Failauga 12:1-14
12 Ia e manatua o Lē e Sili na Foafoaina oe+ i aso o lou tauleʻaleʻa,+ a o leʻi oo mai aso e malaia ai,+ pe oo mai foʻi tausaga e te faapea mai ai: “E leai soʻu fiafia i ai”;+
2 a o leʻi faapouliuligia le lā ma le malamalama, ma le masina ma fetu,+ ma maligi ifo timuga mai i ao;
3 i le aso e gatete ai o ē e leoleoina fale,+ ua vaivai ma faanoʻunoʻu ai tane malolosi,+ ma ua lē toe faigaluega ai fafine+ e olo fatu* auā ua tau leai nisi o loo totoe, ma ua nenefu ai foʻi le vaai a fafine* o loo vāai atu i faamalama;+
4 ua tapunia ai faitotoʻa i le ala,+ pe a itiiti le leo o le mea e olo ai fatu,+ e tulaʻi ai foʻi se tasi i le tagi a le manulele, ma ua leo itiiti ai teine pepese uma.+
5 Ua latou fefefe foʻi i mea maualuluga, ma ua iai mea e matataʻu ai i le ala. E fuga mai le laau o le sekati,+ ma e faatosotosololoa le savali a le sē, ua lē toe manogi se meaʻai* auā ua savali atu le tagata i lona fale+ e nofo mau ai, ma e savavali solo foʻi i le ala o ē e taufaitagituʻi;+
6 a o leʻi motu le maea siliva, ma e leʻi nutililiia le ipu faaofuofu auro,+ ma taʻe le sioki i le vaipuna, ma nutililiia foʻi le uili o le vaieli.
7 Ona toe foʻi atu lea o le efuefu i le eleele+ sa iai muamua, ma e toe foʻi atu le agaga*+ i le Atua moni+ o lē na aumaia.+
8 Ua faapea mai le failauga:*+ “E matuā faatauvaa lava lenei mea! E faatauvaa mea uma lava.”+
9 E lē gata ina tele le atamai o le failauga,+ ae na ia aʻoaʻoina pea tagata ina ia popoto,+ na ia manatunatu ma faia ni saʻiliʻiliga auʻiliʻili,+ ina ia saunia ma faatulagaina le tele o faataoto.+
10 Na saʻili le failauga i upu e logoleleia,+ ma le tusiaina o upu saʻo o le upu moni.+
11 O upu a ē e atamamai ua pei o tui e tui ai povi,+ o i latou foʻi e toʻaʻaga e aoaoina faamatalaga poto ua pei o fao ua faamauina;+ o upu a ē e popoto ua tuuina mai e le leoleo mamoe e toʻatasi.+
12 Loʻu atalii e, afai e iai nisi mea, ia e utagia lenei lapataʻiga: E leai se iʻuga o le tusiaina o tusi, ma o le tele o le taimi e alu ai i ia tusi e vaivai ai le tino.+
13 O le faaiʻuga lenei o mea uma ua faalogo i ai: Ia mataʻu i le Atua moni+ ma tausi i ana poloaʻiga.+ Auā o le matafaioi lea a tagata.
14 Auā o le a faamasino e le Atua moni galuega uma ma mea uma ua natia, ina ia iloa ai pe lelei pe leaga.+
Faamatalaga Pito i Lalo
^ E faatatau atu le “olo fatu” i nifo o le tagata.
^ E faatatau atu “fafine o loo vāai” i mata o le tagata.
^ I le gagana Eperu, “ua pa le fua o le laau (caper berry)” ma e faasino atu i se ituaiga o vivao (caper berry) e faaoso ai le fia ʻai.
^ Po o le “malosi o le ola.”
^ Po o “lē faapotopotoina.”
