Galuega 15:1-41
15 Ua ō ifo nisi tagata mai i Iutaia+ ma aʻoaʻo atu i le ʻauuso e faapea: “Afai e lē peritomeina+ outou e tusa ai ma le tū a Mose,+ e lē mafai ona faaolaina outou.”
2 Peitaʻi, ina ua fevaevaeaʻi i latou ma fefinauaʻi ma Paulo ma Panapa, ona latou fuafua lea ina ia ō Paulo, Panapa, ma nisi o i latou i le ʻauaposetolo ma toeaina i Ierusalema+ e faatatau i lenei finauga.
3 Ua momoli* i latou e le faapotopotoga,+ ona faaauau ai lea ona ō o nei tane e ui atu i Foinie ma Samaria. Ua faamatala auʻiliʻili atu foʻi le faaliliuina o tagata o nuu ese,+ ma ua la faatupu ai le olioli tele i le ʻauuso uma.+
4 Ina ua taunuu atu i Ierusalema, ua talia fiafia+ i latou e le faapotopotoga ma aposetolo ma toeaina, ona la faamatala atu lea o le tele o mea ua faia e le Atua e ala iā i laʻua.+
5 Peitaʻi, o nisi mai i le lotu a le ʻau Faresaio o ē ua talitonu, ua tutū i latou i luga ma faapea atu: “E tatau ona peritomeina i latou+ ma faatonuina e tausia le tulafono a Mose.”+
6 Ona faapotopoto lea o aposetolo ma toeaina ina ia talanoaina lenei mataupu.+
7 Ua tele le fefinauaʻi,+ ona tulaʻi ai lea o Peteru ma faapea atu iā i latou: “Le ʻauuso e, ua outou iloa lelei, i le taimi ua teʻa, na filifilia ai aʻu e le Atua mai iā te outou, ina ia faalogo tagata o nuu ese i le upu o le tala lelei mai i loʻu gutu, ma talitonu ai.+
8 O le Atua foʻi, o lē e silafia loto o tagata,+ na molimau o ia e ala i le tuuina atu o le agaga paia+ iā i latou, e pei foʻi ona ia faia iā i tatou.
9 E na te leʻi faaeseeseina foʻi i tatou ma i latou,+ i lona faamamāina o o latou loto i le faatuatua.+
10 O lenei, aiseā ua outou tofotofo ai i le Atua, i le faaee atu i le ʻausoo o le avega+ e leʻi mafaia e o tatou augātamā, po o i tatou foʻi ona tauaveina?+
11 Peitaʻi ane, ua tatou talitonu e faaolaina i tatou ona o le agalelei faifua+ o le Alii o Iesu, e faapea foʻi tagata na.”+
12 Ona lē toe tautatala lea o le motu o tagata, ma ua latou faalogologo mai iā Panapa ma Paulo, a o la faamatala atu le tele o faailoga ma mea ofoofogia na faia e le Atua i nuu ese+ e ala iā i laʻua.
13 Ina ua uma atu a la upu, ona tali mai lea o Iakopo e faapea: “Le ʻauuso e, ia faalogo mai iā te aʻu.+
14 Ua uma ona faamatala auʻiliʻili atu e Simeona*+ e faapea, o le uluaʻi taimi lea ua silasila ai le Atua i nuu ese, ina ia filifilia mai ai ni tagata mo lona suafa.+
15 Ua tusa lenei mea ma upu a le ʻau Perofeta e pei ona tusia,
16 ‘Pe a mavae nei mea, ou te toe sau ma toe fausia le faleʻie o Tavita ua paʻū; ou te toe atiaʻe foʻi mea ua lepetia ma toe faatūina,+
17 ina ia mafai ai e ē ua totoe o nei tagata, ona matuā saʻili iā Ieova faatasi ai ma tagata o atunuu uma, o tagata ua valaauina i loʻu igoa, ua fetalai mai ai Ieova, o lē ua faia nei mea+
18 na iloa mai i aso anamuā.’+
19 O lea la, o laʻu filifiliga, ia aua neʻi faapopoleina ai tagata o nuu ese, o ē ua liliu atu i le Atua,+
20 ae ia tusi atu iā i latou ina ia taumamao mai i mea ua leaga ona o le ifo i tupua,+ ma le faitaaga,*+ ma mea ua titina,+ ma le toto.+
21 E iai i latou na talaʻi mai i lea aai i lea aai e faatatau iā Mose talu mai aso ua mavae, auā ua faitauina i sunako i sapati uma o mea na ia tusia.”+
22 Ona lotomalilie lea o le ʻauaposetolo, ma toeaina faapea le faapotopotoga atoa, e filifili ma aauina atu i Anetioka faatasi ma Paulo ma Panapa ni o latou tagata, o Iuta o lē ua igoa iā Pasapa+ ma Sila, o ē e taʻimua i le ʻauuso;
23 ma ua latou tusi e faapea:
“O loo alolofa atu le ʻauaposetolo ma toeaina i le ʻauuso i Anetioka,+ ma Suria, ma Kilikia+ o ē e ō mai i nuu ese.
24 Talu ai ua matou faalogo ua iai nisi o i matou ua faapopoleina outou i a latou upu,+ ua taumafai e faaliliuese outou, e ui lava matou te leʻi faatonuina i latou.+
25 Ua matou matuā lotomalilie+ e filifilia ni tane e aauina atu iā te outou faatasi ma o matou uso pele o Panapa ma Paulo,+
26 o tane ua tuuina atu o laʻua ola, ona o le suafa o lo tatou Alii o Iesu Keriso.+
27 Ua matou aauina atu foʻi Iuta ma Sila,+ ina ia la faamatala atu nei lava mea.+
28 Auā ua tonu i le agaga paia+ ma i matou nei, ia lē faaopoopo atu nisi avega+ iā te outou, ae e na o nei mea e tatau,
29 ia faaauau ona taumamao mai i mea ua faataulaga mo tupua,+ ma le toto,+ ma mea ua titina,+ ma le faitaaga.+ Afai tou te matuā taumamao mai i nei mea,+ ona lelei ai lea o outou. Ia outou manuia!”
30 Ina ua tuuina atu nei tagata e ō, ona latou ō ifo lea i Anetioka ma latou faapotopoto faatasi le motu o tagata e toʻatele, ma tuu atu le tusi+ iā i latou.
31 Ina ua uma ona faitau i le tusi, ona latou olioli lea i faalaeiauga+ ua maua mai ai.
32 Ona o Iuta ma Sila o ni perofeta,+ ua la faalaeiau i le ʻauuso i le tele o lauga ma faamalosia i latou.+
33 Ua mavae sina taimi, ona tuu atu lea o i laʻua e le ʻauuso e ō ma le filemu+ i ē na aauina mai i laʻua.
34 * ——
35 Ae peitaʻi, ua nonofo ai pea Paulo ma Panapa i Anetioka,+ ua aʻoaʻo ma folafola atu le tala lelei o le afioga a Ieova,+ faatasi ai foʻi ma isi e toʻatele.
36 Ua mavae ni aso, ona faapea atu lea o Paulo iā Panapa: “Seʻi o ta toe foʻi e asiasi i uso i aai uma na ta talaʻia ai le afioga a Ieova, e vaai po o ā mai i latou.”+
37 Ua manaʻo foʻi Panapa e ave ma Ioane, o lē ua igoa iā Mareko.+
38 Peitaʻi, ua manatu Paulo e lē tatau ona ave o ia, auā na ia tuua i laʻua i Pafulia,+ ma e leʻi ō ma i laʻua i le galuega.
39 Ua matuā feita i laʻua ma fefinauaʻi, ona la ō eseese ai lea; ua alu Panapa+ ma ave Mareko ma folau atu i Kuperu.+
40 A ua filifilia e Paulo ia Sila,+ ma ina ua uma ona tuuina atu o ia e le ʻauuso i le agalelei faifua o Ieova,+ ona alu ai lea o ia.
41 Ona alu atu lea o ia i Suria ma Kilikia, ua faamalosiau i faapotopotoga.+
Faamatalaga Pito i Lalo
^ I le gagana Eleni, “ua momoli i latou e le faapotopotoga i se vaega o le auala.”
^ O le igoa Eperu o Simona.
^ Tagaʻi i le Faaopoopoga e 8.
^ O lenei fuaiupu o loo maua i nisi faaliliuga o le Tusi Paia, peitaʻi e lē o maua i isi manusikulipi Eleni anamua.
