iā te ia o Natapu, o Aviu, o Eleasaro ma Itamaro.+
24 O atalii o Koru, o Asiro, o Elekana ma Aviasafo.+ O le aiga lea o tagata Koru.+
25 Na ave e Eleasaro, o le atalii+ o Arona se tasi o afafine o Potialu e fai ma ana avā. Mulimuli ane na ia fanaua mai iā te ia o Fineaso.+
O ulu nei o aiga tamā o le ʻau sa Levī, e tusa ai ma o latou aiga.+
26 O gafa ia o Arona ma Mose o ē na fetalai i ai Ieova:+ “Ia aveese le fanauga a Isaraelu mai i Aikupito e pei o se ʻautau.”+
27 O i laʻua ia na fai iā Farao, le tupu o Aikupito, ina ia aveese le fanauga a Isaraelu mai i Aikupito.+ O Mose lenei ma Arona.
28 Ua oo i le aso na fetalai mai ai Ieova iā Mose i le laueleele o Aikupito,+
29 ina ua fetalai mai Ieova iā Mose: “O aʻu o Ieova.+ Ia e taʻu atu iā Farao, le tupu o Aikupito mea uma ua ou fai atu ai iā te oe.”
30 Ona fai atu lea o Mose iā Ieova: “Silasila foʻi! e faigatā ona ou tautala,* e faapefea ona faalogo mai Farao iā te aʻu?”+
Faamatalaga Pito i Lalo
^ I le gagana Eperu, “E leʻi peritomeina le laugutu.” O lona uiga e pei ua iai le paʻu i luga o le laugutu ma faigatā ai ona tautala.
^ Tagaʻi i le faamatalaga pito i lalo o le fuai e 12.
