Faamasino 15:1-20
15 Ua mavae sina taimi i ona pō o le seleselega saito, ona asiasi atu ai lea o Samasoni i lana avā, na ia ave foʻi se tamaʻi ʻoti.+ Na ia faapea ane: “Ou te alu atu i laʻu avā i le potu pito i totonu.”+ Ae e leʻi faatagaina o ia e le tamā o lana avā e alu i totonu.
2 Ua fai mai le tamā o lana avā: “Na ou faapea ifo iā te aʻu, ʻAi ua e ʻinoʻino lava iā te ia.’+ O lea na ou tuuina atu ai o ia i lau uō sili.+ Pe e lē sili atu ea lona uso laʻitiiti iā te ia? Faamolemole, inā fai ia mo oe o ia nai lo o le isi.”
3 A ua fai atu Samasoni iā i latou: “Ou te mamā mai iā Filisitia, pe a ou faia se mea latou te tigā ai.”+
4 Ona alu lea o Samasoni ua pupuʻe alope+ e tolu selau ma ave sulu, ona nonoa lea o le siʻusiʻu o le tasi alope i le isi alope, ma tuu le sulu e tasi i le ogatotonu o le va o siʻusiʻu e lua.
5 Ona ia tutu lea o sulu i le afi, ma tutuli atu alope i le fanua o loo iai togāsaito o Filisitia. Ona ia susunu ai lea o mea uma o faaputugasaito, o le togāsaito, o togāvine ma togāolive.+
6 Ona fai ane lea o tagata Filisitia: “O ai na faia lenei mea?” Ua latou faapea atu: “O Samasoni, le tane a le afafine o le tagata Timenata, auā na ia ave lana avā ma tuuina atu i lana uō sili.”+ Ona ō aʻe lea o tagata Filisitia ma susunu o ia ma lona tamā i le afi.+
7 Ona fai atu lea o Samasoni iā i latou: “Afai o le mea lenei ua outou faia, e leai se isi mea ou te faia ae ou te tauimasui atu iā te outou,+ ona ou mapu ai lea.”
8 Ona fasia lea e ia o i latou, ma faaputu vae i luga o ogāvae i le fasiga tele, ona ia alu ifo lea ma nofo i le va o le papa o Etama.+
9 Mulimuli ane, ua ō aʻe tagata Filisitia+ ma tolauapi i Iuta,+ ua latou feoaʻi solo i Leʻi.+
10 Ona fai atu lea o tagata Iuta: “Aiseā ua outou ō mai ai e tau ma i matou?” ona latou faapea mai lea: “Ua matou ō mai ina ia matou saisai iā Samasoni, e faia iā te ia e pei ona ia faia iā i matou.”
11 Ona ō ifo lea o tagata o Iuta e toʻatolu afe i le va o le papa o Etama+ ma fai mai iā Samasoni: “Pe e te leʻi iloa ea ua pule Filisitia iā i matou?+ O le ā le uiga o lenei mea ua e faia iā i matou?” Ona ia fai atu lea iā i latou: “E pei ona latou faia iā te aʻu, e faapea foʻi ona ou faia iā i latou.”+
12 A ua latou fai mai iā te ia: “Ua matou ō mai e saisai oe, ma tuuina atu oe i lima o Filisitia.” Ona fai atu lea o Samasoni iā i latou: “Ia outou tautō mai iā te aʻu, e tou te lē fasia aʻu.”
13 Ona latou faapea mai lea iā te ia: “E leai, ae tau lava ina matou saisai o oe, ma tuuina atu oe i o latou lima; ae matou te lē fasiotia oe.”
Ona latou saisai lea o ia i maea fou+ e lua, ma ave aʻe o ia mai i le papa.
14 Ua oo o ia i Leʻi, ua alalaga fiafia foʻi Filisitia ina ua latou fetaiaʻi ma ia.+ Ona osofia lea o ia e le agaga o Ieova,+ ma ua avea maea sa i ona lima e pei o ni manoa lino ua mū i le afi,+ ua paʻuʻū ese foʻi faamau mai i ona lima.
15 Ona ia maua lea o le ivi auvae fou o le asini poʻa, ua tuu atu lona lima ma tago i ai, ma ua ia fasiotia ai tagata e toʻaafe.+
16 Ona fai ane lea o Samasoni:
“O le ivi auvae o le asini poʻa—e tasi le faaputuga, e lua faaputuga!
Ua ou fasiotia tagata e toʻaafe i le ivi auvae o le asini poʻa.”+
17 Ina ua uma atu ana upu, ona ia togi ese lea o le ivi auvae mai i lona lima, ma faaigoa lea nofoaga o Ramaleʻi.+
18 Ua matuā fia inu o ia, ona ia valaau atu lea iā Ieova: “O oe na e aumaia lenei olataga i lima o lau auauna,+ a o lenei o le a ou oti i loʻu fia inu, ma maua ai aʻu i lima o tagata e lē peritomeina?”+
19 Ona māvae lea e le Atua o se omo sa i Leʻi, ma ua sau ai le vai,+ ona alu atu lea o ia ma inu ai, ona toe foʻi atu ai lea o lona malosi+ ma ua toe ola ai.+ O le mea lea, na ia faaigoa ai lea nofoaga o Eniakori, o loo i Leʻi e oo mai i aso nei.
20 Na ia faamasino pea iā Isaraelu i ona pō o Filisitia mo tausaga e lua sefulu.+
