Faataoto 26:1-28
26 E pei o le kiona i le tau māfanafana ma e pei o le timu i le taimi o le seleselega,+ e faapena foʻi ona lē talafeagai le mamalu mo se tagata valea.+
2 E pei ona iai le māfuaaga e lele ese ai le manulele ma e pei foʻi ona feleleaʻi se peʻapeʻa, e faapena ona lē oo mai se mala e aunoa ma se māfuaaga tatau.+
3 O le sasa e mo le solofanua,+ o le faagutu+ e mo le asini, ma le laau mo papatua o tagata vālea.+
4 Aua e te tali atu i se tagata valea e tusa ma lona faavalevalea, neʻi pei ai oe o ia.+
5 Ia tali atu i le tagata valea e tusa ma lona faavalevalea, ina neʻi atamai o ia e tusa ma ona lava manatu.+
6 E pei o lē na te faia mea e leaga ai ona vae, e pei o le tagata e inu i le sauā, o le tagata lea ua ia tuuina atu mataupu i lima o le tagata valea.+
7 Pe na asu aʻe ea e vae o lē e pipili le vai? Ona iai lea o le faataoto i le gutu o lē e valea.+
8 E pei o le tagata na te tanumia se maa i se faaputuga maa, o le tagata lea ua ia tuu atu le mamalu i se tagata valea.+
9 E pei ona maua le vao tuitui i le lima o le tagata onā, e faapena ona iai le faataoto i gutu o tagata vālea.+
10 E pei ona tū i so o se mea le aū a le tagata fanafana aū, e faapena le tagata e na te faafaigaluegaina se tagata valea,+ po o se tasi e faafaigaluegaina o ē o loo savavali i le auala.
11 E pei ona toe foʻi le taʻifau i lana puaʻiga, e faapena foʻi ona toe faia e le tagata valea o lona faavalevalea.+
12 Po ua e vaai i se tagata e atamai i lona lava manatu?+ E telē le faamoemoe mo le tagata valea e suia ai ona ala nai lo o ia.+
13 Ua faapea ane le paiē: “O loo iai se tamaʻi leona i le ala, o se leona i le nofoaga faitele.”+
14 E feliuliuaʻi le faitotoʻa i ona sooga, e faapena le tagata paiē i luga o lona moega.+
15 Ua natia e le tagata paiē lona lima i le ipu faaofuofu ua iai meaʻai; ua matuā lē lavā o ia e toe faafoʻi i lona gutu.+
16 E manatu le tagata paiē e sili atu lona atamai+ nai lo o le toʻafitu ua fai mai ni tali ma le mafaufau.
17 E pei o se tasi e tago i taliga o le taʻifau, e faapea le tagata ua ui ane ma ita tele i le misa a isi ma oso vale ai.+
18 E pei o se tasi ua faalētonu le mafaufau o loo fanafana aū mumū,+ o aū ma le oti,
19 o le tagata lea ua ia ʻolegia lona tuaoi ma faapea atu: “Pe e lē o saʻu mea ula ea?”+
20 E mate le afi pe a leai ni fafie, ma e lē toe iai ni vevesi pe a leai se tagata faitala taufaaleaga.+
21 E pei o le malala mo le afi o le a pē ma fafie mo le afi, e faapena foʻi le tagata faamisa ua faatuputele ai se misa.+
22 O upu a le tagata faitala taufaaleaga e pei o mea e folo patatō, e ō ifo i vaega pito i totonu o le manava.+
23 E pei o siliva o loo iila ai le taʻegaipu omea, e faapena laugutu ua alofa tele ae e leaga le loto.+
24 O laugutu o lē e ʻinoʻino ua ia lē faailoa atu o ia lava, ae e na te natia i totonu le taufaasesē.+
25 E ui lava e logolelei lona leo,+ aua e te talitonu iā te ia,+ auā e fitu mea inosia+ o loo i lona loto.
26 E ufiufia le ʻinoʻino i le taufaasesē. E faaalia lona leaga i le faapotopotoga.+
27 O lē e na te elia se lua e paū i ai o ia,+ ma o lē e na te faataavale ese se maa, e toe taavale mai lava iā te ia.+
28 O le laulaufaiva e pepelo e ʻinoʻino i lē e na te nutililiia,+ ma o le gutu taufaasee e tupu ai le malaia.+
