Faataoto 22:1-29
22 E sili le manaʻo i le igoa lelei nai lo o le tele o le tamaoaiga;+ e sili foʻi le taʻuleleia nai lo o le siliva ma le auro.+
2 E iai mea e tutusa ai le tagata mauʻoa ma le tagata e itiiti ana mea.+ O Lē na faia i latou uma o Ieova lea.+
3 O lē ua iai le utaga mamao e na te iloa atu le mala ma lafi ai,+ a o lē ua leai se poto masani e alu atu pea o ia ma malaia ai i āuga leaga.+
4 O le iʻuga o le lotomaulalo ma le mataʻu iā Ieova, o le tamaoaiga, o le mamalu ma le ola lea.+
5 Ua iai laau tuitui ma mailei i le ala o le tagata fai mea faapiʻopiʻo;+ a o le tagata e na te leoleoina lona ola, e taumamao o ia mai i ia mea.+
6 Ia aʻoaʻo le tama e tusa ma le ala saʻo;+ a oo ina toeaina lava e lē liliuese ai o ia.+
7 E pule le tagata mauʻoa i ē e itiiti a latou mea,+ e fai ma auauna le tagata aitalafu i le tagata na nonō mai ai.+
8 O lē e lūlūina le amiolētonu o le a ia seleseleina mea e tigā,+ ma e faaiʻuina le tootoo o lona ita.+
9 E faamanuiaina le tagata agalelei,* auā ua ia tuuina atu ana meaʻai i lē ua faatauvaa.+
10 Ia tuliese le tagata tauemu ina ia faauma ai maseiga, ma faamutaina ai finauga faaletulafono ma le faalumaina.+
11 O lē e naunau i le lotomamā+ ma e logoleleia ana faamatalaga, o le a fai le tupu ma ana uō.+
12 O fofoga o Ieova ua leoleoina ai le poto,+ ae e na te faaiʻuvale upu a le tagata e lē faamaoni.+
13 Ua faapea ane le tagata paiē:+ “Ua i fafo se leona!+ O le a fasiotia ai aʻu i totonu o nofoaga faitele!”
14 O le gutu o le fafine ese o se lua maulalo lea.+ E paʻū i ai le tagata ua taʻusalaina e Ieova.+
15 Ua fusifusia le loto o le tama i le valea;+ ae e aveese mamao e le laau* o le aʻoaʻiga mai iā te ia.+
16 O lē e ave faagaoi mea a lē e faatauvaa ina ia tele ai ana mea,+ ma o lē foʻi e avatu i lē e mauʻoa, e iʻu ai lava i le mativa.+
17 Ia uaʻi atu ou taliga ma faalogo i upu a ē e atamamai,+ ina ia matuā mafaufau ai lou loto i loʻu poto.+
18 Auā o se mea e fiafia ai pe a e tausia na mea i lou loto,+ ina ia iai pea ia mea i ou laugutu.+
19 Ua ou tuuina atu iā te oe le poto i le asō, o oe lava, ina ia fai Ieova+ ma ou faatuatuaga.
20 Pe na ou lē tusi atu ea iā te oe i aso ua mavae i ni fautuaga ma le poto,+
21 ina ia faailoa atu iā te oe le faamaoni o faamatalaga moni, ina ia toe foʻi atu ma faamatalaga moni i lē na auina mai oe?+
22 Aua e te faoa mea a le tagata faatauvaa talu ai e faatauvaa o ia,+ ma aua e te nutililiia le tagata puapuagatia i le faitotoʻa o le aai.+
23 Auā o Ieova lava ia e finau mo i latou,+ ma o le a ia faoa ola o i latou ua gaoia a latou mea.+
24 Aua e te faauō i se tasi e maitaita;+ aua foʻi e te faifai mea faatasi ma se tagata e ita leaga,
25 neʻi e mulimuli i ona ala ma maileia ai lou ola.+
26 Aua neʻi fai oe ma se tasi o i latou e fepaʻiaʻi alofilima,+ o i latou foʻi ua faia faamaoniga mo tupe nonō.+
27 Afai e leai se mea e totogi ai, aiseā o le a ia ave ai lou moega o loo e taoto ai?
28 Aua e te toe sii i tua le tuaoi na faia i aso ua mavae e ou augātamā.+
29 Po ua e tagaʻi ea i se tagata tomai i lana galuega? O le a tū o ia i luma o tupu;+ e lē tū o ia i luma o tagata lautele.
Faamatalaga Pito i Lalo
^ I le gagana Eperu, “o le tagata e mata agalelei.”
^ E faaataina mai e le “laau” faasaʻoga ma le faia foʻi o faasalaga.
