Faataoto 17:1-28
17 E sili le iai o se fasi falaoa ua magumagu a o iai le filemu,+ nai lo o le fale ua tumu i manu ua fasia a ua iai le femisaaʻi.+
2 E pule le auauna ua faaalia le tofā mamao i le atalii e faia mea e mā ai,+ ma o le a iai lana vaega o le tofi faatasi ma le ʻauuso.+
3 E tunu ma faamamā le siliva i le ulo, o le auro i le ogaumu,+ a o Ieova e na te suʻesuʻeina loto.+
4 O le tagata fai mea leaga e uaʻi atu i laugutu faatigā.+ O le tagata pepelo e tuu atu lona taliga i le laulaufaiva ua faatupuina faafitauli.+
5 O le tagata ua tauemu i lē ua itiiti ana mea ua ia faalumaina Lē na faia o ia.+ E lē sao mai i le faasalaga le tagata e fiafia pe a oo le mala i se tasi.+
6 O le pale o toeaina o atalii o a latou fanau,+ ma o le matagofie o le fanau o o latou tamā ia.+
7 E lē talafeagai le laugutu amiotonu i so o se tasi e leai se mafaufau.+ E sili atu la ona lē talafeagai le laugutu pepelo mo se tamālii!+
8 O le meaalofa e pei o se maa tāua e faamalieina ai lē ua iai.+ O mea uma e faasaga i ai o ia e manuia ai.+
9 Ua saʻili i le alofa le tagata ua ufiufi i agasala,+ a o lē e tautala soo i se mataupu ua ia talepeina faauōga.+
10 E sili ona aafia i aʻoaʻiga malosi lē ua iai le malamalama,+ nai lo o tā e selau i se tagata valea.+
11 Ua na o le fouvale e saʻilia e le tagata leaga,+ ma e lē alofa mutimutivale le avefeʻau ua auina atu e faasala o ia.+
12 E sili pe a fetaiaʻi se tamāloa ma se pea ua mamate lana fanau,+ nai lo o le fetaiaʻi ma se tasi ua valea i lona faavalevalea.+
13 O se tasi e taui atu le lelei i le leaga,+ e lē teʻa ese le leaga mai i lona aiga.+
14 O le amataga o finauga e pei o le tatalaina o le vai e se tasi;+ o lea ia e tuua lea mea a o leʻi tetele le misa.+
15 O lē e faapea mai e amiotonu le tagata amioleaga+ ma o se tasi e faapea mai foʻi e amioleaga lē ua amiotonu,+ e inosia i laʻua uma e Ieova.+
16 Aiseā e maua ai i le lima o le tagata valea le tau e maua ai le atamai,+ ae e leai se uunaʻiga lelei o lona loto?*+
17 O le uō moni e alofa i taimi uma,+ ma o ia o se uso ua fanau mo taimi o puapuaga.+
18 O le tamāloa e lē lava lona malamalama e lūlū lima ma se tasi tagata,+ ma faamaonia ai se aitalafu i luma o lana uō.+
19 O lē e manaʻo i le solitulafono ua manaʻo foʻi i le misa.+ O lē ua faamaualugaina lona faitotoʻa ua saʻili e ia le malaia.+
20 O lē e faapiʻopiʻo lona loto e lē maua e ia se mea lelei,+ ma o lē e faagutugutulua lona laulaufaiva e paʻū i le malaia.+
21 O se tamā e na te fanaua se tamaitiiti valea, o se mea e faanoanoa ai o ia;+ e lē iai foʻi se fiafia i le tamā o se tamaitiiti e leai sona mafaufau.+
22 O le loto e fiafia e aogā auā e mālōlō ai,+ a o le loto e momomo e mamago ai ivi.+
23 E talia e le tagata amioleaga se foaʻi e faia i se auala faaalatua mai i le fatafata o se tasi,+ ina ia suia ai ala o se faamasinoga.+
24 Ua iai le atamai i luma o lē ua malamalama,+ a o mata o lē e valea, ua i le tuluʻiga o le lalolagi.+
25 O le atalii valea o le faatigā lea i lona tamā,+ ma e oona foʻi i lē na fanaua o ia.+
26 E lē gata i lea, e lē lelei le tuuina atu o le sala i lē ua amiotonu.+ E feteenaʻi le fasia o tamālii ma le mea ua tonu.+
27 O lē ua pulea ana upu ua iā te ia le poto,+ a o le tagata ua iai le faautaga loloto ua toʻafilemu lona loto.+
28 E oo i le tagata ua valea pe a lē tautala, e manatu i ai ua atamai o ia;+ o se tasi e pupuni ona laugutu, e manatu foʻi i ai ua iai le malamalama.
Faamatalaga Pito i Lalo
^ I le gagana Eperu, “ua leai sona loto.”
