Faaaliga 14:1-20
14 Ona ou iloa lea, faauta foʻi! o loo tū mai le Tamaʻi Mamoe+ i le Mauga o Siona,+ o loo faatasi ma ia le selau fā sefulu fā afe,+ o ē ua tusia lona suafa ma le suafa o lona Tamā+ i o latou muāulu.
2 Ona ou faalogo lea i leo e sau mai i le lagi e pei o le leo o vai+ e tele, ma e pei foʻi o le pāpā o faititili tetele; o leo foʻi na ou faalogo ai e pei o tagata pepese o loo iai a latou kitara,*+ ma o loo tāina foʻi a latou kitara.
3 Ua latou usuina+ foʻi le pese e peiseaʻī o se pese fou+ i luma o le nofoālii, ma foafoaga agaga+ e toʻafā ma toeaina;+ ma ua leai se tasi e mafai ona aʻoaʻoina lelei i lea pese, ae ua na o le selau fā sefulu fā afe,+ o ē na faatauina+ mai i le lalolagi.
4 O i latou ia e leʻi faaleagaina i fafine;+ auā o le mea moni, e mamā*+ i latou. O i latou foʻi nei ua mulimuli atu i le Tamaʻi Mamoe i mea uma e alu i ai o ia.+ O i latou ia ua faatauina+ mai i tagata o uluaʻi fua+ mo le Atua ma le Tamaʻi Mamoe,
5 e leai se pepelo e maua i o latou gutu;+ e lē ponā foʻi i latou.+
6 Ona ou iloa lea o le isi agelu o loo lele i le taulotoaʻiga o le lagi,+ ua iā te ia le tala lelei+ e faavavau e folafola atu, o se tala fiafia i ē o loo nonofo i le lalolagi, ma nuu uma, ma ituaiga uma, ma gagana uma, ma tagata uma,+
7 ua faapea atu ma le leotele: “Ia matataʻu i le Atua+ ma ia faamamaluina+ o ia, auā ua oo mai le itula o lana faamasinoga,+ ma ia tapuaʻi i Lē na faia le lagi,+ ma le lalolagi, ma le sami, ma vaipuna.”+
8 Ona mulimuli atu lea o le isi agelu, o le lona lua lea, ua faapea atu: “Ua paʻū o ia! Ua paʻū+ Papelonia+ le Aai Tele, o lē ua ia faainu nuu uma i le uaina+ o le toʻasā o lana faitaaga!”+
9 Ona mulimuli mai lea iā i laʻua o le isi agelu, o le lona tolu lea, ua faapea atu ma le leotele: “Afai e tapuaʻi se tasi i le manufeʻai+ ma lona faatusa,+ ma maua le faailoga i lona muāulu po o i lona lima,+
10 e inu foʻi o ia i le uaina e lē suia o le toʻasā o le Atua ua liligiina atu i le ipu o lona toʻasā,+ ma e faatigāina+ foʻi o ia i le afi ma le teiō+ i luma o le silafaga a agelu paia, ma le silafaga a le Tamaʻi Mamoe.
11 E alu aʻe foʻi e faavavau, faavavau lava+ le asu o lo latou tigā, ma e lē mālōlō foʻi i le ao ma le pō i latou o ē e tapuaʻi i le manufeʻai ma lona faatusa, ma so o se tasi e mauaina le faailoga+ o lona igoa.
12 O le mea lenei e manaʻomia ai le tumau o le ʻaupaia,+ o i latou o loo tausi i poloaʻiga a le Atua+ ma le faatuatua+ o Iesu.”
13 Ua ou faalogo foʻi i le leo mai i le lagi, ua faapea mai: “Inā tusi ia: E fiafia o ē e oti+ a o autasi ma le Alii+ e amata atu nei.+ Ioe, ua faapea mai le agaga, inā tuu pea ia i latou e mālōlō mai i a latou galuega tigā, auā o mea na latou faia e mulimuli atu iā i latou.”
14 Ona ou iloa lea, faauta foʻi! o se ao paʻepaʻe, ma i luga o le ao o loo tiʻetiʻe ai se tasi e pei o le atalii o le tagata,+ o loo iai se palealii+ auro i lona ulu, ma se selesaito maʻai i lona lima.
15 Ona sau lea o le isi agelu mai i potu paia o le malumalu, ua alaga atu ma le leotele i lē o loo tiʻetiʻe i le ao: “Ia tago ia i lau selesaito ma selesele,+ auā ua oo mai le itula e selesele ai, auā ua matuā pula+ lava le fuata+ o le lalolagi.”
16 Ona faaoo atu lea e lē o loo tiʻetiʻe i le ao lana selesaito ma selesele ai le lalolagi.
17 Ona sau lea o le isi agelu mai i potu paia o le malumalu lea o loo i le lagi,+ ua iā te ia foʻi se selesaito maʻai.
18 Ua sau foʻi le isi agelu mai le fata faitaulaga ma ua iā te ia le pule i le afi.+ Ua ia alaga atu ma le leotele i lē o loo iai le selesaito maʻai e faapea: “Ia tago ia i lau selesaito ma aoao mai fuifui vine o le lalolagi,+ auā ua pula ona vine.”
19 Ona tuu atu lea e le agelu+ o lana selesaito i le lalolagi, ma aoao mai ai vine+ o le lalolagi, ona ia lafo lea o vine i le soligavine tele o le toʻasā o le Atua.+
20 Ua solia foʻi le soligavine i tua o le aai,+ ma ua tafe mai le toto mai i le soligavine ua oo atu i faagutu o solofanua,+ o le mamao e afe ono selau falelogi.*+
Faamatalaga Pito i Lalo
^ O se meafaifaaili anamua e ese mai i le kitara i aso nei. O le upu Peretania o le harp.
^ I le gagana Eleni, “o taupou.”
^ Pe tusa e 296 kilomita. O le “falelogi” o se fua faa-Eleni i aso anamua e iloa ai le mamao o se mea.
