Faaaliga 8:1-13
8 Ina ua ia+ tatalaina le faamaufaailoga+ lona fitu, ona lē toe lagona ai lea o se leo i le lagi mo le ʻafa itula.
2 Ua ou iloa foʻi agelu+ e toʻafitu o loo tutū i luma o le Atua, ma ua tuuina atu iā i latou pū e fitu.
3 Ona taunuu mai lea o le tasi agelu ma tū i le fata faitaulaga,+ ua iā te ia se ipu auro o mea manogi;+ ma ua tuuina atu foʻi iā te ia le anoanoaʻi o mea manogi, ina ia ofoina atu faatasi ma tatalo a le ʻaupaia uma i luga o le fata faitaulaga auro o i luma o le nofoālii.
4 Ona alu aʻe lea o le asu o mea manogi mai i le lima o le agelu, faatasi ma tatalo+ a le ʻaupaia i le Atua.
5 Ona ave loa lea e le agelu o le ipu o mea manogi, ua ia faatumuina i se afi+ mai i le fata faitaulaga ma lafo ifo i le lalolagi.+ Ona oo mai ai lea o faititili,+ o leo, o uila,+ ma le mafuiʻe.+
6 O agelu foʻi e toʻafitu o loo iai pū+ e fitu,+ ua nofosauni i latou e ili pū.
7 Ona ili lea e le agelu muamua o lana pū. Ona oo mai ai lea o le uatoʻa ma le afi+ ua fefiloi ma le toto, ma ua lafo ifo i le lalolagi; ua susunu+ ai le tasi vaetolu o le laueleele, ma le tasi vaetolu o laau, ua susunuina foʻi vao lauolaola uma.+
8 Ona ili lea e le agelu lona lua o lana pū. Ona lafo ifo lea i le sami+ o se mea e pei o se mauga tele+ ua mū i le afi. Ua liutoto+ ai le tasi vaetolu o le sami;
9 ua mamate ai foʻi le tasi vaetolu o meaola ia na ola i le sami,+ ma ua faaleagaina ai le tasi vaetolu o vaa.
10 Ona ili lea e le agelu lona tolu o lana pū. Ona paʻū ai lea mai i le lagi+ o se fetu tele o loo mumū e pei o se molī, ua paʻū atu i luga o le tasi vaetolu o vaitafe ma luga o vaipuna.+
11 O le igoa o le fetu o le Laau Oona. Ona faaoonaina ai lea o le tasi vaetolu o vai, ma e toʻatele tagata ua feoti ai ona o vai auā ua faaoonaina.+
12 Ona ili lea e le agelu lona fā o lana pū. Ona taia ai lea o le tasi vaetolu o le lā, ma le tasi vaetolu o le masina, ma le tasi vaetolu o fetu, ina ia pogisa+ ai le tasi vaetolu o na mea, ina ia leai foʻi se malamalama o le tasi vaetolu+ o le ao, e faapena foʻi ma le pō.
13 Ua ou iloa foʻi ma faalogo i se aeto+ o loo lele i le taulotoaʻiga o le lagi+ ma faapea mai ma le leotele: “Auē, auē, auē+ i ē o nonofo i le lalolagi, ona o isi iligāpū a agelu e toʻatolu ua toeitiiti ona ili mai lea!”+
