Galuega 1:1-26
1 Teofilo e,+ na ou tusia le uluaʻi faamatalaga e uiga i mea uma na amata ona faia ma aʻoaʻo+ atu e Iesu,
2 seʻia oo i le aso na aveina aʻe ai o ia i le lagi,+ ina ua uma ona ia tuuina atu o poloaʻiga e ala i le agaga paia i aposetolo ua ia filifilia.+
3 Na ia faailoa atu foʻi iā i latou nei o ia ua toe soifua mai, e ala i le tele o faamaoniga maumaututū, ina ua mavae ona puapuaga.+ Na latou vaaia ai o ia i le faagasologa o aso e fā sefulu, ma na ia taʻu atu ai mea e uiga i le malo o le Atua.+
4 A o potopoto faatasi o ia ma i latou, na ia tuuina atu le faatonuga: “Ia aua neʻi outou ō ese mai i Ierusalema,+ a ia faatalitali ai pea i le mea na folafolaina+ mai e le Tamā, lea foʻi na outou faalogo i ai mai iā te aʻu.
5 Auā o le mea moni, na papatiso Ioane i le vai, ae i ni nai aso, ona papatisoina lea o outou i le agaga paia.”+
6 Ua latou potopoto faatasi ona latou fesili mai lea iā te ia: “Le Alii e, pe e te toe faavaeina le malo+ iā Isaraelu i le taimi nei?”
7 Ua faapea atu o ia iā i latou: “E lē tatau ona outou iloa taimi po o taimi atofaina+ ua tuu e le Tamā i lana lava pule.+
8 Ae e maua e outou le mana,+ pe a oo ifo iā te outou le agaga paia, ona fai lea o outou ma molimau+ iā te aʻu i Ierusalema,+ i Iutaia uma ma Samaria,+ ma tuluʻiga uma o le lalolagi.”+
9 Ua uma ona fetalai o ia i nei mea, ona aveina aʻe+ lea o ia a o latou vaavaai atu, ua ufitia foʻi o ia e se ao mai i la latou vaai.+
10 A o vaavaai atu i latou i le lagi i lona afio aʻe,+ faauta! o loo tutū faatasi ma i latou ni tamāloloa se toʻalua o loo oofu i ofu papaʻe,+
11 ma ua la faapea mai: “Tagata o Kalilaia e, aiseā ua outou tutū ai ma vaavaai aʻe i le lagi? O Iesu lenā ua aveina aʻe i le lagi mai iā te outou. O le a toe maliu mai o ia, i le auala lava lea+ e pei ona outou vaavaai atu i ai i lona afio aʻe i le lagi.”
12 Ona latou toe foʻi+ lea i Ierusalema mai i le mauga e taʻua o le Mauga o Olive, lea e latalata ane i Ierusalema, e tusa le mamao ma le savaliga*+ e taga i le aso sapati.
13 O lea, ina ua latou taunuu, ona ō atu lea i le potu i luga,+ i le mea ua latou nonofo ai, o Peteru ma Ioane, o Iakopo ma Aneterea, o Filipo ma Toma, o Patolomaio ma Mataio, o Iakopo le atalii o Alefaio, ma Simona le tagata maelega, ma Iuta le atalii o Iakopo.+
14 Ua lotogatasi i latou ma finafinau i le tatalo,+ faatasi ma nisi fafine,+ atoa ma Maria le tinā o Iesu ma ona uso.+
15 I ia aso, ua faapotopoto ai le motu o tagata e tusa ma le toʻaselau lua sefulu, ona tulaʻi lea o Peteru i luma o le ʻauuso, ma faapea atu:
16 “Le ʻauuso e, e tatau ona taunuu+ tusitusiga paia, lea na muaʻi taʻua e le agaga paia+ e ala mai i le fofoga o Tavita e uiga iā Iuta,+ o lē na taʻitaʻia i latou na puʻeina Iesu,+
17 auā na faitaulia o ia faatasi ma i tatou,+ na fai foʻi lona sao i lenei faiva.+
18 (Na faatauina+ e lenei tagata se fanua i le tau o le amiolētonu,+ na titō+ i lalo ma pā ai lona manava ma sau ai i fafo lona gaʻau.
19 Na logo atu foʻi lenei tala i tagata uma na nonofo i Ierusalema, o le mea lea, na taʻua ai lenā fanua i la latou gagana, o Akeletama, o lona uiga o le Fanua o le Toto.)
20 Auā ua tusia i le tusi o Salamo, ‘Ia faatafunaina le mea e nofo ai o ia, ma ia aua neʻi toe nofo ai se tasi,’+ ma ‘Ia ave e se tasi lona tofi o se ovasia.’+
21 O le mea lea, e tatau ai i tagata na faapotopoto faatasi ma i tatou i le taimi atoa na femaliuaʻi ai le Alii o Iesu iā i tatou,+
22 e amata mai i le papatisoina o ia e Ioane+ seʻia oo i le aso na aveina aʻe ai o ia,+ e tatau ona avea se tasi o nei tagata o sē na vaaitino faatasi ma i tatou i lona toetū.”+
23 Ona latou tofia lea o ni tagata se toʻalua, o Iosefa ua igoa iā Pasapa, o lona faaiʻu o Iuso, ma Matatia.
24 Ua latou tatalo e faapea: “Ieova e, o oe o lē e silafia loto o tagata uma,+ ia e faailoa mai po o ai o i laʻua nei ua e filifilia,
25 ina ia faia lenei faiva ma le tofiga faaaposetolo,+ lea na lafoaʻi e Iuta, ae alu i lona lava ala.”
26 Ona faia lea o le vili,+ ma ua faasaga le vili iā Matatia; o le mea lea ua taʻua ai o ia o se aposetolo faatasi ma le toʻasefulu tasi.+
Faamatalaga Pito i Lalo
^ O lenei malaga e tusa ma le 2,000 kupita (890 mita; 2,920 futu).
