Faataoto 30:1-33
30 O upu a Akuru le atalii o Iake, o le feʻau tāua.+ O le faamatalaga a le tagata iā Itielu, o Itielu atoa ma Ukala.
2 Auā ua sili ona ou valea nai lo o se isi lava,+ ma e lē o iā te aʻu le malamalama lea o loo i tagata;+
3 ou te leʻi aʻoaʻoina foʻi le atamai;+ ou te leʻi iloa le poto o Lē e sili ona paia.+
4 O ai ua afio aʻe i le lagi ma toe afio ifo?+ O ai na faapotopotoina le matagi+ i le faaofuofu o ona lima?+ O ai na afīfī le vai i le ofu tele?+ O ai na faatūina tuluʻiga uma o le lalolagi? O ai lona suafa+ ma o ai le igoa o lona alo, pe afai ua e iloa?+
5 O afioga uma a le Atua e mamā.+ O ia o le talita i ē e sulufaʻi atu iā te ia.+
6 Aua le faaopoopoina se upu i ana afioga,+ neʻi aʻoaʻia oe e ia, ma lē taʻupepeloina ai oe.+
7 E lua mea ou te talosaga atu ai iā te oe.+ Aua e te taofia ia mea mai iā te aʻu ae ou te leʻi oti.+
8 Ia faamamao iā te aʻu le lē tautala saʻo ma le pepelo.+ Ia aua neʻi oʻu matuā mativa po o ou te matuā tamaoaiga.+ Ia ou ʻai tau lava o meaʻai e tatau mo aʻu,+
9 neʻi oʻu maʻona ma ou faafitia oe+ ma faapea ane: “O ai ea Ieova?”+ ma ina neʻi oʻu mativa ma gaoi ai ma faalumaina ai le suafa o loʻu Atua.+
10 Aua e te faia tala taufaaleaga e faatatau i se auauna i lona matai,+ neʻi fetuu o ia iā te oe, ma ina ia lē nofosala ai oe.+
11 E iai le tupulaga e faamalaia i o latou tamā ma lē faaaloalo i o latou tinā.+
12 E iai le tupulaga ua mamā i latou i o latou lava manatu+ ae e leʻi faamamāina mai i o latou otaotavale.+
13 E iai le tupulaga ae e pagā le faasiasia naʻuā o latou mata! ma o loo faamaualugaina o latou mata.+
14 E iai le tupulaga o o latou nifo o pelu ia ma o latou ivi auvae o naifi ia,+ e aai i latou i ē e mafatia i le lalolagi ma ē e matitiva mai i le fanau a tagata.+
15 E lua afafine o le aluka* ua alalaga: “Ia aumai! Aumai!” E tolu mea e lē faamalieina, o mea e fā ua lē fai mai: “Ua lava!”
16 O le Tuugamau,*+ o le manava ua lē fanau,+ o le laueleele ua lē malie i vai+ ma le afi+ ua lē faapea mai: “Ua lava!”+
17 O mata ua tauemu i le tamā ma ʻinoʻino e usiusitaʻi i le tinā,+ e saliese e oreva o le vanu ma e aai ai toloaʻi a le aeto.
18 E tolu mea e matuā ofoofogia iā te aʻu, o mea lava e fā ou te lē malamalama i ai:
19 o le ala o le aeto i le lagi, o le ala o le gata i luga o le papa, o le ala o se vaa i le vasaloloa+ ma le ala o le tane i le teine muli.+
20 O le ala lenei o le fafine mulilua: ua ia ʻai ma soloi i lona gutu ma faapea ane: “E leai saʻu mea sesē ua faia.”+
21 O mea e tolu ua vevesi ai le lalolagi, ma o mea e fā ia ua lē lavā ona onosaʻi ai:
22 pe a pule se pologa e avea o se tupu,+ ma se tagata valea pe a maʻona i meaʻai;+
23 pe a fai se fafine inosia ma avā a se tasi,+ ma pe a faoa e le auauna teine le tulaga o lona matai fafine.+
24 E fā meaola e sili ona ninii i le lalolagi, ae ua fananau mai ma lo latou atamai:+
25 o loi o le nuu ia e lē malosi,+ ae i le tau māfanafana e latou te sauniunia ai a latou meaʻai;+
26 o sefanai,*+ o le nuu ia e lē malosi, ae i luga o papa e latou te fai ai o latou fale;+
27 o sē akerise+ e leai so latou tupu, ae e ō atu i latou ua vaevaeina i ʻau;+
28 o le pili+ moo e pipii i ona lima ma ua iai i le maota matagofie o se tupu.
29 E tolu mea ua feoaʻi lelei, ma e fā mea e matagofie pe a ō i latou:
30 o le leona e sili lona malosi i manu uma ma e lē liliuese mai i luma o se tasi;+
31 o le taʻifau tulimanu,* o le ʻoti poʻa ma le tupu ma lana lava ʻautau.+
32 Afai ua e gaoioi ma le valea i le faasilisilia o oe lava,+ ma ua e fuafua e faia faapea, ia tuu lou lima i lou gutu.+
33 Auā o le viliina o le suāsusu e maua mai ai le pata, o le oomi o le isu e sau ai le toto, ma o le faaoso o le ita e tupu ai le misa.+
Faamatalaga Pito i Lalo
^ O se ituaiga o anufe e ola i le vaivai e na te mitiia le toto pe a pipii i le tino o se tagata po o se manu.
^ Tagaʻi i le Faaopoopoga e 6.
^ O se manu e pei o se lapiti e nofo i mea maugā.
^ O le upu Peretania o le greyhound.
