Failauga 2:1-26
2 O aʻu, ua ou faapea ifo i loʻu loto:+ “Inā sau ia, seʻi oʻu tofotofo iā te aʻu i le olioli.+ Ia vaai foʻi i mea lelei.”+ Faauta! ua faatauvaa foʻi lea mea.
2 Ua ou fai atu i le ʻata: “Ua valea lea!”+ ma i le olioli:+ “O le ā le aogā o lea mea?”
3 Na ou suʻesuʻe ma loʻu loto i le faafiafiaina o aʻu i le uaina,+ a o oʻu taʻitaʻiina loʻu loto i le atamai,+ e oo i le tuliloaina o le valea, seʻia ou iloa pe e iai se lelei i le fanau a tagata i mea ua latou faia i lalo o le lagi i aso uma latou te ola ai.+
4 Sa ou faia galuega tetele.+ Sa ou fausia fale mo aʻu;+ sa ou totōina togāvine mo aʻu.+
5 Sa ou faia mo aʻu togālaau ma fanua e totō ai laau,+ sa ou totō ai foʻi laau ʻaina eseese.
6 Sa ou faia ai mo aʻu faatanoa vai,+ ina ia faasūsūina ai togālaau e faatupuina ai laau.+
7 Sa iā te aʻu auauna tane ma auauna teine,+ sa fananau foʻi fanau tama a auauna i loʻu fale.+ Sa iā te aʻu foʻi le anoanoaʻi o lafumanu, o povi ma mamoe, e sili atu iā i latou uma o ē na muamua iā te aʻu i Ierusalema.+
8 Sa ou faaputuina siliva ma auro mo aʻu,+ ma oloa a tupu ma itumalo.+ Sa iā te aʻu tama pepese ma teine pepese+ ma le toʻatele o tamaʻitaʻi,+ o mea ia e matuā fiafia+ i ai le fanau a tagata.
9 Ua sili aʻu ma ua atili ai ona faateleina aʻu mea i lo o se tasi na muamua atu iā te aʻu i Ierusalema.+ E lē gata i lea, ua tumau loʻu atamai iā te aʻu.+
10 O so o se mea na manaʻo i ai oʻu mata, ou te leʻi ʻaloese mai ai.+ Ou te leʻi taofia loʻu loto mai so o se mea e olioli ai, auā na olioli loʻu loto ona o aʻu galuega mamafa,+ ma o loʻu taui lea mai i aʻu galuega mamafa uma.+
11 A o aʻu sa ou liliu atu i aʻu galuega uma na faia e oʻu lima, ma galuega mamafa na ou tigāina e fai,+ faauta! e faatauvaa mea uma, ma le ʻai a le matagi+ ma e leai se mea e aogā i lalo o le lā.+
12 O aʻu, sa ou liliu atu ina ia iloa le atamai+ ma le faalialiavale ma amioga faavalevalea;+ auā o le ā le mea e mafai ona fai e se tagata o lē e mulimuli i le tupu? O mea ia ua uma ona faia e tagata.
13 O aʻu foʻi ua ou iloa e sili ona aogā le atamai nai lo o amioga faavalevalea,+ e pei ona sili ona aogā o le malamalama i le pogisa.+
14 O so o se tasi e atamai, e na te iloa lelei lona ala;*+ a o lē e valea, e savali i le pogisa.+ O aʻu ua ou iloa foʻi e tasi le iʻuga e oo iā i laʻua uma.+
15 Ona ou faapea ifo lea i loʻu loto:+ “E oo foʻi iā te aʻu lava ia le iʻuga+ lea e oo i le tagata valea.”+ Aiseā la na tele ai loʻu atamai+ i lenā taimi? Ua ou faapea ifo i loʻu loto: “O le mea faatauvaa foʻi lea.”
16 Auā e lē manatuaina pea le tagata atamai e pei ona lē manatuaina o le tagata valea.+ Auā i aso o i luma o le a galo i latou uma: ma e faapefea ona oti le tagata atamai? E pei lava o le tagata valea.+
17 Sa ou ʻinoʻino i le olaga,+ auā i loʻu manatu ua leaga galuega sa faia i lalo o le lā,+ auā o mea uma e faatauvaa ia ma le ʻai a le matagi.+
18 O aʻu, sa ou ʻinoʻino i laʻu galuega mamafa lea sa ou tigāina ai i lalo o le lā,+ auā ou te tuua mo le tagata e sosoo mai iā te aʻu pe a mavae atu aʻu.+
19 O ai sē e na te iloa po o ia o se tagata atamai po o se tagata valea?+ Ae o le a pule o ia i aʻu mea uma na ou galue mamafa ai, ma o mea ia na ou faia i loʻu atamai i lalo o le lā.+ O le mea faatauvaa foʻi lea.
20 Na suia loʻu mafaufau ma amata ai ona faanoanoa loʻu loto+ i galuega mamafa uma na ou tigāina ai i lalo o le lā.
21 Auā e iai le tagata na faia lana galuega mamafa i le atamai, ma le poto ma le tomai,+ ae e tuuina atu i le tagata e leʻi galue mamafa ai e fai ma ona tofi.+ O le mea faatauvaa foʻi lea ma e sili ona leaga.+
22 O le ā le mea ua maua e le tagata ona o ana galuega mamafa uma, ma le tauivi o lona loto lea na ia galue mamafa ai i lalo o le lā?+
23 Auā o ona aso uma i lana galuega ua oo iā te ia le tigā ma le lototigā,+ ua lē mapu foʻi lona loto i le pō.+ O le mea faatauvaa foʻi lea.
24 E leai se mea e sili i le tagata nai lo o le ʻai ma inu, ma iloa e ia mea lelei ona o lana galuega mamafa.+ O aʻu, ua ou vaai foʻi i lea mea, ma iloa ai o le mea lea e mai i le aao o le Atua moni.+
25 Auā o ai se tasi e sili ona lelei ana meaʻai+ ma ana meainu nai lo o aʻu?+
26 Auā o le tagata ua lelei i ona luma+ ua ia avatu i ai le atamai, o le poto ma le olioli,+ a ua ia tuuina atu i le tagata agasala le galuega o le aoaoina ma le faaputu, ina ia avatu i lē ua lelei i luma o le Atua moni.+ O le mea faatauvaa foʻi lea ma le ʻai a le matagi.+
Faamatalaga Pito i Lalo
^ I le gagana Eperu, “ua i lona ulu ona mata.”
