Faataoto 11:1-31
11 E inosia e Ieova le fua faatautau faaaimamago,+ ae e fiafia o ia i le maa e fua ai mea e atoa.
2 Po ua oo mai ea le faamaualuga? Ona oo mai ai lea o le faalumaina;+ ae e iai le atamai i ē e faamaulalo.+
3 O le faamaoni o ē e amio saʻo e taʻitaʻia ai i latou,+ a o le faaʻoleʻole o ē e lē faamaoni e fano ai a latou mea.+
4 E lē aogā ʻoa i le aso o le toʻasā,+ ae o le amiotonu o le a laveaʻiina ai mai i le oti.+
5 O le amiotonu o le tagata e lē ponā, e faasaʻoina ai lona ala,+ ae e paʻū le tagata amioleaga i lana lava amioleaga.+
6 O le amiotonu o ē e amio saʻo, o le a laveaʻiina ai i latou,+ ae o le manaʻo o i latou o ē e faia mea faapiʻopiʻo, o le a maua ai i latou.+
7 Pe a oti le tagata amioleaga, ua mou atu lona faamoemoe;+ e mou atu foʻi lona faatuatuaga i lona lava malosi.+
8 E laveaʻiina lava le tagata amiotonu mai i puapuaga,+ ae e sau lē e amioleaga nai lo o ia.+
9 O le gutu o lē ua fulitua i le upu moni e māfua ai le faaleagaina o lona uso a tagata,+ a o le poto e faasaoina ai ē e amiotonu.+
10 E matuā olioli le aai ona o le lelei o ē e amiotonu,+ ae pe a faaumatia tagata amioleaga, o le a alalaga fiafia.+
11 E faaeaina le aai ona o le faamanuiaga o tagata amio saʻo,+ ae e lepetia le aai ona o gutu o ē e amioleaga.+
12 Ua ʻinoʻino lē ua leai sona mafaufau i ona uso a tagata,+ a o le tagata e iai le faautaga loloto e lē pisa o ia.+
13 O lē e fealualuaʻi solo ma feaveaʻi tala taufaaleaga,+ ua ia taʻu atu mataupu faalilolilo,+ a o lē e faamaoni lona loto,* ua ia tanumaʻi le mataupu.+
14 Pe a leai se taʻitaʻiga atamai, e mafatia tagata;+ ae e iai le faaolataga i le toʻatele o faufautua.+
15 O le a leaga le iʻuga o se tasi auā na ia faamaonia le aitalafu a sē na te lē iloaina,+ a o lē e lē vave ona lūlū lima i se maliega, e ʻalofia e ia faafitauli.
16 O le fafine tauagafau o ia lea na te maua le mamalu;+ a o pule sauā, e latou te maua le tamaoaiga.
17 O le tamāloa e alofa faamaoni ua agalelei o ia iā te ia lava,+ a o le tagata sauā ua ia aumaia faafitauli i lona lava tino.+
18 O le tagata amioleaga ua ia maua le totogi pepelo,+ a o lē e lūlū le amiotonu, ua ia maua le totogi moni.*+
19 O lē e tū mausalī mo le amiotonu e iʻu i le ola,+ a o lē e tuliloaina le mea ua leaga e iʻu i lona lava oti.+
20 E inosia e Ieova i latou e faapiʻopiʻo o latou loto,+ ae e fiafia o ia i ē e lē ponā o latou ala.+
21 E ui ina tago le lima i le isi lima, e lē sao se tagata leaga mai i le faasalaga;+ ae o le a sao le fanau a ē e amiotonu.+
22 E pei o le mama auro i le isu o le puaa, e faapena foʻi le fafine e lalelei ae ua lē faaaogā lelei lona mafaufau.+
23 O le naunautaʻiga o tagata amiotonu e matuā lelei lava;+ o le faamoemoe o tagata amioleaga, o le toʻasā lea.+
24 E iai le tagata e faasalalau atu ana mea, ae e faateleina pea;+ e iai foʻi le tagata e taofi mai i le avatuina o le mea ua tatau, ae e iʻu i le mativa.+
25 E faatamaoaigaina le tagata limafoaʻi,+ ma o lē e na te matuā faasūsū isi, o le a matuā faasūsūina o ia.+
26 O lē e taofia fatu, e fetuuina o ia e le nuu, ae e iai le faamanuiaga i luga o le ulu o lē na te faatauina mai ai.+
27 O lē e saʻili e fai le mea ua lelei e saʻili pea o ia mo le talileleia;+ a o lē e saʻili mo mea leaga, e oo lava lea iā te ia.+
28 O lē ua faatuatua i ana ʻoa, o le a paʻū o ia;+ a o ē e amiotonu, o le a manuia e pei o lau o laau lauusiusi.+
29 O lē e māfua ai faafitauli i lona lava aiga,+ e fai le matagi ma ona tofi;+ ma e fai le tagata valea ma auauna a le tagata ua atamai lona loto.
30 O le fua o le tagata amiotonu o le laau lea o le ola,+ o lē na te maua ola o tagata, e atamai o ia.+
31 Vaai! E tauia le tagata amiotonu i le lalolagi.+ E sili atu foʻi ona tauia le tagata amioleaga ma le tagata agasala!+
Faamatalaga Pito i Lalo
^ Po o “lona agaga.”
^ O le “totogi pepelo” o lona uiga “o le taui mo galuega leaga.” O le “totogi moni” o lona uiga “o le taui mo galuega lelei.”
