Failauga 6:1-12
6 E iai le mala ua ou iloa i lalo o le lā ma ua taatele i le fanau a tagata:
2 o le tagata ua foaʻiina i ai e le Atua moni le tamaoaiga, o meafaitino ma le mamalu,+ o lē foʻi e lē mativa i se mea e tasi e naunau i ai o ia,+ peitaʻi e lē foaʻiina e le Atua moni iā te ia ia mafai ona ʻai ai,+ ae e ʻai ai se tagata ese.+ O le mea faatauvaa foʻi lea mea, ma o se maʻi leaga.
3 Afai ua fanaua e se tagata ni fanau se toʻaselau,+ ma ola o ia mo le tele o tausaga ina ia faateleina ai ona tausaga,+ ae e lē faamalieina ai lava o ia i mea lelei,+ e lē alu foʻi o ia i se tuugamau,+ ou te fai atu e sili atu le pepe ua fanau lē au nai lo o ia.+
4 Auā ua iʻuvale lona fanau mai ma e alu ese o ia i le pogisa, e ufitia foʻi lona igoa i le pogisa.+
5 E oo foʻi i le lā, e leʻi vaai i ai o ia pe e iloa foʻi.+ Ua sili le filemu o ia nai lo o lē na taʻua muamua.+
6 Seʻi faapea ua ola o ia mo le lua afe tausaga ae e lē iloa lava e ia ni mea lelei,+ pe e lē tasi ea le mea e ō i ai tagata uma?+
7 O galuega mamafa uma a le fanau a tagata e mo o latou gutu,+ ae e lē faamalieina ai o latou lava manaʻoga.
8 Auā o le ā se mea e sili ai le tagata atamai i lo o le tagata valea?+ O le ā foʻi se mea ua maua e lē ua puapuagatia i lona iloa o le ala e savali ai i luma o tagata ola?
9 E sili ona vaai i ai mata nai lo o le manaʻonaʻo o le loto.+ O le mea faatauvaa foʻi lea, ma le ʻai a le matagi.+
10 Po o ā lava mea e oo mai, ua uma ona taʻua lona igoa, ua iloa foʻi le tulaga o le tagata;+ ma e lē mafai ona finau lana mataupu ma se tasi e sili atu lona malosi nai lo o ia.+
11 Auā e iai le tele o mea ua māfua ai le tulaga faatauvaa,+ o le ā la le aogā i le tagata?
12 Auā o ai ua na iloa le mea lelei e mafai ona fiafia ai le tagata i lona olaga+ i aso uma o lona olaga faatauvaa, a o faagasolo ona aso e pei o se ata lafoia?+ O ai foʻi e mafai ona taʻu i le tagata le mea o le a tupu i lalo o le lā pe a mavae atu o ia?+
