Faamasino 6:1-40
6 Ua faia e le fanauga a Isaraelu le mea e leaga i le silafaga a Ieova.+ Ona tuuina atu lea o i latou e Ieova i lima o Mitiana+ mo tausaga e fitu.
2 Ua manumalo le lima o Mitiana iā Isaraelu.+ Ona o Mitiana, ua faia ai e le fanauga a Isaraelu mo i latou o lua e teu ai meaʻai sa i totonu o mauga, o ana ma nofoaga e faigatā ona oo i ai se tasi.+
3 Ina ua lūlū e Isaraelu fatu+ i le fanua, ona ō aʻe lea o Mitiana, o Amaleka+ ma tagata mai i Sasaʻe+ e tau ma i latou.
4 Ona latou ō ai lea ma tolauapi e tau ai le taua ma i latou, ma faaleagaina uma fua o le laueleele e oo atu lava i Kasa, e latou te leʻi faatotoeina foʻi ni meaʻai, se mamoe, se povi poʻa, po o se asini i Isaraelu.+
5 Auā ua ō aʻe i latou ma a latou lafumanu faatasi ma o latou faleʻie. E toʻatele i latou e ō mai e pei o sē akerise,+ o i latou ma a latou kamela e lē mafaitaulia;+ e latou te ō mai e faatamaʻia le nuu.+
6 Ua matuā matitiva Isaraelu ona o Mitiana; ona alalaga atu lea o le fanauga a Isaraelu iā Ieova mo se fesoasoani.+
7 Ina ua alalaga atu le fanauga a Isaraelu iā Ieova mo se fesoasoani ona o Mitiana,+
8 ona auina mai lea e Ieova o se tane, o se perofeta+ i le fanauga a Isaraelu ma faapea atu iā i latou: “O le mea lenei na fetalai mai ai Ieova le Atua o Isaraelu, ‘O aʻu na ou aveina aʻe outou mai i Aikupito,+ ma aumaia foʻi mai i le mea na outou nofo pologa ai.+
9 Sa ou laveaʻiina outou mai i lima o Aikupito, ma lima o ē uma na faasauā iā te outou, ma ou tutuliesea i latou mai i o outou luma, ma avatu lo latou laueleele mo outou.+
10 O le mea lea, ou te fai atu ai iā te outou: “O aʻu o Ieova lo outou Atua,+ aua tou te matataʻu i atua o tagata Amorī+ o ē e ona le laueleele lea o loo outou nonofo ai.”+ Ae tou te leʻi faalogo lava i loʻu leo.’”+
11 Mulimuli ane, ona sau ai lea o le agelu a Ieova+ ma nofo i lalo o le laau tele sa i Ofira, o le laau lea a Ioasa le tagata Apieseru,+ a o sasa e lona atalii o Kitiona+ le saito i le mea e soli ai vine, ina ia vave ai ona lilo mai i tagata Mitiana.
12 Ua faaali mai le agelu a Ieova iā te ia, ma faapea mai: “O loo faatasi Ieova iā te oe,+ o oe lenā le tagata malosi ma toa.”
13 Ona fai atu lea o Kitiona iā te ia: “Faamolemole lava! Loʻu alii e, afai ua faatasi Ieova ma i matou, aiseā la ua oo mai ai nei mea uma iā i matou,+ a o fea ana galuega ofoofogia+ uma na faamatala mai e o matou tamā iā i matou+ e faapea, ‘Pe e lē o Ieova ea na aveina aʻe i tatou mai i Aikupito?’+ A o lenei ua tuulafoaʻi i tatou e Ieova,+ ma ua ia tuuina atu i tatou i lima o Mitiana.”
14 Ona silasila mai lea o Ieova iā te ia ma fetalai mai: “Inā alu ia i lou malosi,+ e te faaolaina lava Isaraelu mai i lima o Mitiana.+ Po ou te leʻi auina atu ea oe?”+
15 Ona ia fai atu lea iā te ia: “Faamolemole lava! Ieova e, o ā ni mea ou te faaolaina ai Isaraelu?+ Faauta! O loʻu aiga* e aupito i faatauvaa i Manase, ma o aʻu foʻi e aupito i itiiti i le aiga o loʻu tamā.”+
16 A ua fetalai mai Ieova iā te ia: “Talu ai ou te faatasi ma oe,+ e te fasiotia lava tagata Mitiana+ e pei o se tagata e toʻatasi.”
17 Ua faapea atu o ia iā te ia: “Afai e te alofa mai iā te aʻu,+ ia e faia se faailoga mo aʻu e faailoa ai o oe o loo tautala mai iā te aʻu.+
18 Faamolemole aua e te maliu ese mai i inei seʻia ou toe foʻi mai,+ ma ou aumaia laʻu meaalofa ma tuuina atu i ou luma.”+ Ona ia faapea mai lea: “Ou te nofo pea i inei seʻia e toe foʻi mai.”
19 Ona alu lea o Kitiona ma saunia se tamaʻi ʻoti,+ ma falaoa e lē faafefeteina+ na faia i le efa o le falaoamata. Ua ia tuu le aano o le manu i le ato, ma tuu foʻi le supo i le ulo, ona ia avatu ai lea iā te ia i lalo o le laau tele ma laulau atu.
20 Ua faapea mai le agelu a le Atua moni iā te ia: “Inā ave ia le aano o le manu ma falaoa e lē faafefeteina ma tuu i luga o le maa tele lelā,+ ma sasaa i ai le supo.” Ona ia faia lea faapea.
21 Ua faaloaloa atu e le agelu a Ieova le tumutumu o le tootoo sa i lona lima, ma paʻi atu i le aano o le manu ma falaoa e lē faafefeteina, ona alu aʻe lea o le afi mai i le maa ma susunuina ai le aano o le manu ma falaoa e lē faafefeteina.+ Ona mou ese atu lea o le agelu a Ieova mai i ona luma.
22 Ua iloa ai e Kitiona o le agelu lea a Ieova.+
Ona faapea atu loa lea o Kitiona: “Auē! Ieova e, le Alii Pule Silisili Ese, ua ma faafesagaʻi lava ma le agelu a Ieova!”+
23 Ae ua fetalai mai Ieova iā te ia: “Ia iā te oe le filemu.+ Aua e te fefe.+ E te lē oti lava.”+
24 Ona faia lea e Kitiona i inā o le fata faitaulaga+ iā Ieova, ma ua faaigoa+ ai o Ieova-saloma e oo mai i aso nei. O loo iai i Ofira+ i le nuu o tagata Apieseru.
25 I lenā lava pō, na fetalai mai ai Ieova iā te ia: “Ia ave le tamaʻi povi poʻa, le povi poʻa a lou tamā, le tamaʻi povi poʻa lona lua e fitu ona tausaga, ma ia lepeti i lalo le fata faitaulaga a lou tamā iā Paala,+ ma tuu i lalo le pou paia o loo i tafatafa o le fata faitaulaga.+
26 Ia e faia foʻi se fata faitaulaga iā Ieova lou Atua i le tumutumu o lenei ʻolo malosi, faatasi ma ni maa, ma ia e ave le tamaʻi povi poʻa lona lua, ma ofo atu se taulaga mū i luga o fafie o le pou paia lea o le a e tuuina i lalo.”
27 Ona ave lea e Kitiona o le toʻasefulu o ana auauna ma faia e pei ona fetalai mai ai o Ieova iā te ia;+ ae e leʻi mafai ona ia faia i le ao ona o lona fefe tele i le aiga o lona tamā ma tagata o le aai, o lea na ia faia ai i le pō.+
28 Ina ua feala aʻe tagata o le aai i le taeaopō e pei ona masani ai, faauta! ua lepeti i lalo le fata faitaulaga a Paala, ua tuu foʻi i lalo le pou paia+ lea sa i tafatafa, ma ua ofoina atu ai le tamaʻi povi poʻa lona lua i luga o le fata faitaulaga na fausia.
29 Ua faapea ane le tasi i le isi: “O ai na faia lenei mea?” Ona latou fesilisili solo lea ma suʻesuʻe. Mulimuli ane, ua latou faapea ane: “O Kitiona le atalii o Ioasa, o ia lenā na faia lenei mea.”
30 Ona faapea atu lea o tagata o le aai iā Ioasa: “Inā aumai ia i fafo lou atalii ina ia oti+ ai, auā ua ia lepeti i lalo le fata faitaulaga a Paala, ma tuu i lalo le pou paia sa i tafatafa.”
31 Ona fai mai lea o Ioasa+ iā i latou uma o loo tetee iā te ia:+ “Pe e tou te tutū atu ea mo Paala e iloa ai pe tou te faaolaina o ia? O so o se tasi e tū mo ia, e fasiotia lava o ia i le taeao nei.+ Afai o ia o le Atua,+ ia tū o ia mo ia lava,+ auā ua lepeti i lalo e se tasi lona fata faitaulaga.”
32 Ona ia faaigoa lea o ia o Ierupaala+ i lenā lava aso, ma faapea atu: “Ia tū Paala mo ia lava, auā ua lepeti i lalo e se tasi lona fata faitaulaga.”+
33 Ua faapotopoto faatasi+ Mitiana+ uma, o Amaleka+ ma tagata mai i Sasaʻe,+ ma sopoʻia le vaitafe ma tolauapi ai i le fanua laugatasi o Isereelu.+
34 Ua ufitia Kitiona e le agaga o Ieova,+ ona ia ili ai lea o le pū,+ ma ua faapotopoto faatasi tagata Apieseru+ e mulimuli atu iā te ia.
35 Ua ia aauina atu foʻi avefeʻau+ iā Manase uma, ma ua latou faapotopoto faatasi ai e mulimuli atu iā te ia. Ua ia aauina atu foʻi avefeʻau iā Asera, o Sepulona ma Nafatali, ma ua latou ō mai e faafetaiaʻi iā te ia.
36 Ona faapea atu lea o Kitiona i le Atua moni: “Afai e te faaolaina Isaraelu e ala iā te aʻu, e pei ona e folafolaina mai,+
37 ou te tuuina atu le fulufulu mamoe i le mea e sasa ai saito. Afai e na o le fulufulu mamoe e iai le sau, ae mātūtū le laueleele uma, ona ou iloa ai lea e te faaolaina Isaraelu e ala iā te aʻu, e pei ona e folafola mai.”
38 Ona tupu ai lea o lenā mea. Ina ua ia ala aʻe i le taeao o le aso na sosoo ai ma tatau le fulufulu mamoe, na tumu ai i vai se ipu faaofuofu telē i le sau mai i le fulufulu mamoe.
39 A ua toe faapea atu Kitiona i le Atua moni: “Aua neʻi e matuā toʻasā mai iā te aʻu, ae seʻi toe fai atu lava laʻu tala lea e tasi. Faamolemole, seʻi oʻu toe tofotofo tasi i le fulufulu mamoe. Faamolemole, ia mātūtū na o le fulufulu mamoe, ae ia iai le sau i le laueleele atoa.”
40 Na faia faapea e le Atua i lenā pō; na mātūtū na o le fulufulu mamoe, ae na iai le sau i le laueleele atoa.
Faamatalaga Pito i Lalo
^ I le gagana Eleni, “o laʻu toʻaafe.”
