Galuega 17:1-34
17 Ua malaga atu i laʻua e ui atu i Amefipoli ma Apolonia, ma taunuu atu ai i Tesalonia,+ o i inā e iai le sunako o tagata Iutaia.
2 Ua ulufale atu Paulo e tusa ai ma lana masani,+ ma e tolu foʻi sapati o fetufaaʻi o ia ma i latou i Tusitusiga Paia,+
3 ua ia faamatala atu ma faamaonia e ala i mea ua tusia, e tatau ona tigāina+ o le Keriso ma toe faatūina mai i le oti,+ ma faapea atu: “O le Keriso lenei,+ o Iesu, o lē ua ou faailoa atu iā te outou.”
4 Ona talitonu+ ai lea o nisi o i latou ma aufaatasi atu iā Paulo ma Sila,+ atoa foʻi ma le toʻatele o tagata Eleni o ē tapuaʻi i le Atua, faapea foʻi ma le toʻatele o tamaʻitaʻi tāua.
5 Peitaʻi ane, ua lotoleaga+ tagata Iutaia, ma latou aamia ni tagata amioleaga o ē e tafafaovale i le maketi, ua faapotopoto mai iā i latou ma ua faavevesi+ ai le aai. Ona latou osofaʻia lea o le fale o Iasona,+ ma taumafai e aumai i laʻua i tagata faatupu vevesi.
6 Ina ua lē maua i laʻua, ona fetoso lea e nei tagata ia Iasona ma nisi o le ʻauuso i alii pule o le nuu, ma alalaga atu: “O lea ua tatou faatasi ma tagata faatupu vevesi+ i le lalolagi atoa,
7 ma ua talia ma le agalelei i latou e Iasona. Ua tetee atu foʻi nei tagata uma i poloaʻiga+ a Kaisara ma faapea atu, ua iai se isi tupu,+ o Iesu lea.”
8 Ua latou matuā faavevesi le motu o tagata ma alii pule o le nuu, ina ua latou faalogo i nei mea;
9 ma ina ua lava le tupe na totogi e Iasona ma isi e tatala ai i latou, ona tuu atu lea o i latou e ō.
10 Ina ua pō,+ ona aauina atu loa lea e le ʻauuso o Paulo ma Sila i Perea, ma ina ua taunuu, ona ō atu ai lea o i laʻua i le sunako o tagata Iutaia.
11 Ua sili atu ona naunau na tagata e suʻesuʻe* nai lo i latou o i Tesalonia, auā ua latou taliaina le upu ma le fiafia tele, ua latou matuā iloiloina+ Tusitusiga Paia+ i aso taʻitasi pe e moni nei mea.+
12 Ona talitonu ai lea o le toʻatele o i latou, faapea foʻi le toʻatele o fafine ma tamāloloa aloaʻia+ o Eleni.
13 Ae ina ua iloa e tagata Iutaia mai i Tesalonia ua folafola atu e Paulo le afioga a le Atua i Perea, ona latou ō mai foʻi lea ua faaoso+ ma faaita+ le motu o tagata.
14 Ona auina atu loa lea e uso ia Paulo ina ia alu atu i tai,+ ae ua nonofo ai pea Sila ma Timoteo.
15 Ae peitaʻi, o ē ua momolia Paulo, ua latou ave iā te ia e oo i Atenai, ona ia poloaʻi atu lea iā i latou, ina ia ō mai vave Sila ma Timoteo+ iā te ia, ona latou ō ai lea.
16 A o faatalitali Paulo mo i laʻua i Atenai, ua lē fiafia o ia*+ i le vaai atu i le aai ua tumu i tupua.
17 Ona ia fetufaaʻi lea ma tagata Iutaia+ i le sunako, ma isi tagata o ē e tapuaʻi i le Atua, ma i latou uma e feiloaʻi i ai i aso uma i le maketi.+
18 A ua ō mai nisi o le ʻaufaifilosofia+ a le ʻau Epikuro ma le ʻau Setoiko, ua finau mai iā te ia, ma ua faapea mai nisi: “O le ā le mea ua manaʻo i ai lenei tagata tautala soo* e taʻu mai?”+ A ua faapea mai isi: “E aliali mai o loo ia folafolaina mai ni atua ese.” Ona talu ai ua ia folafola mai le tala lelei iā Iesu ma le toetū.+
19 Ona latou puʻe lea o ia ma avatu i Areopako* ma faapea mai: “Pe e mafai ona e faamatala mai iā i matou lenei aʻoaʻoga fou+ ua e aʻoaʻo mai?
20 Auā ua e aʻoaʻoina mai mea e ese i la matou faalogo. Matou te fia iloa la, po o ā uiga o nei mea.”+
21 O le mea moni, ua faaalu vale e tagata Atenai ma tagata ese o loo aumau i inā, lo latou taimi e faamatala ai se mea, pe faalogologo foʻi i se mea fou.
22 Ona tū lea o Paulo i le ogatotonu o Areopako+ ma faapea atu:
“Tagata Atenai e, ua ou iloa i mea uma lava, ua sili atu lo outou matataʻu i atua+ nai lo o isi tagata.
23 Auā a o oʻu savali ane ma vaavaai totoʻa i mea o loo outou tapuaʻi i ai, ua ou iloa ai se fata faitaulaga ua tusia ai ‘Mo le Atua e Lē Iloa.’ O lenei, o ia ua outou tapuaʻi i ai ma le lē iloa, ou te faailoa atu nei iā te outou.
24 O le Atua o lē na faia le lalolagi ma mea uma ua iai, o Ia lea o le Alii o le lagi ma le lalolagi,+ e lē afio o ia i malumalu e faia e lima,+
25 e lē o lima foʻi o tagata e auauna ai iā te ia e peiseaʻī ua mativa o ia i se mea,+ auā ua ia foaʻi mai lava i tagata uma le ola,+ ma le mānava,+ ma mea uma lava.
26 Na ia faia foʻi nuu uma mai i le tagata e toʻatasi,+ ina ia nonofo i le fogāeleele+ uma o le lalolagi,+ ma ua ia tofia taimi atofaina+ ma tuaoi o mea ua latou nonofo ai,+
27 ina ia latou saʻili i le Atua,+ pe mafai ona latou tautagotago iā te ia ma maua o ia,+ ae peitaʻi e lē o mamao o ia mai iā i tatou taʻitoʻatasi.
28 Auā o ia ua tatou ola ai, gaoioi ai, ma ua tatou iai+ foʻi ona o ia, e pei ona taʻua e ni tagata fatusolo+ o loo iā te outou e faapea, ‘Auā o i tatou foʻi o lana fanau.’
29 “Ona o i tatou o fanau a le Atua,+ e lē tatau ai ona tatou manatu ua tusa le Atua+ i se auro, po o se siliva, po o se maa, po o se mea foʻi ua faia i le poto ma le atamai o le tagata.+
30 E moni, sa faapalepale le Atua i lo latou valea,+ a o le taimi nei, ua ia faatonuina tagata uma lava ina ia salamō.+
31 Auā ua ia tofia le aso e faamasinoina+ ai le lalolagi uma i le amiotonu, e le tagata ua ia tofia, ua ia saunia foʻi se faamaoniga mo tagata uma, ona ua ia toe faatūina+ o ia mai i le oti.”
32 Ina ua latou faalogo i le toetū mai i le oti, ona aamu+ lea o isi, a ua faapea mai isi: “Matou te toe faalogo atu iā te oe i lenei mea i se isi taimi.”
33 Ona alu ese ai lea o Paulo mai iā i latou,
34 a ua faatasi atu ni tane iā te ia ma ua talitonu ai, e aofia ai Taionusio, o se alii faamasino o le faamasinoga a Areopako,+ ma se fafine e igoa iā Tamari, atoa foʻi ma isi tagata.
Faamatalaga Pito i Lalo
^ I le gagana Eleni, “Ua sili atu ona mafaufau faatamālii na tagata.”
^ I le gagana Eleni, “ua lē fiafia lona agaga.”
^ I le gagana Eleni “o lē e aoaoina fatu”
^ O se nofoaga na tū i le aʻega i Atenai anamua, lea na tauaofia ai le Faamasinoga Sili.
