Galuega 19:1-41
19 I le faagasologa o aso, a o iai Apolo+ i Korinito, ua malaga atu ai Paulo i uta ma alu ifo i Efeso,+ ona maua ai lea e ia o ni soo;
2 ma ua ia fai atu iā i latou: “Pe na outou maua le agaga paia,+ ina ua outou talitonu?” Ua latou tali mai iā te ia: “Matou te leʻi faalogo lava pe faapefea ona maua le agaga paia.”+
3 Ona ia fai atu lea: “O le papatisoga a ai na papatisoina ai outou?” Ua latou fai mai: “O le papatisoga a Ioane.”+
4 Ua fai atu Paulo: “Na papatiso Ioane i le papatisoga lea e fai ma faailoga o le salamō,+ ma ia taʻu atu i tagata ina ia talitonu i lē o loo mulimuli mai,+ o Iesu lea.”
5 Ina ua faalogo i lenei mea, ona papatisoina lea o i latou i le suafa o le Alii o Iesu.+
6 Ua faaee atu lima+ o Paulo iā i latou, ona alu ifo lea o le agaga paia i o latou luga, ma latou tautatala ai i gagana eseese ma fai valoaga.+
7 O le aofaʻi o i latou, e tusa ma le toʻasefulu lua tane.
8 Ua ulu atu o ia i le sunako,+ ma tautala atu ma le lototele mo le tolu masina. Ua lauga atu o ia ma le maumauaʻi e faatatau i le malo+ o le Atua.
9 Ae ina ua lotomaaa pea nisi ma lē talitonu,+ ma fai upuleaga i Le Ala+ i luma o tagata, ona tuumuli lea o ia mai iā i latou,+ ma aveese le ʻausoo,+ ua lauga atu foʻi o ia i aso uma i le faleaʻoga o Turano.
10 Na faia lenei mea mo tausaga e lua,+ ma ua faalogo i le upu a le Alii, o tagata uma o i le itumalo o Asia,+ o tagata Iutaia atoa foʻi ma Eleni.
11 Ua faia pea e le Atua galuega mamana i lima o Paulo,+
12 e oo lava i fasiʻie ma ofu* mai i lona tino, e ave i tagata mamaʻi,+ ona teʻa ese ai lea o latou maʻi, ma ō ese mai ai agaga leaga.+
13 A o nisi tagata o Iutaia o loo feoaʻi, o ē e tutulia temoni,+ ua latou taumafai foʻi e faaaogā le suafa o le Alii o Iesu+ i ē ua iai na agaga leaga, i le faapea atu: “Ou te matuā fai atu+ iā te outou, i le suafa o Iesu, lea o loo talaʻia e Paulo.”
14 Ua faia foʻi lenei mea e atalii e toʻafitu o Seva, o se faitaulaga sili, o ia foʻi o se Iutaia.
15 A ua tali mai le agaga leaga iā i latou: “Ou te iloa Iesu,+ ma ou te masani foʻi iā Paulo;+ a o ai la outou?”
16 Ona oso mai ai lea iā i latou+ o le tagata ua iai le agaga leaga, ma manumalo ai iā i latou uma, ma ua latou toʻilalo ai, ona sosola ese lea o i latou mai i le fale, ua lē lavalavā ma ua manunuʻa.
17 Ua iloa e tagata uma lenei mea, o tagata Iutaia atoa ma tagata Eleni o loo nonofo i Efeso; ona matataʻu+ ai lea o i latou uma, ma ua faamamaluina+ ai le suafa o le Alii o Iesu.
18 Ona ō mai lea o le toʻatele o ē e talitonu, ma taʻutino+ mai a latou agasala, ma faailoa mai foʻi a latou mea sesē.
19 O le mea moni, e toʻatele i latou o ē na faia faiga faaagaga,+ ua faaputuputu faatasi a latou tusi, ma susunu ai i le afi i luma o tagata uma. Ua latou faitauina foʻi le tau ma iloa ai, e tusa ma le lima sefulu afe tupe siliva.
20 Ua matuā tupu tele ai le afioga a Ieova, ma ua manumalo.+
21 Ua mavae nei mea, ona manatu lea o Paulo, pe a uma ona ui atu i Maketonia+ ma Akaia, ona malaga atu loa lea o ia i Ierusalema,+ ua faapea ifo: “Pe a ou oo i inā, e tatau foʻi ona ou alu i Roma.”+
22 Ona ia aauina atu lea i Maketonia o ni tagata se toʻalua o ē o loo auauna iā te ia, o Timoteo+ ma Erato,+ peitaʻi ua nofo pea o ia mo sina taimi i le itumalo o Asia.
23 I lenā lava taimi, ua tupu ai se vevesi+ tele ona o Le Ala.+
24 Ua iai se tasi tagata e igoa iā Temetiu, o lē e faia mea siliva, ua ia faia ni tamaʻi malumalu siliva o Atemisa,* ma ua tele tupe+ a tufuga ua maua mai ai;
25 ua ia faapotopoto i latou ma ē ua galulue i mea faapena,+ ma faapea atu: “Alii e, ua outou iloa lelei o le pisinisi lenei ua tatou manuia ai.+
26 Ua outou vāai ma faalogo foʻi, ua faatalitonuina e Paulo le toʻatele o tagata i Efeso+ ma toetoe lava o le itumalo atoa o Asia, ma ua ia faaliliuina i latou i se isi talitonuga, ma ua ia faapea mai e lē o ni atua mea ua faia i lima.+
27 Ua iai foʻi le lamatiaga auā o le a faaleagaina la tatou galuega, ma faalēaogāina foʻi le malumalu o le atua fafine sili o Atemisa.+ O le a faalēaogāina lona mamalu, lea o loo tapuaʻia e le itumalo atoa o Asia ma le lalolagi atoa.”
28 Ina ua faalogo i lenei mea, ona matuā feita ai lea o tagata ma alalaga atu: “E silisili lava Atemisa o Efeso!”
29 Ona vevesi ai lea o le aai, ma ua nanati atu tagata uma ma le lotogatasi i le fale mataaga, ua latou ave faamalosi ia Kaio ma Aritako+ mai i Maketonia, o ē na malaga faatasi ma Paulo.
30 Ua naunau lava Paulo e alu atu i totonu i tagata, ae ua vavao o ia e le ʻausoo.
31 E oo lava i tagata e faauluulu i ai faafiafiaga ma taaloga, o ē ua fiafia iā te ia, ua latou avatu le feʻau iā te ia, e ʻaiʻoi atu iā te ia e aua neʻi alu i le fale mataaga, auā e lamatia ai lona ola.
32 O le mea moni, ua alalaga atu isi i le tasi mea,+ ae alalaga mai isi i se isi mea; auā ua lē mautonu tagata ua potopoto, ma o le toʻatele o i latou ua lē iloa le māfuaaga ua latou faapotopoto ai.
33 Ona latou aumaia lea o Alesana mai i le motu o tagata, ma ua tūlei atu o ia i luma e tagata Iutaia; a ua talo atu le lima o Alesana e manaʻo e fai atu sana faamatalaga i tagata.
34 Ae ina ua latou iloa o ia o le Iutaia, ona latou alalaga uma mai lea pe e tusa ma le lua itula: “E silisili+ lava Atemisa o Efeso!”
35 Mulimuli ane, ua faatoʻafilemu+ e le pulenuu le motu o tagata, ona ia faapea atu lea: “Tagata e, o Efeso, o ai ea le tagata na te lē iloa o le aai o Efeso e leoleoina le malumalu o Atemisa le sili, atoa ma le faatusa na paʻū mai i le lagi?
36 Ua iloa e tagata uma lenei mea, ua tatau ai ona outou fifilemu ma aua le mateletele.+
37 Auā ua outou aumaia nei tagata, e lē o ni faomea o malumalu, ma e lē o ni ē e fai upuleaga i lo tatou atua fafine.
38 O lea la, afai e iai se tagi a Temetiu+ ma tufuga o loo faatasi ma ia, e iai aso e faia ai faamasinoga+ ma o loo iai foʻi suikonesula,+ ia latou molia le tasi i le isi.
39 Peitaʻi, afai e ese se mataupu o loo outou saʻilia, ia ave i fono e masani ona fai, e latou te faia le faaiʻuga.
40 Ua matuā lamatia i tatou auā e ono molia i tatou i le fouvale, ona o mea ua tutupu i lenei aso, ma e leai sa tatou faamolemolega e mafai ona fai atu mo nei tagata pisapisaō.”
41 Ina ua uma ona ia fai atu o nei mea,+ ona ia tuu atu lea o tagata e ō.+
