Faamasino 19:1-30
19 I na aso, sa leai se tupu i Isaraelu.+ A o se tasi tagata sa Levī, sa aumau i vaega maugā mamao o Efaraima.+ I le taimi lea, na fai ai ma ana avā se palake+ mai i Peteleema+ i Iuta.
2 Ua faitaaga+ lana palake. Mulimuli ane, ona ia alu ese ai lea mai iā te ia ma alu i le aiga o lona tamā i Peteleema i Iuta, ma nofo ai pea i inā mo masina atoa e fā.
3 Ona tulaʻi lea o lana tane ma alu atu iā te ia, ma tautala atu ma le alofa iā te ia ina ia toe aumaia o ia; sa iā te ia foʻi o lana auauna+ ma asini poʻa e lua. Ua ia aumaia o ia i le fale o lona tamā. Ina ua vaai mai le tamā o le fafine iā te ia, ona olioli ai lea ina ua la feiloaʻi.
4 Ua taofi o ia e le tamā o lana avā, o le tamā o le fafine, ina ia latou nonofo pea ma ia mo ni aso se tolu; ua la aai ma inu, ma nonofo ai i inā i le pō.+
5 Ua oo i le aso lona fā, ina ua latou feala aʻe i le taeaopō e pei ona masani ai, ona ia tulaʻi lea e alu, ae ua faapea mai le tamā o le fafine i le tane a lona afafine: “Inā fai ia sina meaʻai+ e faamalosi ai lou tino, ona outou ō ai lea.”
6 Ona la nonofo lea i lalo, ua aai ma inu faatasi; ina ua uma, ona faapea atu lea o le tamā o le fafine i le tamāloa: “Faamolemole, seʻi o tatou toe momoe i lenei pō,+ ma e faafiafia lou loto.”+
7 Ina ua tulaʻi le tamāloa o le a alu, ona ʻaiʻoi atu pea lea o le tamā o lana avā iā te ia, ma ua toe nofo ai o ia i lenā pō.+
8 Ina ua ia ala aʻe i le taeaopō o le aso lona lima e alu, ona faapea mai lea o le tamā o le fafine iā te ia: “Faamolemole, inā fai ia sina meaʻai e faamalosi ai lou tino.”+ Ona la faatuatuai lea seʻia mavae atu le aso. Ua la aai pea.
9 Ua tulaʻi le tamāloa+ e ō, o ia, o lana palake,+ ma lana auauna;+ a ua fai mai le tamā o lana avā, o le tamā o le fafine iā te ia: “Faauta! Ua leva le aso o le a pō. Faamolemole, tatou toe nonofo i lenei pō.+ O le a mavae le aso. Seʻi tatou nonofo i le pō, ma ia faafiafia lou loto.+ Ona outou feala lea i le taeaopō mo la outou malaga, ma e alu atu ai i lou faleʻie.”
10 Ae peitaʻi, e leʻi lotomalie le tamāloa e nofo ai i le pō, ua tulaʻi o ia ma alu i lona ala, ua oo atu e feagai ma Iepusē,+ o Ierusalema+ lea; sa iā te ia o asini poʻa e lua ua uma ona faanofoa, o lana palake, ma lana auauna.
11 Ua latou lata atu i Iepusē ina ua matuā mou atu le malamalama,+ ona faapea mai lea o le auauna i lona matai: “Seʻi o tatou afe ane i lenei aai o tagata Iepusē,+ ma nonofo ai i le pō.”
12 A ua fai atu lona matai iā te ia: “Aua neʻi o tatou afe ane i le aai o tagata ese,+ e lē o le fanauga a Isaraelu i latou; a ia tatou ō seʻia oo atu i Kipea.”+
13 Ona fai atu lea o ia i lana auauna: “Ō maia seʻi o tatou ō atu i se tasi o nofoaga ma tatou nonofo ai i le pō i Kipea po o Rama.”+
14 Ua latou ui atu ma faaauau pea i lo latou ala, ua goto ifo le lā a o latou latalata i Kipea, lea e i Peniamina.
15 Ona latou afe ane lea i inā ma ō atu e nonofo ai i le pō i Kipea. Ua latou ō atu ma saofafaʻi i le nofoaga faitele o le aai, a ua leai se tasi e taliaina i latou i lona fale e nonofo ai i le pō.+
16 Mulimuli ane, faauta! ua sau se toeaina sa galue i le fanua i le afiafi,+ e mai i le vaega maugā o Efaraima,+ ma sa aumau ai o ia i Kipea mo sina taimi; a o tagata o le nuu lea e mai i le ituaiga o Peniamina.+
17 Ina ua ia tepa aʻe i luga, na ia iloa ai le tamāloa, o se tagata malaga o loo i le nofoaga faitele o le aai. Ona faapea mai lea o le toeaina: “O fea e te alu i ai, a o fea foʻi e te sau ai?”+
18 Ua tali atu o ia iā te ia: “Na matou ō mai mai i Peteleema i Iuta e ō atu i vaega maugā mamao o Efaraima.+ O i inā ou te sau ai, ae na ou alu i Peteleema i Iuta;+ o le a ou toe foʻi i loʻu fale, auā ua leai se tasi e taliaina aʻu i lona fale.+
19 O loo iai i lau auauna o vao mamago ma meaʻai+ mo a matou asini poʻa, faapea meaʻai+ ma uaina mo aʻu, ma lau teine pologa+ ma le auauna.+ E leai lava se mea o oʻu mativa ai.”
20 A ua fai mai le toeaina: “Ia iā te oe le filemu!+ Ia faitalia aʻu ma mea uma e te mativa ai.+ Ae aua neʻi outou momoe i le nofoaga faitele.”
21 Ua ia ave o ia i lona fale+ ma fafaga i asini poʻa.+ Ona latou mulumuluina lea o o latou vae,+ ma ua aai ma feinu.
22 A o faafiafia o latou loto,+ faauta! ua siʻomia e tagata amioleaga+ o le aai le fale,+ ua tautulei mai i le faitotoʻa, ma faapea mai i le toeaina o lē e ona le fale: “Aumai i fafo le tamāloa lea na sau i lou fale ina ia matou momoe.”+
23 Ona alu atu lea i fafo o lē e ona le fale iā i latou ma faapea atu iā i latou:+ “Leai oʻu uso e,+ aua neʻi outou faia se mea leaga faamolemole, auā ua sau lenei tamāloa i loʻu fale. Aua neʻi outou faia lenei mea matuā matagā.+
24 O loʻu afafine taupou lea ma lana palake. Ou te aumaia i laʻua i fafo faamolemole, ma ia outou faaleagaina i laʻua,+ ma faia ai mea e tou te loto i ai. Ae aua tou te faia lenei mea valea ma le matagā i le tamāloa.”
25 Ae e leʻi fia faalogo tagata iā te ia. O lea, na tago atu ai le tamāloa i lana palake+ ma tuu atu i fafo iā i latou; ona latou feusuaʻi lea ma ia,+ ma faaleaga+ o ia i le pō atoa seʻia oo i le taeao, ona latou auina ese atu lea o ia ina ua tafa mai ata.
26 Ona sau lea o le fafine i le taeao, ua paʻū i le faitotoʻa o le fale o le tamāloa lea sa iai lona matai,+ ua oo ina malamalama.
27 Ua tulaʻi lona matai i le taeao ma tatala le faitotoʻa o le fale o le a alu lana malaga, faauta! o le fafine, o lana palake,+ ua paʻū i le faitotoʻa o le fale, ma o loo tuu ona lima i le faitotoʻa!
28 Ona ia fai atu lea iā te ia: “Tū ia i luga tatou ō.” Ae e leʻi tali ane o ia.+ Ona tago atu lea o le tamāloa, ua tuu o ia i luga o le asini, ua tulaʻi o ia ma ua alu i lona fale.+
29 Ua ulu atu o ia i lona fale, ona ia tago lea i le naifi ma taofi i lana palake, ona pena lea o ia ma ona ivi i vaega+ e sefulu lua, ma tufa atu lona tino i itu uma o Isaraelu.+
30 O i latou uma na vāai i ai, ua latou faapea ane: “E leʻi tupu lava se mea faapenei, e leʻi vaaia foʻi se mea faapenei talu mai le aso na ō aʻe ai le fanauga a Isaraelu mai i le nuu o Aikupito e oo mai i le asō. Ia manatunatu i ai o outou loto, ia filifili,+ ma faailoa mai.”
