Faamasino 10:1-18
10 Ua mavae Apimeleko, ona tulaʻi mai lea e faaola+ iā Isaraelu o Tulaga le atalii o Pua, le atalii o Toto o le tagata o Isakara, ma sa nofo o ia i Samira i le vaega maugā o Efaraima.+
2 Na ia faamasino pea iā Isaraelu i tausaga e lua sefulu tolu, ona oti ai lea o ia ma ua tanu i Samira.
3 Ua mavae o ia, ona tulaʻi mai lea o Iairo le tagata Kiliata,+ ua ia faamasino pea iā Isaraelu i tausaga e lua sefulu lua.
4 Sa iā te ia o atalii e toʻatolu sefulu, o ē na tiʻetiʻe i asini+ e tolu sefulu, ma e tolu sefulu foʻi aai na iā i latou. Na latou faaigoa nei aai o Havota-iairo+ e oo mai i aso nei; o loo iai i le nuu o Kiliata.
5 Mulimuli ane, ua oti Iairo ma ua tanu i Kamoni.
6 Ua toe faia e le fanauga a Isaraelu le mea e leaga i le silafaga a Ieova,+ ua latou auauna iā Paala,+ o tupua o Asaira,+ o atua o Suria,+ o atua o Saitonu,+ o atua o Moapi,+ o atua o le fanauga a Amoni,+ ma atua o tagata Filisitia.+ Ua latou tuua Ieova, ua lē auauna atu foʻi iā te ia.+
7 Ona matuā toʻasā ai lea o Ieova iā Isaraelu,+ ma ia faatauina atu+ i latou i lima o Filisitia,+ ma lima o le fanauga a Amoni.+
8 O le mea lea, ua latou faatigā ma matuā faasauā ai i le fanauga a Isaraelu i lenā tausaga, e sefulu valu tausaga na latou faia ai faapea i le fanauga uma a Isaraelu, o ē sa i le itu o Ioritana i le laueleele o tagata Amorī, lea sa i Kiliata.
9 Ua sopoʻia foʻi e le fanauga a Amoni le Ioritana ina ia latou tau ma Iuta ma Peniamina, ma le aiga o Efaraima; ua matuā mafatia lava Isaraelu.+
10 Ona alalaga atu lea o le fanauga a Isaraelu iā Ieova mo se fesoasoani,+ ua faapea atu: “Ua matou agasala+ iā te oe, auā ua matou tuua lo matou Atua, ae auauna iā Paala.”+
11 Ona fetalai mai lea o Ieova i le fanauga a Isaraelu: “Pe e lē mai i Aikupito+ ea, o tagata Amorī,+ o le fanauga a Amoni,+ o tagata Filisitia,+
12 o tagata Saitonu,+ o Amaleka,+ ma Mitiana,+ ina ua latou faasauā iā te outou+ ma outou alalaga mai ai iā te aʻu, ma ou faaolaina ai outou mai i o latou lima?
13 A o outou, ua outou tuulafoaʻiina aʻu+ ma auauna atu i isi atua.+ O le mea lea, ou te lē toe faaolaina ai outou.+
14 Inā ō atu ia, ma alalaga mo se fesoasoani i atua+ na outou filifilia.+ Ia latou faaolaina outou i taimi o lo outou puapuaga.”
15 A ua faapea atu le fanauga a Isaraelu iā Ieova: “Ua matou agasala.+ Ia e faia iā i matou o mea uma ua e finagalo i ai.+ Ae faamolemole, tau ina ia e laveaʻi iā i matou i le asō.”+
16 Ona latou aveesea lea o atua ese mai iā i latou+ ma auauna iā Ieova,+ ma ua lē lavatia e ia+ ona onosaʻi i puapuaga o Isaraelu.+
17 Ua faapotopoto faatasi le fanauga a Amoni+ ma tolauapi i Kiliata.+ Ua faapotopoto faatasi foʻi le fanauga a Isaraelu ma tolauapi i Mesepa.+
18 Ona faapea ane lea o tagata ma perenise o Kiliata o le tasi i le isi: “O ai e na te taʻitaʻia le taua faasaga i le fanauga a Amoni?+ Ia avea o ia ma ulu o ē uma o loo nonofo i Kiliata.”+
