Filemoni 1:1-25
1 O aʻu o Paulo, o le pagota+ ona o Keriso Iesu, ma Timoteo+ lo tatou uso, o laʻu tusi lenei iā Filemoni lo ma uso pele, o lē na tatou galulue faatasi,+
2 ma Afia lo maʻua tuafafine, ma Arekipa+ lo maʻua uso a fitafita,+ ma le faapotopotoga o loo i lou fale:+
3 Tau ina ia iā te outou le agalelei faifua ma le filemu mai i le Atua lo tatou Tamā, ma le Alii o Iesu Keriso.+
4 Ou te faafetai pea i loʻu Atua pe a ou taʻua oe i aʻu tatalo,+
5 a o oʻu faalogo pea i lou alofa ma lou faatuatua i le Alii o Iesu ma le ʻaupaia uma;+
6 ina ia uunaʻia oe e faia mea lelei ona o lou faailoa atu o lou faatuatua,+ auā ua e iloa o le autasi ma Keriso ua tatou maua ai le tele o mea lelei.
7 Auā ua matuā tele loʻu olioli ma ua faamāfanafanaina aʻu ona o lou alofa,+ talu ai ua faafouina loto*+ o le ʻaupaia ona o oe loʻu uso.
8 O le mea lea, e ui ua ou matuā saʻoloto e tautala atu e tusa ma Keriso, ma poloaʻi+ atu iā te oe e fai le mea e tatau ona fai,
9 peitaʻi, o aʻu o Paulo, ua ou ʻaiʻoi atu ona o lou alofa,+ ua ou faapenei ona ua ou matua, ma ua avea ai nei aʻu o se pagota+ ona o Keriso Iesu;
10 ou te ʻaiʻoi atu foʻi iā te oe e faatatau i loʻu atalii+ o Onesemo,+ na avea aʻu e pei o sona tamā+ a o saisaitia aʻu,
11 sa lē aogā muamua o ia iā te oe, a o lenei ua aogā o ia iā te oe ma aʻu.+
12 O ia lenei ua ou toe faafoʻi atu iā te oe, o ia foʻi lea ua ou alofa faapelepele i ai.
13 Ua ou manaʻo e taofi o ia ma te nonofo e fai ma ou sui,+ ina ia auauna mai pea o ia iā te aʻu, a o oʻu onosaʻia noanoataga+ ona o le tala lelei.
14 Ae ou te lē fia faia se mea pe a e lē loto i ai, a ia e faia i lou lotomalie le mea lelei e aunoa ma le faatauanauina.+
15 Atonu o le mea lea na sola ese ai o ia mo sina taimi, ina ia e toe maua o ia e faavavau,
16 e lē toe avea o ia o se pologa+ ae e sili atu i le pologa,+ ua avea o se uso pele+ aemaise lava iā te aʻu, ae e sili atu lea iā te oe, e lē gata o se pologa, ae o se uso pele i le auaunaga a le Alii.
17 O lea la, afai o e manatu iā te aʻu o lau uō,+ ia e talia+ mai o ia ma le agalelei e pei ona e taliaina o aʻu.
18 Afai foʻi na ia faia se mea sesē iā te oe po o nofo aitalafu foʻi iā te oe, ia tuu mai iā te aʻu.
19 O aʻu o Paulo, ua ou tusi atu i loʻu lava lima:+ ou te toe totogi atu lava. Ou te lē tau fai atu ae o loo e nofo aitalafu iā te aʻu e oo i lou lava ola.
20 Ioe loʻu uso e, tau ina ia ou maua ni aogā mai iā te oe i le autasi ma le Alii: ia faafouina loʻu loto* i le autasi ma Keriso.
21 Ua ou tusi atu iā te oe, auā ou te talitonu o le a e gauaʻi mai, ma ou te iloa e sili atu mea e te faia i lo o mea ua ou fai atu ai.+
22 Ae e lē na o lenā, a ia sauni foʻi se mea ou te nofo ai,+ auā ua ou faamoemoe o a outou tatalo+ o le a tatalaina+ atu ai aʻu iā te outou.
23 O loo momoli atu alofaaga o Epafara+ iā te oe, o lē ua ma saisaitia faatasi i le autasi ma Keriso Iesu.
24 O loo alolofa atu foʻi Mareko, Aritako,+ Tema,+ Luka, o ē ua matou galulue faatasi.
25 Ia iai le agalelei faifua o le Alii o Iesu Keriso i le agaga ua outou faaalia.+
