Faaaliga 21:1-27
21 Ona ou iloa lea o le lagi fou+ ma le lalolagi fou;+ auā ua mavae atu le uluaʻi lagi+ ma le uluaʻi lalolagi,+ ua lē toe iai foʻi se sami.+
2 Ua ou iloa foʻi le aai paia+ o Ierusalema Fou, ua alu ifo mai i le lagi+ mai i le Atua, ua saunia e faapei o se tamaʻitaʻi faaipoipo+ ua teuteuina mo lona alii.+
3 Ona ou faalogo lea i le leotele mai i le nofoālii e faapea: “Faauta! Ua iai i tagata le faleʻie+ o le Atua, e mau o ia ma i latou,+ e fai foʻi i latou ma ona tagata.+ E faatasi foʻi le Atua ma i latou.+
4 E na te soloiesea foʻi loimata+ uma i o latou mata, e lē toe iai se oti,+ po o se faanoanoa, po o se tagiauē, e lē toe iai foʻi se tigā.+ Auā ua mavae atu mea muamua.”+
5 Ona fetalai mai lea o Lē o loo afio i le nofoālii:+ “Faauta! Ou te faia ia fou mea uma lava.”+ Ua ia toe fetalai mai foʻi: “Ia tusi, auā o upu nei e faamaoni ma moni.”
6 Ua fetalai mai foʻi o ia iā te aʻu: “Ua taunuu! O aʻu o le Alefa ma le Omeka, o le amataga ma le gataaga.+ O so o se tasi e fia inu, ou te avatu fua i ai vai mai i le puna o le vai ola.+
7 O lē e manumalo e fai ma ona tofi nei mea, ma e avea aʻu ma ona Atua,+ e fai foʻi o ia ma oʻu atalii.+
8 A o ē e palaaai, ma ē e lē faatuatua,+ ma ē e faia mea matagā e inosia,+ ma ē e fasioti tagata,+ ma ē e faitaaga,+ ma ē e faia faiga faaagaga, ma ē e ifo i tupua,+ ma ē uma e tala pepelo,+ o lo latou iʻuga o le lepa e mū i le afi+ ma le teiō.+ O lona uiga, o le oti faalua lea.”+
9 Ona sau lea o le tasi o agelu e toʻafitu na iai ipu e fitu, na tumu i mala mulimuli e fitu,+ ua ia faapea mai iā te aʻu: “Sau i inei, ou te faaali atu iā te oe le tamaʻitaʻi faaipoipo, o le faletua lea o le Tamaʻi Mamoe.”+
10 Ona ia ave lea o aʻu i le mana o le agaga i luga o se mauga telē+ e maualuga, ma faaali mai iā te aʻu le aai paia+ o Ierusalema, ua alu ifo mai i le lagi mai i le Atua,+
11 ua iā te ia le mamalu o le Atua.+ O lona pupula ua pei o se maa e sili ona tāua, ua iila ma matuā manino e pei o le maa iasepi.+
12 Ua iai se pā telē ma maualuga,+ ma e sefulu lua faitotoʻa, e toʻasefulu lua foʻi agelu o loo i faitotoʻa, o loo tusia ai igoa o ituaiga e sefulu lua o le fanauga a Isaraelu.+
13 Ua iai faitotoʻa e tolu i le itu i sasaʻe, ma faitotoʻa e tolu i le itu i mātū, e iai foʻi faitotoʻa e tolu i le itu i saute, ma faitotoʻa e tolu i le itu i sisifo.+
14 Ua iai foʻi i le pā o le aai o maa faavae+ e sefulu lua, ua tusia ai igoa e sefulu ma le lua o aposetolo e toʻasefulu lua+ o le Tamaʻi Mamoe.
15 O lē o loo tautala mai iā te aʻu, ua ia uuina se ū+ auro, o le fua lea e na te fuaina ai le aai, ma ona faitotoʻa, ma ona pā.+
16 Ua taatia faatafafā le aai, e tutusa lona umi ma lona lautele. Ua ia fuaina foʻi le aai+ i le ū, e sefulu lua afe falelogi;* e tutusa lelei lona umi, ma lona lautele, ma lona maualuga.
17 Ua ia fuaina foʻi le pā, e selau fā sefulu ma le fā kupita* e tusa ma le fua a le tagata, o le fua foʻi lea a le agelu.
18 Ua fausia ona pā i maa iasepi,+ ma ua fausia le aai i auro māoʻi e pei o le tioata manino.
19 Ua teuteuina foʻi faavae+ o le pā o le aai i ituaiga uma o maa tāua*+ eseese: o le faavae muamua o le iasepi,+ o lona lua o le safaira,+ o lona tolu o le kakito, o lona fā o le samaraki,+
20 o lona lima o le saritonu, o lona ono o le salikea, o lona fitu o le tasesa,+ o lona valu o le soama, o lona iva o le topasi,+ o lona sefulu o le kuasopera, o lona sefulu ma le tasi o le uakini, ma o lona sefulu ma le lua o le aselama.+
21 O faitotoʻa foʻi e sefulu lua o ni penina e sefulu lua; o faitotoʻa taʻitasi ua fai mai i penina+ taʻitasi. O le ala tele o le aai o le auro māoʻi lea, e manino e pei o se tioata.
22 Ou te leʻi vaaia ai foʻi se malumalu,+ auā o Ieova+ le Atua o Lē e ona le malosi uma lava,+ o le malumalu+ lea, faapea foʻi ma le Tamaʻi Mamoe.+
23 E lē manaʻomia ona susulu i le aai le lā po o le masina, auā ua faamalamalamaina+ i le mamalu o le Atua, ma o lona molī o le Tamaʻi Mamoe lea.+
24 E savavali foʻi atunuu uma i lona malamalama,+ ma e tuuina atu i ai e tupu o le lalolagi o latou mamalu.+
25 E lē tapunia lava ona faitotoʻa i le ao atoa,+ auā e lē oo se pō i lea mea.+
26 E latou te tuuina atu i ai le mamalu ma le viiga o nuu.+
27 Ae e lē ulu lava i ai se mea+ e lē paia, po o se tasi e faia se mea matagā,+ po o se tala pepelo;+ e na o ē ua tusia i le tusi tāʻai o le ola a le Tamaʻi Mamoe.+
Faamatalaga Pito i Lalo
^ Pe tusa e 2,220 kilomita. O le “falelogi” o se fua faa-Eleni i aso anamua e iloa ai le mamao o se mea. Tagaʻi i le Faaopoopoga e 14.
^ Pe tusa e 64 mita.
^ O nei maa tāua e eseese o latou lanu, ma e felanulanuaʻi foʻi isi maa.
