Faataoto 24:1-34
24 Aua e te matauʻa i tagata leaga+ aua foʻi e te naunau e aufaatasi ma i latou.+
2 Auā e mafaufau loloto pea o latou loto e faoa mea, ma e tautatala o latou laugutu i le faatupuina o vevesi.+
3 Ua atiaʻe le aiga o i le fale i le atamai,+ ma ua faamausalīina i le faautaga loloto.+
4 O le poto foʻi e faatumuina ai potu i totonu i mea tautele ma mea tāua mananaia.+
5 O lē e na te faaaogā ma le atamai lona malosi o le tagata malosi lea,+ ma o le tagata poto, e tupu lona malosi.+
6 Auā o le taʻitaʻiga atamai e te faia ai lau taua,+ ma e iai le faaolataga i le toʻatele o faufautua.+
7 Ua maualuga tele le atamai moni i le tagata valea;+ e lē tautala lona gutu i le faitotoʻa o le aai.
8 O so o se tasi e faufau e fai mea leaga, e taʻua o ia o le tagata e atamai i faufauga leaga.+
9 O le amio matagā e māfua mai i le valea, o le agasala lea,+ ma o le tagata tauemu e inosia o ia.+
10 Po ua e lotovaivai ea i le aso o le puapuaga?+ O le a itiiti lou malosi.
11 Ia laveaʻi iā i latou ua puʻea ia oti; ma i latou ua tautevateva atu i le faaumatiaga, Inā taofi mai ia i latou.+
12 Afai e te faapea ane: “Faauta foʻi! E matou te leʻi iloaina lea mea,”+ po ua lē silafia ea e lē na te faitaulia loto lea mea,+ ma o ia foʻi o loo mātauina lelei oe+ ma toe totogi atu i le tagata e tusa ma ana gaoioiga?+
13 Loʻu atalii e, ia ʻai i le meli auā e lelei ia; ia iai i lou gutu le meli suamalie.+
14 Ia faapea foʻi, ia e iloa le atamai mo lou lava lelei.+ Afai ua e maua, o le a iai se lumanaʻi manuia, ma e lē mou atu lou faamoemoe.+
15 Aua e te lamalama e pei o le tagata amioleaga i le mea e mau ai le tagata amiotonu;+ aua foʻi e te faoa le mea e nofo ai o ia.+
16 Auā e faafitu ona paʻū o lē e amiotonu ma o le a toe tulaʻi o ia;+ ae o le a tautevateva o ē e amioleaga ona o mala.+
17 Aua e te olioli pe a paʻū lou fili; aua foʻi neʻi fiafia lou loto pe a tausuai o ia,+
18 neʻi silasila i ai Ieova ma e leaga lea mea i lana silafaga ma liliuese ai lona toʻasā iā te ia.+
19 Aua e te atugalu ona o ē e fai mea leaga. Aua e te matauʻa i tagata amioleaga.+
20 Auā e leai se lumanaʻi mo se tasi e leaga;+ o le a tineia le molī a ē e amioleaga.+
21 Loʻu atalii e, ia e mataʻu iā Ieova atoa ma le tupu.+ Aua e te aafia fua iā i latou o ē e fouvale.+
22 Auā o le a tupu faafuaseʻi lo latou malaia,+ o ai e iloa le aveeseina o i latou o ē e fouvale?+
23 O nei foʻi faamatalaga e mo tagata atamamai:+ E lē lelei le faaʻauʻau i se faamasinoga.+
24 O lē e fai atu i le tagata amioleaga: “Ua amiotonu oe,”+ e matuā taʻusalaina o ia e tagata, ma e taʻuleagaina o ia e nuu.
25 A o i latou ua aʻoaʻi iā te ia o se mea lelei lea,+ o le a oo faamanuiaga o mea lelei iā i latou.+
26 E sogi o ia i laugutu o lē e tali mai i upu tonu.+
27 Ia sauniuni lau galuega i fafo, ma ia tapena mea mo le galuega i le fanua.+ Mulimuli ane, ia e atiaʻe lou aiga o loo i le fale.
28 Aua neʻi e molimau fua faasaga i lou uso a tagata.+ Auā ua e faaaogā lou gutu i se auala valea.+
29 Aua e te faapea ane: “E pei ona ia faia iā te aʻu, e faapea lava ona ou faia iā te ia.+ Ou te taui atu i tagata taʻitoʻatasi e tusa ma lana gaoioiga.”+
30 Na ou ui ane i le fanua o le tagata paiē+ ma le togāvine o le tagata ua leai se mafaufau.+
31 Faauta! ua na o vao leaga ua ola ai.+ Ua ufitia le fanua i laau tuitui, ma ua solo i lalo lona pā maa.+
32 Ona ou iloa ai lea o aʻu lava; ua amata ona ave i fale lenei mea;+ Ua ou vaai ma ua ou talia le aʻoaʻiga:+
33 Seʻi fai sina moe, sina matamoe, sina piilima e taoto ai,+
34 ona oo mai ai lea o lou mativa e pei o le tagata fao mea i le auala, ma lou lē tagolima e pei o le tagata ua uu ana auupega.+
