Galuega 10:1-48
10 Ua i Kaisareia le tasi tagata e igoa iā Konelio, o se taʻitaʻiʻau+ o le ʻautau+ a Italia e pei ona taʻua ai.
2 O ia o se tagata amioatua,+ ma e matataʻu+ o ia ma lona aiga atoa i le Atua. E masani ona ia avatu le tele o meaalofa i tagata,+ ma tatalo atu e lē aunoa+ i le Atua.
3 Pe e tusa o le itula e iva*+ o lenā aso, ua ia vaaia ai i se faaaliga+ le agelu+ a le Atua, ua sau iā te ia ma faapea mai: “Konelio e!”
4 Ua ia pulatoʻa atu iā te ia ona fefe ai lea ma faapea atu: “O le ā ea le Alii e?” Ua ia fai mai iā te ia: “Ua oo atu au tatalo+ ma au meaalofa e fai ma faamanatuga i luma o le Atua.+
5 O lea, ia e aauina atu nei ni tagata i Iopa, ma aami i le tasi tagata e igoa iā Simona o lē ua igoa foʻi iā Peteru.
6 O loo talimālō le tasi Simona, o lē e saunia paʻu o manu, i lenei tagata, ma o lona fale e latalata i le sami.”+
7 Ina ua alu ese le agelu na la talanoa, ona ia valaau atu lea i ana auauna e toʻalua ma se fitafita e amioatua mai iā i latou e tautua e lē aunoa iā te ia,+
8 ma faamatala atu mea uma iā i latou ma aauina atu i latou i Iopa.+
9 I le aso na sosoo ai, a o faimalaga pea i latou, ma ua latalata atu i le aai, a ua alu aʻe Peteru i luga o le fale+ pe tusa o le itula e ono* e tatalo+ ai.
10 Ua matelāina o ia i le fia ʻai. A o latou sauniunia meaʻai, ona ia vaaia ai lea o se faaaliga.+
11 Ua vaaia e ia le lagi ua matala,+ ma ua tuutuu ifo ai se mea e pei o se ʻie lino telē i ona pito e fā i le lalolagi;
12 ma ua iai i totonu o lenei mea ituaiga eseese o manu vaefā, ma mea fetolofi i le lalolagi, ma manufelelei o le lagi.+
13 Ua faapea mai se leo iā te ia: “Peteru e, tū ia i luga, inā fasi ma ʻai!”+
14 Ua faapea atu Peteru: “E leai, le Alii e, auā ou te leʻi ʻai lava i se mea ua leaga ma lē mamā.”+
15 Ua toe fetalai mai le leo iā te ia: “Aua e te toe taʻua e leaga+ mea ua faamamāina e le Atua.”
16 Ua faatolu ona faalogoina lea leo, ona ave aʻe loa lea o le mea e pei o se ʻie i le lagi.+
17 A o matuā popole le loto o Peteru i le uiga o le faaaliga na ia vaaia, faauta, o loo tutū mai i le faitotoʻa o le pā+ tamāloloa na aauina mai e Konelio e saʻili i le fale o Simona.
18 Ua latou fesili atu po o api i inā Simona, o lē ua igoa foʻi iā Peteru.
19 A o mafaufau Peteru i le uiga o le faaaliga, ua faapea mai le agaga:+ “Faauta! e toʻatolu ni tamāloloa o loo saʻili iā te oe.
20 O lea, ia e tulaʻi ma alu ifo i lalo ma ō ma i latou, aua e te masalosalo auā ua ou aauina atu i latou.”+
21 Ona alu ifo lea o Peteru i tamāloloa ma faapea atu: “Faauta, o aʻu lenei o loo outou saʻilia. O le ā le mea ua outou ō mai ai?”
22 Ua latou faapea mai: “Ua tuuina mai iā Konelio o se taʻitaʻiʻau, o se tagata amiotonu ma e mataʻu i le Atua,+ e taʻuleleia+ foʻi i le nuu atoa o Iutaia, se faatonuga mai i le Atua e ala i se agelu paia, ina ia aami mai oe e te alu atu i lona fale ma faalogo i mea e te fai atu ai.”
23 Ona ia valaaulia lea o i latou i totonu ma talimālō iā i latou.
Ua tulaʻi o ia i le aso e sosoo ai, ua ō ma i latou. Ua ō faatasi foʻi ma ia nisi o le ʻauuso mai i Iopa.
24 Ona taunuu lea i le aso e sosoo ai i Kaisareia. O loo faatalitalia i latou e Konelio, ma ua faapotopoto faatasi lona ʻauaiga ma ana uō mamae.
25 A o ulufale atu Peteru, ona faafeiloaʻi lea o ia e Konelio, ua faapaʻū i ona vae ma ifo atu iā te ia.
26 A ua faatū o ia i luga e Peteru ma faapea atu: “Tū ia i luga, o aʻu foʻi o se tagata.”+
27 A o la talanoa, ua alu atu o ia i totonu ma iloa ai le toʻatele o tagata o loo faapotopoto ai,
28 ua fai atu o ia iā i latou: “Ua outou iloa lelei e sā i le tulafono, ona faatasi atu pe talanoa se Iutaia i se tagata o se isi atunuu.+ Ae ui i lea, ua faailoa mai e le Atua iā te aʻu, e lē tatau ona ou taʻua se tasi e leaga pe e lē mamā.+
29 O lea ua ou sau ai ma loʻu lotomalie, ina ua aami atu aʻu. O le mea lea, ou te fesili atu ai po o le ā le mea ua outou aami atu ai aʻu.”
30 Ona faapea mai lea o Konelio: “E tusa ma le fā aso ua mavae, i lenei lava itula, o le itula lea e iva,*+ na ou tatalo ai i loʻu fale, faauta foʻi, na tū mai i oʻu luma se tagata o loo ofu i ofu pupula.+
31 Na faapea mai: ‘Konelio e, ua faafofogaina lau tatalo ma ua manatua e le Atua+ au meaalofa.
32 O lea, ia aauina atu nisi i Iopa ma aami iā Simona, o lē ua igoa foʻi iā Peteru.+ O loo talimālō ai Simona, o lē e saunia paʻu o manu, i lenei tagata, ma o lona fale e latalata i le sami.’+
33 O le mea lea, ua ou aami vave atu ai iā te oe, ma ua lelei ua e sau i inei. I le taimi nei, ua matou iai uma i inei i luma o le Atua, ina ia faalogologo i mea uma na poloaʻi atu ai Ieova iā te oe e te fai mai ai.”+
34 Ona faapea atu lea o Peteru: “E moni ua ou iloa, e lē faailogaina tagata+ e le Atua,
35 ae o lē e mataʻu iā te ia i nuu uma lava, ma fai le amiotonu, e talia e ia.+
36 Ua ia auina atu le upu+ i le fanauga a Isaraelu, ina ia faailoa atu iā i latou le tala lelei o le filemu+ e ala iā Iesu Keriso: o Ia lenei o le Alii o tagata uma.+
37 Ua outou iloa le mataupu na talanoaina i Iutaia atoa e amata mai i Kalilaia, ina ua uma le papatisoga na talaʻi+ e Ioane
38 e faapea, na faauuina e le Atua Iesu mai i Nasareta, i le agaga paia+ ma le mana. Na ia maliu atu i le nuu ma faia galuega lelei, ma faamālōlōina i latou uma sa mafatia ona o le Tiapolo;+ auā sa faatasi le Atua ma ia.+
39 O molimau foʻi i matou i mea uma na ia faia i le nuu o Iutaia ma Ierusalema, ae na latou fasiotia o ia i le faatautauina i le laau.+
40 O Ia lenei na toe faatūina e le Atua i le aso lona tolu, ma mafai ai ona faailoa+ atu o ia,
41 e lē i tagata uma, a o molimau o ē na tofia muamua e le Atua,+ o i matou nei o ē na aai ma feinu faatasi ma ia,+ ina ua mavae lona toetū mai i le oti.
42 Na ia faatonuina foʻi i matou e talaʻi+ atu i tagata ma molimau māeʻaeʻa e faapea, o Ia lenei ua tofia e le Atua e fai ma faamasino o ē ola ma ē oti.+
43 O ia ua molimau+ i ai perofeta uma e faapea, o i latou uma e faatuatua iā te ia, e faamagaloina a latou agasala e ala i lona suafa.”+
44 A o talanoa atu Peteru e uiga i nei mea, ona liligi ifo lea o le agaga paia iā i latou uma o loo faalogologo i le upu.+
45 Ona matuā taufaiofo ai lea o ē e faamaoni ua peritomeina, o ē na ō mai faatasi ma Peteru, auā ua liligi ifo foʻi le meaalofa foaʻifua o le agaga paia i tagata o nuu ese.+
46 Ua latou faalogo foʻi ua latou tautatala i gagana eseese ma vivii ai i le Atua.+ Ona faapea atu lea o Peteru:
47 “Pe e mafai e se tasi ona taofia i latou nei o ē ua maua le agaga paia e pei o i tatou, mai i le papatisoina+ i le vai?”
48 Ona ia faatonuina loa lea ina ia papatisoina i latou i le suafa o Iesu Keriso.+ Ua latou talosaga atu iā te ia ina ia latou nonofo mo ni nai aso.
Faamatalaga Pito i Lalo
^ Pe tusa o le tā o le 3 i le aoauli e amata mai i le oso aʻe o le lā.
^ Pe tusa o le tā o le 12 i le aoauli e amata mai i le oso aʻe o le lā.
^ Pe tusa o le tā o le 3 i le aoauli e amata mai i le oso aʻe o le lā.
