Faataoto 16:1-33
16 E faavasega e le tagata manatu o lona loto,+ a o le tali o le laulaufaiva e mai iā Ieova.+
2 O ala uma o le tagata e lelei i lona lava manatu,+ a o Ieova e na te fuatia loto.*+
3 Ia tuuina atu* iā Ieova au galuega,+ ona matuā faatumauina ai lea o au fuafuaga.+
4 Ua saunia mea uma e Ieova mo lona finagalo,+ e faapea foʻi lē e amioleaga mo le aso leaga.+
5 O le loto mimita o tagata, o se mea lea e inosia e Ieova.+ E tago atu le lima i le lima, ae e lē sao se tasi mai i le faasalaga.+
6 E togisalaina mea sesē i le alofa faamaoni ma le mea moni,+ ma o le mataʻu iā Ieova e liliuese ai se tasi mai i le leaga.+
7 Pe a fiafia Ieova i ala o se tagata,+ e na te faapogaia le nofo filemu o ia ma ona fili.+
8 E sili le iai o mea itiiti a ua iai le amiotonu+ nai lo o le tele o oloa ae e leai se faamasinotonu.+
9 E ono manatunatu ma filifili le loto o le tagata i lona ala,+ a o Ieova lava ia na te faatonutonuina ona laasaga.+
10 E ao ona iai faaiʻuga mai i le Atua i laugutu o le tupu;+ e lē tautala faapiʻopiʻo foʻi lona fofoga i le faamasinoga.+
11 O le fua ma le fua faatautau tonu e iā Ieova ia;+ o maa uma e fua ai mea i le ato, o lana galuega lea.+
12 E inosia e tupu le faia o mea leaga,+ auā e matuā faatumauina le nofoālii i le amiotonu.+
13 E fiafia le tupu mamalu i laugutu amiotonu;+ e alofa o ia i lē e tautala i mea saʻo.+
14 O le toʻasā o le tupu o avefeʻau o le oti lea,+ a o le tagata atamai e na te faafilemuina.+
15 O loo iai le ola i le malamalama o fofoga o le tupu,+ ma o lona lotomalie ua pei o le ao o le timu i le taimi e totogo ai mea.+
16 Maʻeu le sili o le mauaina o le atamai nai lo o le auro!+ E ao foʻi ona filifilia le mauaina o le malamalama nai lo o le siliva.+
17 O le ala tele o ē e amio saʻo o le liliuese lea mai i le leaga.+ O lē na te leoleoina lona ala na te tausia lona ola.+
18 E muamua le faamaualuga i le paʻū,+ e muamua foʻi le agaga faualuga i le tautevateva.+
19 E sili le agaga faamaulalo faatasi ma tagata agamalu,+ nai lo o le vaevaeina o le vete faatasi ma ē e fiasili.+
20 O lē e faaalia le tofā mamao i se mataupu, e maua e ia le mea lelei,+ o lē foʻi e faatuatua iā Ieova, e fiafia o ia.+
21 O lē e atamai lona loto e taʻua o lē ua malamalama,+ a o lē e suamalie ona laugutu, e faatauanauina ai.+
22 O le puna o le ola, o le tofā mamao lea i lē ua ia mauaina;+ ma o le aʻoaʻiga o ē e vālea o le valea lava lea.+
23 O le loto o le tagata atamai e māfua ai ona faaalia e lona gutu le tofā mamao,+ ma e faatauanau foʻi ona laugutu.+
24 O upu logoleleia o le meli lea,+ e suamalie i le tagata ma e mālōlō ai ivi.+
25 Ua iai le ala e tonu i le manatu o le tagata,+ a o lona taunuuga, o ala ia e oti ai.+
26 O le tagata e galue mamafa, ua galue mamafa o ia mo ia lava,+ auā ua uunaʻia malosi o ia e lona gutu.+
27 O le tagata ulavale e na te lagaina mea leaga,+ ma ua i ona laugutu upu e peiseaʻī o le afi mumū.+
28 O le tagata faufau leaga e na te faatupuina maseiga,+ ma le tagata e fai tala taufaaleaga e na te talepeina faauōga.+
29 O le tamāloa faasauā e na te faasesēina lona tuaoi,+ ma māfua ai ona alu le tuaoi i se ala e lē lelei.+
30 Ua ia faaivi ona mata ina ia fafau ni faufauga leaga.+ Ua ū ona laugutu ma faataunuu ai ana faiga leaga.
31 O le ulusinā o le pale matagofie+ lea pe a iai i le ala o le amiotonu.+
32 E sili o lē e faagesegese lona ita nai lo o le toa,+ e sili foʻi o lē e na te pulea lona loto, nai lo o lē na te faatoʻilaloina se aai.+
33 Ua faia le vili i luga o vae,+ a o faaiʻuga uma o lea mea e mai iā Ieova lea.+
Faamatalaga Pito i Lalo
^ I le gagana Eperu, “e na te fuatia agaga.”
^ I le gagana Eperu, “ia faataavalevale au galuega iā Ieova.”
