Galuega 11:1-30
11 Ua faalogo aposetolo ma le ʻauuso o loo i Iutaia, ua talia e tagata o nuu ese+ le afioga a le Atua.
2 Ina ua sau Peteru i Ierusalema, ona finau atu lea iā te ia o ē talitonu i le peritome,+
3 ua latou faapea atu, ua alu o ia i le fale o tagata e leʻi peritomeina ma aai faatasi ma i latou.
4 Ona faamatala auʻiliʻili atu lea e Peteru iā i latou o mea e uiga i lenei mataupu e faapea:
5 “Sa ou tatalo a o oʻu i le aai o Iopa, ma na ou vaaia ai se faaaliga o le mea e pei o se ʻie lino telē ua tuutuu ifo mai i le lagi i ona pito e fā, ma ua oo mai lava iā te aʻu.
6 Na ou pulatoʻa i ai ma mātauina ma iloa ai ni manu vaefā o le lalolagi, o manufeʻai, o mea fetolofi ma manufelelei o le lagi.+
7 Na ou faalogo foʻi i se leo o faapea mai iā te aʻu, ‘Peteru e, tū ia i luga, inā fasi ma ʻai!’+
8 Ae na ou faapea atu: ‘E leai le Alii e, auā ou te leʻi ʻai lava i se mea ua leaga ma lē mamā.’+
9 Ua toe tali faalua mai le leo mai i le lagi, ‘Aua e te toe taʻua e leaga mea ua faamamāina+ e le Atua.’
10 Na faatolu ona faalogoina lea leo, ona toe sisi aʻe loa lea o mea uma i le lagi.+
11 Faauta, o le taimi lenā na tutū mai ai i le fale na matou iai ni tagata se toʻatolu, o ē na aauina mai i Kaisareia iā te aʻu.+
12 Ona faatonuina lea o aʻu e le agaga+ e ō ma i latou e aunoa ma se masalosalo. Na matou ō faatasi foʻi ma nei uso e toʻaono, ma matou ulufale atu i le fale o le tamāloa.+
13 “Na ia faamatala mai iā i matou lona vaaia o le agelu o tū i lona fale ma faapea mai, ‘Ia aauina atu ni tagata i Iopa ma aami iā Simona, o lē ua igoa foʻi iā Peteru,+
14 ma e na te faailoa atu iā te oe ni faamatalaga e faaolaina+ ai oe ma lou aiga.’
15 Ina ua amata ona ou tautala atu, ae oo ifo loa i o latou luga le agaga paia, e pei foʻi ona oo ifo iā i tatou i le amataga.+
16 O le mea lea na ou manatua ai le fetalaiga a le Alii, e masani ona faapea mai, ‘Na papatiso Ioane i le vai,+ ae e papatisoina outou i le agaga paia.’+
17 O le mea lea, afai ua foaʻi mai e le Atua iā i latou le meaalofa foaʻifua lava lea e pei foʻi ona ia faia iā i tatou, o ē ua talitonu i le Alii o Iesu Keriso,+ o ai la aʻu ou te faalavelave ai i le Atua?”+
18 Ina ua latou faalogo i nei mea, ona lotomalilie+ uma lea i ai, ma ua latou faamamaluina le Atua+ e faapea: “Ua tuuina atu e le Atua le avanoa i tagata o nuu ese e salamō ai, ina ia maua ai foʻi e i latou le ola.”+
19 Mulimuli ane, ona ō ai lea o i latou o ē na faataapeapeina+ ona o sauāga na tutupu ina ua oti Setefano, ua oo atu i Foinie,+ i Kuperu+ ma Anetioka, ae e leʻi faailoaina atu le upu i se tasi, seʻi vaganā ai tagata Iutaia.+
20 Ae peitaʻi, na ō mai i Anetioka nisi tagata mai i Kuperu ma Kurene, ma talanoa atu i tagata e tautatala i le gagana Eleni,+ ma folafola atu le tala lelei e uiga i le Alii o Iesu.+
21 Sa iai foʻi le aao o Ieova+ iā i latou, ma e toʻatele na talitonu ma liliu atu i le Alii.+
22 Na oo atu le tala e uiga iā i latou i le faapotopotoga i Ierusalema, ona latou auina atu lea o Panapa+ e oo atu lava i Anetioka.
23 Ina ua taunuu atu, ona ia vaaia ai lea o le agalelei faifua+ o le Atua, lea na olioli+ ai o ia ma faalaeiau atu iā i latou uma ina ia tumau pea i le Alii ma le lotofaamaoni;+
24 auā o ia o se tagata lelei ma ua tumu i le agaga paia ma le faatuatua. Ua talitonu foʻi le toʻatele o tagata i le Alii.+
25 Ona alu ai lea o ia i Taso+ e matuā saʻili iā Saulo+
26 ma ina ua maua o ia, ona ia aumaia lea o ia i Anetioka. Pe e tusa ma le tausaga atoa na la faatasi ai ma le faapotopotoga, ma aʻoaʻo atu le motu o tagata. O Anetioka na faatoʻā taʻua ai soo o Kerisiano,+ ona o le taʻitaʻiga a le Atua.
27 I ia aso na ō mai ai perofeta+ mai i Ierusalema i Anetioka.
28 Ona tulaʻi lea o se tasi o i latou e igoa iā Akapo,+ ma faailoa atu e ala i le agaga, se oge tele o le a oo mai i le lalolagi uma.+ O le mea moni, na tupu lenā mea i le taimi o Kalaotio.
29 Ona filifili ai lea o le ʻausoo e aauina atu se fesoasoani+ i uso o loo nonofo i Iutaia, e tusa ma le mea ua mafai+ e le tagata;
30 ua latou faia faapea, ma aauina atu lenā fesoasoani i toeaina e ala iā Panapa ma Saulo.+
