Faamasino 12:1-15
12 Ua faapotopoto faatasi tagata o Efaraima ma sopoʻia le itu i mātū, ua fai mai iā Iefata: “Aiseā ua e sopo atu ai e tau ma le fanauga a Amoni, ae e te leʻi aamia i matou e tatou te ō?+ O le a matou susunuina lou fale faatasi ma oe i le afi.”+
2 A ua fai atu Iefata iā i latou: “Ona na matou matuā finau ma le fanauga a Amoni,+ o aʻu ma oʻu tagata. Na ou alaga atu foʻi iā te outou mo se fesoasoani, ae e tou te leʻi faaolaina aʻu mai i o latou lima.
3 Ina ua ou iloa e tou te leʻi faaolaina aʻu, ona ou manatu ai lea e tuu loʻu ola i loʻu lava lima+ ma alu atu e tau ma le fanauga a Amoni.+ O lea na tuuina mai ai i latou e Ieova i loʻu lima. Aiseā la ua outou ō mai ai i lenei aso e siitaua mai iā te aʻu?”
4 Ona faapotopoto faatasi loa lea e Iefata o tagata uma o Kiliata+ ma ō atu e tau ma Efaraima; ua fasia foʻi e tagata Kiliata o Efaraima, auā ua latou faapea ane: “O ē na sosola mai i Efaraima, o outou tagata Kiliata, o loo iai i Efaraima ma Manase.”
5 Na maua e Kiliata asaga o Ioritana+ o loo i luma o Efaraima; ma ina ua faapea mai tagata o Efaraima na sosola ese: “Seʻi oʻu ui atu,” ona fai ane lea o tagata Kiliata i tagata taʻitasi: “Po o oe o se tagata Efaraima?” A fai mai o ia: “E leai!”
6 ona latou faapea atu lea iā te ia: “Faamolemole, seʻi fai mai, Seepoleta.”+ Ona ia fai mai lea: “Sepoleta,” auā e lē mafai ona ia taʻu saʻo le upu. Ona latou puʻe lea ma fasioti iā te ia i asaga o Ioritana. Na fasiotia ai i na aso le toʻafā sefulu lua afe o tagata Efaraima.+
7 Na faamasino Iefata iā Isaraelu i tausaga e ono, ma ina ua oti Iefata le Kiliata, ona latou tanu ai lea o ia i lona aai i Kiliata.
8 Ua mavae o ia,+ ona faamasino ai lea iā Isaraelu o Ivisona mai i Peteleema.+
9 Na iā te ia o atalii e toʻatolu sefulu ma afafine e toʻatolu sefulu. Na ia aauina atu foʻi ni tagata ma aumai afafine e toʻatolu sefulu mo ona atalii mai i isi aiga. Na ia faamasino pea iā Isaraelu mo tausaga e fitu.
10 Ua oti Ivisona ona tanu ai lea o ia i Peteleema.
11 Ua mavae o ia, ona faamasino ai lea iā Isaraelu o Aluna le tagata Sepulona.+ Na ia faamasino pea iā Isaraelu mo tausaga e sefulu.
12 Ua oti Aluna le tagata Sepulona, ona tanu ai lea i Ailona i le nuu o Sepulona.
13 Ua mavae o ia, ona faamasino ai lea iā Isaraelu o Apetonu le atalii o ʻIleli le Piratonu.+
14 Ua iā te ia atalii e toʻafā sefulu ma atalii o ona atalii e toʻatolu sefulu, o ē na tiʻetiʻe i asini e fitu sefulu.+ Ua ia faamasino foʻi iā Isaraelu mo tausaga e valu.
15 Ua oti Apetonu le atalii o ʻIleli le tagata Piratonu, ona tanu ai lea i Piratonu i le nuu o Efaraima i le mauga o Amaleka.+
