Esoto 7:1-25
7 Ua fetalai mai Ieova iā Mose: “O le mea lea, ua ou tofia ai oe, e fai ma Atua iā Farao,+ ma o lou uso foʻi o Arona e fai ma perofeta+ e tautala mo oe.
2 A o oe lava e te taʻu atu mea uma ua ou poloaʻi atu ai iā te oe;+ o le a tautala lou uso o Arona iā Farao,+ ma o le a tuu mai e ia le fanauga a Isaraelu e ō ese mai i lona atunuu.+
3 A o aʻu, ou te tuu ai pea Farao ia faamaaaina lona loto,+ ma ou te matuā faateleina aʻu faailoga ma vavega i le laueleele o Aikupito.+
4 Ae e lē faalogo mai Farao iā te oulua;+ ma ou te faaoo loʻu lima i Aikupito atoa ma faasalaga+ mataʻutia, ou te aveese foʻi loʻu nuu,+ o le fanauga lea a Isaraelu+ e pei o se ʻautau,+ mai i le laueleele o Aikupito.
5 E iloa foʻi e tagata Aikupito o aʻu o Ieova pe a ou faaloaloa loʻu lima e faasaga iā Aikupito,+ ma ou te aveese le fanauga a Isaraelu mai iā i latou.”+
6 Ua faia e Mose ma Arona e pei ona poloaʻi mai ai Ieova iā i laʻua.+ Ua faapea lava ona la faia.+
7 Ua valu sefulu tausaga o Mose a o Arona e valu sefulu tolu ona tausaga, i le taimi ua la feagai ai ma Farao.+
8 Ona fetalai mai lea o Ieova iā Mose ma Arona:
9 “Pe afai e faapea mai Farao iā te oulua, ‘Ia oulua faia se vavega e faamaonia ai oulua,’+ ona e fai atu lea iā Arona, ‘Ia ave le tootoo+ ma togi i luma o Farao.’ O le a liu le tootoo i se gata lapoʻa.”+
10 Ona ō atu lea o Mose ma Arona iā Farao ma ua faia e pei ona poloaʻi mai ai Ieova. Ua togi e Arona le tootoo i luma o Farao ma ana auauna, ona liu ai lea i se gata lapoʻa.
11 Peitaʻi, ua aami e Farao ona tagata atamamai, ma faataulāitu;+ ona faapea foʻi lea ona faia e ositaulaga e faia faiga faaagaga o Aikupito, i a latou faiga faaagaga.+
12 Ua taʻitasi ma togi i lalo lona tootoo ma ua liu ai i ni gata lapopoʻa; ae ua folo e le tootoo o Arona o latou tootoo.
13 A ua maaa le loto o Farao,+ e leʻi faalogo iā i laʻua e pei ona fetalai mai ai Ieova.
14 Ona fetalai mai lea o Ieova iā Mose: “Ua maaa le loto o Farao.+ Ua lē tuuina mai e ia le nuu e ō.+
15 O le mea lenei e te faia a taeao: Pe a alu atu Farao i le Vaitafe o le Naila,+ ia e alu e faafetaiaʻi o ia, ia e tū i le auvai o le vaitafe, ma ia uu i lou lima le tootoo lea na liu gata.+
16 Ia e fai atu iā te ia, ‘Ua auina mai aʻu e Ieova le Atua o tagata Eperu iā te oe,+ ma ua fetalai mai: “Ia tuu mai loʻu nuu ina ia latou ō ma auauna mai iā te aʻu i le toafa,”+ a o lea ua e lē usitaʻi seʻia oo mai i le asō.
17 O le fetalaiga lenei a Ieova:+ “E ala i lenei mea e te iloa ai o aʻu o Ieova.+ O le mea lea ou te taia ai i le tootoo le vai o le Vaitafe o le Naila,+ ma liutoto ai le vai.+
18 O le a mamate iʻa o le Vaitafe o le Naila,+ e elo foʻi le Vaitafe o le Naila,+ ma e lē toe fia feinu tagata Aikupito i vai mai i le Vaitafe o le Naila.”’”+
19 Ona fetalai mai lea o Ieova iā Mose: “Ia fai atu iā Arona, ‘Ia ave lou tootoo ma faaloaloa lou lima+ i luga o vai o Aikupito, i o latou vaitafe, i o latou alāvai o le Naila, i o latou taufusi,+ ma o latou faatanoa vai, ina ia liutoto uma nei vai.’ O le a iai foʻi le toto i le laueleele uma o Aikupito ma i totonu o ipu laau ma ipu maa.”
20 Ona faia lea faapea+ e Mose ma Arona e pei ona poloaʻi+ mai ai Ieova, ua sii i luga e Arona le tootoo ma taia le vai o le Vaitafe o le Naila i luma o Farao ma ana auauna,+ ona liutoto ai lea o vai uma i le Vaitafe o le Naila.+
21 Ua mamate uma ai iʻa na i le Vaitafe o le Naila,+ ua elo le Vaitafe o le Naila; ua lē mafai foʻi ona feinu tagata Aikupito i vai mai i le Vaitafe o le Naila;+ ma ua iai le toto i le laueleele uma o Aikupito.
22 Peitaʻi ua faapea foʻi ona faia e ositaulaga o ē e fai faiga faaagaga o Aikupito i a latou faiga lilo faaagaga;+ o le mea lea ua maaa ai pea le loto o Farao,+ ma ua lē faalogo ai iā i laʻua e pei ona fetalai mai ai Ieova.+
23 Ona liliu lea o Farao ma alu i lona fale ma e leʻi ano foʻi i lenei mea.+
24 Ua eli e tagata uma o Aikupito tala ane o le Vaitafe o le Naila pe maua ai se vai e feinu ai, auā ua lē mafai ona latou feinu i se vai o le Vaitafe o Naila.+
25 Ua oo ina mavae aso e fitu talu ona taia e Ieova le Vaitafe o le Naila.
