Faaaliga 18:1-24
18 Ua mavae nei mea, ona ou iloa atu lea o le tasi agelu ua alu ifo mai i le lagi ma le pule tele;+ ua faamalamalamaina foʻi le lalolagi i lona mamalu.+
2 Ua ia alaga atu i se leo malosi+ e faapea: “Ua paʻū o ia! Ua paʻū Papelonia le Aai Tele,+ ua avea ma mea e nonofo ai temoni, ma mea e iai le ʻea namu leaga+ ma oona, ma mea e iai manulele lē mamā uma ma inosia!+
3 Ua maileia+ nuu uma ona o le uaina o le toʻasā o lana faitaaga,* ma ua faia foʻi e tupu o le lalolagi le faitaaga+ ma ia, ua mauʻoa foʻi le ʻaufaatauʻoa+ o loo femalagaaʻi o le lalolagi ona o lona mauʻoa tele,+ lea e lē māsiasi ai.”
4 Ua ou faalogo foʻi i le tasi leo mai i le lagi, ua faapea mai: “Loʻu nuu e, ia outou ō ese mai iā te ia,+ pe afai tou te lē mananaʻo e tofusia i ana agasala,+ ma lē mananaʻo e aafia i ona mala.
5 Auā ua tele ana agasala ma ua oo atu i le lagi,+ ua manatua foʻi e le Atua ana gaoioiga lē tonu.+
6 Ia taui atu iā te ia e pei ona ia taui+ atu i isi, ma ia faia faalua iā te ia, e faaluaina mea na ia faia;+ o le ipu+ ua ia tuuina i ai le meainu, ia faaluaina+ i ai le meainu mo ia.+
7 Auā e pei ona faamamaluina e ia o ia lava ma ola i se olaga matuā mauʻoa e lē māsiasi ai, ia faapea foʻi ona faatigāina o ia ma faavauvau ai.+ Auā ua ia faapea ifo i lona loto, ‘ou te nofo o se tupu fafine,+ e lē o aʻu o se fafine ua oti lana tane,+ ma e lē taitai ona ou faavauvau.’+
8 O le mea lenā e oo mai ai ona mala+ i le aso e tasi, o le oti, ma le faavauvau, ma le oge, ma e susunuina uma o ia i le afi,+ auā e mamana Ieova le Atua, o lē e faamasino iā te ia.+
9 “O tupu+ foʻi o le lalolagi o ē na faia le faitaaga ma ia, ma ola i ni olaga matuā mauʻoa e lē māsiasi ai, e latou te fetagisi ma taufaitagituʻi i le faanoanoa ona o ia,+ pe a latou vāai atu i le asu+ a o susunuina o ia,
10 ua latou tutū mamao mai ona o lo latou fefefe i ona puapuaga ma faapea ane,+ ‘Oi talofa, oi talofa, iā te oe le aai tele,+ Papelonia le aai malosi, auā o le itula e tasi ua oo mai ai lou faamasinoga!’+
11 “Ua fetagisi foʻi ma faanoanoa+ le ʻaufaatauʻoa+ o loo femalagaaʻi o le lalolagi ona o ia, auā ua leai se tasi e toe faatauina a latou oloa e matuā tele,
12 o oloa e matuā tele+ o auro, ma siliva, ma maa tāua, ma penina, ma ʻie lino lelei, ma ʻie violē ma silika, ma mūmū sesega; ma mea uma e fai mai i laau manogi, ma so o se mea e fai mai i nifo elefane, ma so o se mea e fai mai i laau e sili ona lelei, ma le ʻapamemea ma le uʻamea, ma le maamora;+
13 faapea foʻi ma le kinamoni, ma mea faamanogi meaʻai mai i Initia, ma mea manogi e mū, ma suāuu manogi, ma mea manogi papaʻe e mū, ma le uaina, ma le suāuu olive, ma le falaoamata lelei, ma le saito, o povi ma mamoe, o solofanua, ma taavale e toso e solofanua, o pologa ma tagata.+
14 Ioe, ua mou atu mai iā te oe fua lelei na e naunau+ i ai, ua mavae atu foʻi mai iā te oe mea mananaia ma mea matuā matagofie lava, e lē toe maua lava e tagata.+
15 “O tagata faatauʻoa+ o loo femalagaaʻi e ona mea nei, o ē ua mauʻoa ona o ia, e tutū mamao ese ona o lo latou fefefe i ona puapuaga, ma e fetagisi foʻi ma faavauvau,+
16 ma faapea atu, ‘Oi talofa, oi talofa, i le aai tele,+ na ofu i le ʻie lino lelei ma ofu violē ma mūmū sesega, ma na teuteu faamatagofie i auro, ma maa tāua ma penina,+
17 auā e tasi le itula ua faaumatia ai ana oloa e tele!’+
“Ua tutū mamao ese foʻi kapeteni o vaa, ma tagata uma e faimalaga i so o se mea,+ ma ʻauvaa, ma i latou uma na fai fefaatauaʻiga i le vasa+
18 ma ua latou alalaga atu ina ua latou vaaia le asu a o susunuina o ia, ua latou faapea atu, ‘O fea se aai e tusa ma lenei aai tele?’+
19 Ua latou asu aʻe le efuefu i o latou ulu+ ma alalaga, ma fetagisi ma faavauvau,+ ma faapea atu: ‘Oi talofa, oi talofa, i le aai tele, lea na mauʻoa+ ai i latou na iai vaa i le sami,+ ona o le taugatā tele o ana mea, auā o le itula e tasi ua faatamaʻia ai o ia!’+
20 “Le lagi e, ia fiafia ona o ia,+ faapea outou le ʻaupaia,+ ma outou aposetolo,+ ma outou perofeta, auā ua faasalaina o ia e le Atua ona o outou!”+
21 Ona sii aʻe lea e le agelu malosi o le maa e pei o se maa olo tele,+ ma lafo ifo i le sami,+ ma faapea atu: “E faapena foʻi ona vave lafotuina Papelonia le aai tele, ma e lē toe maua lava o ia.+
22 E lē toe lagonaina foʻi iā te oe leo o tagata pepese o loo tā a latou kitara,* ma tagata fai musika, ma ē ili fāʻili, ma ē e ili pū,+ e lē toe maua foʻi iā te oe ni tufuga e faia so o se galuega, ma e lē toe lagonaina foʻi iā te oe le paʻō o se maa olo,
23 e lē toe susulu ai foʻi iā te oe le malamalama o se molī, e lē toe lagona foʻi iā te oe le leo o le alii ma le tamaʻitaʻi faaipoipo;+ auā o ou tagata faatauʻoa+ o loo femalagaaʻi, na avea ma tagata aloaʻia+ o le lalolagi, auā na faasesēina atunuu uma i au faiga faaagaga.+
24 Ioe, ua maua i lenei aai le toto+ o le ʻauperofeta,+ ma le ʻaupaia,+ ma tagata uma ua fasiotia i le lalolagi.”+
Faamatalaga Pito i Lalo
^ Pe “ona o le uaina o lana faitaaga lea e faatupu ai le tuʻinanau i feusuaʻiga.”
^ O se meafaifaaili anamua e ese mai i le kitara i aso nei. O le upu Peretania o le harp.
