Faamasino 4:1-24
4 Ina ua oti Euta, ona toe faia foʻi lea e le fanauga a Isaraelu o le mea e leaga i le silafaga a Ieova.+
2 O lea la, na faatauina atu+ ai i latou e Ieova i lima o Iapino le tupu o Kanana, o lē na pule i Hasora;+ ma o Sesera le taʻitaʻi o lana ʻautau,+ o lē na nofo i Haroseta+ o nuu ese.
3 Ona alalaga atu lea o le fanauga a Isaraelu iā Ieova,+ auā ua iā te ia o kariota o le taua e iva selau e iai uʻamea maamaʻai,+ na ia matuā faasauā foʻi i le fanauga a Isaraelu+ mo tausaga e lua sefulu.
4 O le taimi lenā o loo avea ai le perofeta fafine+ o Tepora le avā a Lapitota, ma faamasino iā Isaraelu.
5 Na nofo o ia i lalo o le laau o le pama a Tepora, i le va o Rama+ ma Peteli+ i le vaega maugā o Efaraima; ma na ō aʻe le fanauga a Isaraelu iā te ia ina ia faamasinoina.
6 Na ia aami Parako+ le atalii o Apinoamo mai i Ketesa-nafatali,+ ma faapea atu iā te ia: “Pe e leʻi poloaʻi mai ea Ieova le Atua o Isaraelu? ‘Inā alu atu ia e faatalitali i le Mauga o Tapora,+ faatasi ma tane e toʻasefulu afe mai i le fanauga a Nafatali+ ma le fanauga a Sepulona.+
7 Ou te tosina atu iā te oe+ i le ālia o Kisona+ o Sesera+ le taʻitaʻi o le ʻautau a Iapino,+ ma ana kariota o le taua ma ē uma o iā te ia, ma ou te tuuina atu o ia i lou lima.’”+
8 Ona faapea mai lea o Parako iā te ia: “Afai e ta te ō, ona ou alu lea; ae afai e ta te lē ō, ou te lē alu foʻi.”
9 Ua faapea atu o ia: “Ta te ō lava. Ae e lē fai mo oe le viiga i le ala e te alu i ai, auā e tuuina atu e Ieova Sesera i le lima o se fafine.”+ Ona tulaʻi ai lea o Tepora ma ō faatasi ma Parako i Ketesa.+
10 Ona faapotopoto ai lea e Parako o tagata o Sepulona+ ma Nafatali i Ketesa, na ō aʻe tane e toʻasefulu afe ma mulimuli atu iā te ia;+ na alu aʻe foʻi Tepora faatasi ma ia.
11 O le taimi lea, ua vavaeese ai Kaveru+ le tagata Keni+ mai i le ituaiga o Keni, o le fanauga a Opapo, o le tamā o le avā a Mose,+ ma faatūina lona faleʻie e latalata i le laau telē i Saanaima lea e i Ketesa.
12 Ona latou taʻu atu lea iā Sesera e faapea, ua alu aʻe Parako le atalii o Apinoamo+ i le Mauga o Tapora.+
13 Ona faapotopoto loa lea e Sesera o ana kariota uma o taua e iva selau e iai uʻamea maamaʻai,+ ma tagata uma o loo faatasi ma ia, mai i Haroseta o nuu ese i le ālia o Kisona.+
14 Ona fai atu lea o Tepora iā Parako: “Inā tū ia i luga, auā o le asō e tuuina atu ai lava e Ieova o Sesera i lou lima. Pe e lē o Ieova ea o loo muamua atu i ou luma?”+ Ona alu ifo ai lea o Parako mai i le Mauga o Tapora, faatasi ma tane e toʻasefulu afe o loo mulimuli atu iā te ia.
15 Ua faafenumiaʻi+ e Ieova o Sesera ma ana kariota uma o le taua ma ʻautau uma i le pelu i luma o Parako. Ona alu ese lea o Sesera mai i le kariota ma sola.
16 A ua tuliloa+ e Parako o kariota o le taua+ ma ʻautau uma e oo atu i Haroseta o nuu ese, ma ua fasiotia ai ʻautau uma a Sesera i le pelu. E leai se tasi o i latou na totoe.+
17 A o Sesera,+ ua sola o ia i ona vae i le faleʻie o Iaeli+ le avā a Kaveru le tagata Keni,+ auā na lelei le va o Iapino le tupu o Hasora+ ma le aiga o Kaveru le tagata Keni.
18 Ona sau ai lea i fafo o Iaeli e faafetaiaʻi iā Sesera ma faapea atu iā te ia: “Afe mai ia i inei, loʻu alii, afe mai iā te aʻu. Aua e te fefe.” Ona ia afe lea iā te ia i lona faleʻie. Mulimuli ane, ua ia ufiufi iā te ia i se palanikeke.
19 Ona fai mai lea o ia iā te ia: “Faamolemole, seʻi aumai lava sina vai seʻi oʻu inu ai, ua ou fia inu lava.” Ona tatala lea e ia o le fagupaʻu+ o loo iai le susu ma avatu iā te ia e inu+ ai, ua uma lea, ona ia ufiufi lea iā te ia.
20 Ua ia faapea mai iā te ia: “Inā tū ia i le faitotoʻa o le faleʻie, ae pe afai e sau se tasi ma fesili mai iā te oe, ‘Po o iai se tagata i inei?’ e te fai atu i ai, ‘E leai!’”
21 Ua ave e Iaeli le avā a Kaveru se pine o le faleʻie ma le samala i lona lima. Ona ia alu atu lemū lea iā te ia ma tutuʻi le pine i ona manifinifi+ ma ua ati ai i le eleele, a o moegase o ia ua lē lavā. Ona oti ai lea o ia.+
22 Ae faauta! o loo tuliloa mai e Parako iā Sesera. Ona alu atu lea o Iaeli i fafo ma faafetaiaʻi iā te ia ma fai atu i ai: “Sau, seʻi oʻu faasino atu iā te oe le tagata o loo e saʻilia.” Ua alu atu o ia i totonu, faauta! ua oti Sesera o loo tū ai le pine i ona manifinifi.
23 O lea la, ua faatoʻilaloina+ ai e le Atua o Iapino le tupu o Kanana i luma o le fanauga a Isaraelu i lenā aso.
24 Ua mamafa pea lava le lima o le fanauga a Isaraelu iā Iapino le tupu o Kanana,+ seʻia oo ina latou faaumatia Iapino le tupu+ o Kanana.
