Faamasino 5:1-31
5 O le aso lenā na pepese+ faatasi ai Tepora+ ma Parako+ le atalii o Apinoamo,+ ua faapea atu:
2 “Auā ua faatautau lauulu o Isaraelu i la latou tautoga mo le taua,
Auā ua tauofo mai tagata,+
Inā vivii atu ia iā Ieova.+
3 Inā faalogologo mai ia outou tupu e;+ ia faalogo mai foʻi outou o alii sili:
O aʻu, ou te pese lava iā Ieova.
Ou te fai pesega+ iā Ieova le Atua o Isaraelu.+
4 Ieova e, o lou afio atu mai i Seira,+
O lou afio atu foʻi mai i le laueleele o Etoma,+
Ua lūlūina ai le lalolagi,+ ma ua toʻulu ifo ai vai mai i le lagi,+
Ua toʻulu ifo foʻi vai mai i ao.
5 Na tafe ifo mauga mai i luma o Ieova,+
E oo lava iā Sinai+ mai i luma o Ieova,+ le Atua o Isaraelu.+
6 I aso o Samekara+ le atalii o Anato,
I aso o Iaeli,+ e leʻi toe uia ai auala,
Na femalagaaʻi foʻi tagata i auala ʻalo.+
7 Ua leai ni tagata e nonofo i nuu i tua, ua leai lava i Isaraelu,+
Seʻia ou tū atu, o aʻu o Tepora,+
Seʻia ou tū atu o se tinā i Isaraelu.+
8 Na latou filifilia atua fou.+
Ona pā ai lea o le taua i faitotoʻa.+
E leʻi vaaia se talita, po o se tao,
I tagata e toʻafā sefulu afe i Isaraelu.+
9 Ua uaʻi atu loʻu loto i taʻitaʻiʻau o Isaraelu,+
O ē na tauofo o le nuu.+
Inā vivii atu ia iā Ieova.+
10 O outou o ē e tiʻetiʻe i asini fafine e samasama mūmū,+
O ē e nonofo i kapeta lelei,
Ma outou o ē e savavali i le ala,
Inā manatunatu ia!+
11 O leo o nisi e tufatufa vai i mea e asu aʻe ai vai,+
O i inā ua latou manatua ai gaoioiga amiotonu a Ieova,+
O gaoioiga amiotonu a ona tagata o loo nonofo i nuu i tua o Isaraelu.
O le taimi lenā ua ō ifo ai le nuu o Ieova i faitotoʻa.
12 Inā ala mai ia, ala mai ia, Tepora e;+
Inā ala mai ia, ala mai ia, ma usu se pese!+
Inā tulaʻi ia, Parako e,+ ma taʻitaʻi ese au pagota, o oe na le atalii o Apinoamo!+
13 O le mea lea na ō ifo ai ē na faasaoina i alii sili;
Ua ō ifo le nuu o Ieova iā te aʻu e faasagatau i ē e malolosi.
14 E mai i Efaraima le mea na latou tupuga mai ai i le fanua laugatasi,+
Faatasi ma oe Peniamina e, ma lou nuu,
E ō ifo taʻitaʻiʻau mai i Makiro,+
E mai i Sepulona foʻi o ē e tausia meafaigaluega a se tusiupu.+
15 Ua faatasi foʻi ma Tepora o perenise i Isakara,+
O Isakara e pei o Parako+ lava ia.
Na auina atu o ia e savali i le fanua laugatasi.+
Na matuā suʻesuʻeina foʻi loto o ituaiga o Reupena.+
16 Aiseā na e nofo ai i le va o ato e ave ai avega,
E faalogologo ai i fagufagu a leoleo mamoe?+
Auā na matuā suʻesuʻeina loto o ituaiga o Reupena.+
17 Na nofo pea Kiliata i le mea e mau ai o ia i le isi itu o Ioritana;+
Aiseā foʻi na nofo ai pea Tanu i vaa?+
Na nofonofo Asera i le matafaga,
Na ia nofo pea i le mea e taula ai vaa.+
18 O Sepulona o le nuu na lamatia o latou ola e oo i le oti;+
E faapena foʻi Nafatali+ i mea maualuluga o le fanua.+
19 Na ō mai tupu, ma ua tau;
O le mea lea na tau ai tupu o Kanana+
I Tanaka+ e latalata i vai o Mekito.+
E latou te leʻi aveina ni siliva.+
20 Na tau fetu mai i le lagi,+
Na latou tau foʻi ma Sesera mai i o latou ala.
21 Na tafefea i latou i le ālia o Kisona,+
O le ālia o aso anamua, o le ālia o Kisona.+
Ua ou solia foʻi o ē e malolosi.+
22 O le mea lea na taʻetaʻei ai atigivae o solofanua+
Ona o le fetaufetuliaʻi o ana solofanua.
23 Ua fai mai le agelu a Ieova,+ ‘Ia malaia+ Merosa,’
‘Ia malaia pea o ē e nonofo ai,
Auā na latou lē ō mai e fesoasoani iā Ieova,
E fesoasoani iā Ieova e tau ma ē e malolosi.’
24 E sili ona manuia Iaeli+ le avā a Kaveru le tagata Keni+ i fafine uma,
E sili foʻi lona manuia i fafine o i le faleʻie.+
25 Na ia ōle atu i se vai, ona ia avane lea o le suāsusu;
I se ipu telē a alii sili, na ia avatu ai le suāsusu toʻa.+
26 Na tago atu lona lima i le pine,
Ma lona lima taumatau i le samala a ē e galulue mamafa.+
Ona ia tā ai lea o Sesera, ua ati i lona ulu,+
Na ia tui ma ua ati ai i ona manifinifi.
27 Ua palasi o ia i le va o ona vae, ua paʻū, ua taoto o ia;
Ua palasi o ia i le va o ona vae, ua paʻū o ia;
O le mea na ia palasi ai, na oti ai lava o ia.+
28 Ua vaavaai atu se fafine mo ia mai i le faamalama, o loo faatalitali pea
Le tinā o Sesera mai i le faamalama,+
‘Aiseā ua tuai mai ai lona kariota o le taua?+
Aiseā ua tuai ai ona paʻōʻō mai uili o ona kariota?’+
29 Ua tali mai iā te ia o ē e atamamai o ona tamaʻitaʻi,+
Ioe, e talanoa lava o ia iā te ia,
30 ‘Latou te leʻi maua ea, latou te leʻi tufatufaina ea foʻi le vete,+
E taʻitoʻatasi tane mo se fafine, po o ni fafine se toʻalua,+
O ʻie lanu eseese mo Sesera mai i le vete, o ʻie lanu eseese mai i le vete,
O se ofu teuteu, o se ʻie lanu eseese, ma ofu teuteu e lua
Mo ua o tane na avea le vete?’
31 Ieova e, ia faapea ona fano ou fili uma,+
Ia avea foʻi ē e alolofa iā te oe+ e pei o le malosi o le susulu o le lā.”+
Ona lē toe iai lea o ni taua i le laueleele mo tausaga e fā sefulu.+
