Faataoto 19:1-29
19 E sili le tagata e itiiti ana mea ae e savali ma le faamaoni,+ nai lo o le tagata e faapiʻopiʻo ona laugutu, ma le tagata e valea.+
2 E lē lelei foʻi le tagata e aunoa ma le poto,+ ma e agasala le tagata e televave ona vae.+
3 O le valea o le tagata e lē tonu ai lona ala,+ ma ua matuā ita ai lona loto iā Ieova.+
4 O le tamaoaiga e tele ai uō,+ a o le tagata e lē taualoa e faaesea o ia mai i lana uō.+
5 E lē saʻoloto le molimau pepelo mai i le faasalaga,+ ma e lē sao lē e faitala pepelo.+
6 E toʻatele e latou te faamalie le loto o se tamālii,+ ma o tagata uma lava e uō ma le tagata e fai meaalofa.+
7 O uso uma o le tagata e itiiti ana mea ua ʻinoʻino iā te ia.+ E sili atu la ona taumamao ana uō mamae mai iā te ia!+ Ua ia tuliloa iā i latou ma ana tala; a ua leai se isi o i latou.+
8 O lē ua maua le loto ua poto,+ ua alofa o ia iā te ia lava. O lē ua leoleoina le faautaga loloto, e na te maua mea lelei.+
9 E lē saʻoloto le molimau pepelo mai i le faasalaga,+ ma e fano lē e faitala pepelo.+
10 E lē talafeagai se olaga maumea i le tagata valea.+ E matuā lē talafeagai lava foʻi ona pule le auauna i perenise!+
11 O le tofā mamao o le tagata, e faagesegese ai lona ita,+ ma e matagofie foʻi lona lē manatua o le agaleaga.+
12 O le toʻasā o le tupu e pei o le tagi a le leona poʻa taanoa,+ a o lona talileleia e pei o le sau i luga o le mutia.+
13 O le atalii valea, e māfua ai faafitauli i lona tamā,+ ma le faamisa a le avā e pei o le taualuga ua tutulu, e tuliese ai se tasi.+
14 O le tofi mai i tamā, o le fale ma le tamaoaiga,+ a o le avā e faautauta e mai iā Ieova lea.+
15 O le paiē e māfua ai le moegase,+ ma e fia ʻai le tagata paiē.+
16 O le tagata e na te tausia poloaʻiga, ua ia tausia lona ola;+ o lē e faatalalē i ona ala, o le a fasiotia o ia.+
17 O lē e faaalia le agalelei i lē e lē taualoa, ua nonō atu iā Ieova,+ ma o le a toe tauia o ia e Ia e tusa ma ana gaoioiga.+
18 Ia aʻoaʻi lou atalii manū o iai se faamoemoe;+ ma aua e te naunau ia oo le oti iā te ia.+
19 O lē e ita tele e totogi e ia le sala;+ auā afai e te laveaʻi iā te ia, e te saga faia pea lenā mea.+
20 Ia faalogo i le fautuaga ma talia le aʻoaʻiga,+ ina ia e atamai ai i aso o i luma.+
21 E tele fuafuaga i le loto o le tagata,+ a o le finagalo o Ieova e tumau pea.+
22 O le mea manaia ua i le tagata, o lona alofa faamaoni lea;+ ma e sili atu o lē e itiiti ana mea nai lo o le tagata pepelo.+
23 O le mataʻu iā Ieova e iʻu lea i le ola,+ ma e faamalieina le tagata i le pō atoa;+ o le a lē oo i se tasi ni mea leaga.+
24 Ua natia e le tagata paiē lona lima i le ipu faaofuofu ua iai meaʻai;+ ua lē mafai ona ia toe faafoʻi i lona gutu.+
25 E ao ona e tā i lē e tauemu,+ ina ia iai i lē ua leai se poto masani le utaga mamao;+ ma e ao ona aʻoaʻi atu i lē ua malamalama, ina ia iloa ai e ia le poto.+
26 O lē e sauā i lona tamā ma tuliese lona tinā,+ o le atalii lea e na te faia mea e mā ai ma taʻuvalea ai.+
27 Loʻu atalii e, afai e te lē toe faalogo i le aʻoaʻo atu, e te alu ese mai i upu o le poto.+
28 O le molimau ulavale e faifai i le faamasinotonu,+ ma o gutu o ē e amioleaga e folo mea e faatigā ai.+
29 Ua saunia faamasinoga mo ē e tauemu,+ ma tā i papatua o tagata vālea.+
