Faataoto 14:1-35
14 Ua atiaʻe e le fafine atamai lona fale,+ a o le fafine valea ua ia lepeti i lalo lona fale i ona lava lima.+
2 E mataʻu iā Ieova le tagata e savali i lana amio saʻo,+ a o le tagata e faapiʻopiʻo ona ala e ʻinoʻino iā te Ia.+
3 E i le gutu o le tagata valea le tootoo o le faasausili,+ a o laugutu o tagata atamamai e leoleoina ai i latou.+
4 A leai ni povi, ua mamā le fale povi, ae e tele le fuata e maua ona o le malosi o le povi poʻa.
5 O le molimau moni o le tagata lea e lē pepelo,+ a o le molimau pepelo e faia tala pepelo.+
6 Ua saʻili e le tagata tauemu le atamai, a ua leai se mea; a e faigofie le poto i le tagata malamalama.+
7 Ia alu ese mai i luma o le tagata valea,+ auā e te mautinoa e lē tautala lona laugutu e tusa ma le poto.+
8 O le atamai o le tagata e iai le utaga mamao,+ o le malamalama lea i lona ala, a o le faavalevalea o tagata vālea, o le ʻolegia lea.+
9 E tauemu i latou e vālea i mea sesē e ui e nofosala ai i latou,+ a o ē e amio saʻo e lotogatasi i latou.+
10 Ua lagona e le tagata le faanoanoa o lona lava loto,+ ma e lē aiā foʻi se isi tagata i le olioli o lona loto.
11 E faatamaʻia fale o tagata amioleaga,+ a o tagata amio saʻo e faateleina o latou faleʻie.+
12 Ua iai le ala e tonu i le manatu o le tagata,+ a o lona taunuuga o ala ia e oti ai.+
13 E ui ina ʻataʻata ae e ono tigā le loto;+ ma e iʻu le olioli i le faanoanoa.+
14 O lē ua leai sona faatuatua i lona loto, e faamalieina o ia i iʻuga o ona ala,+ a o le tagata lelei e faamalieina i iʻuga o ana feutagaʻiga.+
15 E faatuatua le tagata ua leai se poto masani i upu uma,+ a o le tagata e iai le utaga mamao, e na te iloilo lelei ona laasaga.+
16 E mataʻu le tagata atamai ma liliuese mai i le leaga,+ a o le tagata valea e matuā ita ma soona mautinoa.+
17 O lē e vave ona ita e na te faia mea valea,+ a o le tagata e mafaufau lelei e inosia o ia.+
18 O ē ua leai se poto masani e faaalia uiga faavalevalea,+ a o ē e iai le utaga mamao, e faapaleina i le poto.+
19 E ifo tagata leaga i luma o tagata lelei,+ e ifo foʻi tagata leaga i faitotoʻa o le tagata amiotonu.
20 O lē ua itiiti ana mea e inosia o ia e lona uso a tagata,+ a o le tagata mauʻoa e toʻatele ana uō.+
21 E agasala lē e ʻinoʻino i lona uso a tagata,+ a o lē e faaalia le agalelei i ē ua puapuagatia e fiafia o ia.+
22 Pe e lē o feofeoaʻi solo i latou o ē e fafauina mea leaga?+ Ae ua iai le alofa faamaoni ma le faia o mea ua saʻo e i latou ua fuafuaina mea lelei.+
23 E iai le itu lelei e maua mai i ituaiga o galuega uma,+ ae e na o upu o laugutu e iʻu ai i le mativa.
24 O le pale o ē e atamamai, o a latou ʻoa ia; a o le valea a ē e valelea, o le valea lava lea.+
25 O le molimau moni e laveaʻiina ola,+ a o le molimau pepelo e tautala o ia i mea pepelo.+
26 O lē e mataʻu iā Ieova e iai le faatuatuaga malosi,+ ma e malu ai ona atalii.+
27 O le mataʻu iā Ieova o le puna o le ola,+ ina ia liliuese mai i mailei o le oti.+
28 E mamalu se tupu pe a iai tagata e toʻatele,+ ae a leai ni tagata e faaleagaina ai se pule aloaʻia.+
29 O lē e telegese lona ita e tele lona faautaga loloto,+ a o lē e lē lava le onosaʻi e faaalia lona valea.+
30 O le loto e toʻafilemu o le ola lea o le tino o le tagata,+ a o le lotoleaga e pala ai ivi.+
31 O lē ua ave faagaoi mea a tagata lē taualoa, ua ia faalumaina Lē na faia o ia,+ a o lē e faaalia le agalelei i lē e mativa, ua ia faamamaluina o Ia.+
32 E faatoʻilaloina lē e leaga ona o lana amioleaga,+ a o le tagata amiotonu e malu o ia i lona faamaoni.+
33 E tumau le atamai i le loto o le tagata malamalama,+ a o mea ua i totonu o ē e vālea ua faailoaina atu.
34 O le amiotonu e faaeaina ai se nuu,+ a o le agasala o se mea e māsiasi ai atunuu.+
35 E fiafia le tupu i le auauna e gaoioi ma le tofā mamao,+ a o lē e faia mea matagā e toʻasā i ai o ia.+
